Eski Ou Apresye Bann Keksoz Sakre?
1 Kan nou ganny demande si nou apresye bann keksoz sakre, probableman nou ti a vitman reponn wi! Kwa sa bann provizyon sakre Bondye ki nou apresye?
2 Koman nou serir sa relasyon personnel ki nou privilezye pour annan, avek nou Papa seles! I asir nou ki si nou ‘apros avek li, i pou apros li avek nou.’ (Zak 4:8) San sakrifis ranson Zezi Kri, okenn zonm pa ti pou kapab resevwar lavi eternel. (Zan 3:16) Sa rekonesans senser i pous nou pour eksprim, toulezour dan lapriyer, nou lapresyasyon profon pour sa kado presye Bondye.
3 Parol enspire Bondye, Labib Sen, e lorganizasyon teres Zeova i osi sakre pour nou. Nou montre lapresyasyon merite pour bann provizyon Zeova, ler nou viv an armoni avek bann prensip Labib, ler nou ranforsi sa lyen lanmour fraternel, kan nou atantivman respekte lord teokratik, e korpere avek bann ki pe dirize.—1 Pyer 1:22.
4 Atraver lesklav fidel e pridan , nou resevwar en labondans nouritir spirityel. Sa pou vre sa lannen dan Lasanble Trwa Zour “Pratikan Parol Bondye,” kot nou pou resevwar lenstriksyon enportan e rezwir lasosyasyon amikal, ki nou vreman bezwen. Koman ki nou kapab montre nou rekonesans profon pour sa provizyon sakre?
5 Pa Negliz Lakaz Zeova: Neemya ti averti bann ki ti’n travay dir pour rekonstrir bann miray Zerizalenm, ‘pour pa negliz lakaz zot Bondye.’ (Nee. 10:39) Denozour “Lakaz” Zeova i son laranzman pour ladorasyon. Nou bann lasanble distrik i form parti sa laranzman. Pour pa negliz sa dispozisyon, nou bezwen la prezan e ekout atantivman, alor nou pou montre Zeova ki nou atas en gran valer avek son bann provizyon. (Ebre 10:24, 25) Ki plan nou devret fer konmela menm pour montre ki nou plennman apresye sa levennman sakre?
6 Asiste Tou le Trwa Zour: Nou tou nou, devret aranze pour asiste tou le trwa zour lasanble. Eski ou pe plàn pour ariv boner sak zour e pour reste ziska lapriyer final Dimans? Si i leka, en kantite benediksyon i ava pour ou. Asiste en lasanble i pa touzour en keksoz fasil. Aziste ou travay profann i kapab demann en bon pe kouraz. Petet transportasyon pa touzour favorab. Me pa les sa bann sitiasyon dekouraz ou pour pa asiste lasanble.
7 Konsider Sa Ekselan Legzanp: An alan lasanble distrik lannen pase, en group frer dan en pei Lafrik kot i annan lager sivil, ti rankontre dan semen en group militer. Sa bann frer ti ganny demande: “Lekel zot, e kot zot pe ale?” Zot ti reponn: “Nou Temwen Zeova e nou pe al asiste lasanble distrik.” Enn sa bann solda ti dir: “Zot Temwen Zeova, zot pa bezwen per nanryen. Zis ale, e zot pou kapab fer zot lasanble san okenn problenm. Sepandan, mazinen ki zot pou zwenn bokou solda. Toultan mars dan milye semen! Si zot trouv bokou dimoun rasanble, kontinyen mars dan milye semen!” Zot ti fer egzakteman sanmenm e zot ti ariv sen-e-sof kot lasanble. Sa bann frer ti ganny rekonpanse akoz zot ti demontre zot lapresyasyon pour bann keksoz sakre.
8 Parey nou bann frer dan Lafrik, nou fer fas avek bann sitiasyon difisil. Me, san dout, nou kapab imit zot lafwa e rezoli pour asiste tou bann sesyon lasanble trwa zour. Kantmenm serten sanzman i a neseser, rod gidans Bondye e mazin byen ki Zeova pou beni nou zefor pour asiste progranm tou le trwa zour.
9 Rekolte bann Benediksyon: Nou annan en dezir ardan pour Parol Bondye, akoz nou konnen ki atraver sa ki nou kapab grandi pour ganny sove. (1 Pyer 2:2) Asiste sa lasanble trwa zour e ekout progranm, pou ed sakenn ant nou fortifye nou lafwa dan sa Parol e alor nou pou pli byen kapab reziste bann latak Satan. An fezan sa, nou pou montre Zeova ek tou lezot dimoun ki nou plennman apresye bann keksoz sakre e ki nou “pa sa bann ki rekile . . . me sa bann ki annan lafwa pour gard vivan nanm.”—Ebre 10:39; 12:16; Prov. 27:11.
10 Nou kapab regard lavenir kot Zeova i ouver baro delo lesyel e vid lo nou en labondans lapli benediksyon spirityel. (Mal. 3:10) Fer li ou bi pour prezan dan Lasanble Trwa Zour “Pratikan Parol Bondye,” depi konmansman louvertir progranm Vandredi ziska lapriyer final e “Amen!” Dimans apremidi. Ou pou zwaye ki ou’n fer li!