Lasanble Distrik i en moman pour ador Zeova dan lazwa
1. Ki mannyer lafet ki bann Izraelit ti selebre i parey nou lasanble distrik ozordi?
1 Zozef, Mari, zot bann zanfan ek lezot dimoun ti regilyerman al Zerizalenm pour asiste bann lafet ki ti ganny fer tou le-z-an. Pandan sa bann lokazyon, Zozef ek Mari enkli lezot adorater ti oubliy tou bann problenm ki zot ti fer fas avek tou le zour e zot ti konsantre plis lo bann laspe spirityel dan zot lavi. Sa bann lafet ti donn zot sa loportinite pour reflesir e koz lo labonte Zeova e pour mazin son Lalwa. Nou lasanble Distrik ki pe vini pou donn nou sa menm loportinite pour ador Zeova dan lazwa.
2. Ki nou devret fer pour prepar nou pour sa lasanble ki pe vini?
2 Preparasyon i neseser: Pour sorti Nazaret ziska Zerizalenm e retournen, fanmir Zezi ti bezwen mars apepre 200 kilomet. Menm si nou pa konnen ki kantite frer ek ser Zezi ti annan, nou kapab mazinen ki preparasyon ek zefor ki Zozef ek Mari ti bezwen fer. Eski ou’n fer bann preparasyon neseser pour asiste sa trwa zour lasanble distrik ki pe vini? Petet ou pou bezwen pran konze oubyen koz avek ou anplwayer ouswa enform ansennyan ou zanfan ki i pa pou vin lekol sa bann zour. Eski ou kapab pran linisyativ pour ed en dimoun dan kongregasyon ki bezwen en led spesifik pour asiste lasanble?—1 Zan 3:17, 18.
3. Ki mannyer lafet ki bann Izraelit ti selebre ti en loportinite pour zot ankouraz kanmarad?
3 Lankourazman sorti kot nou bann frer ek ser: Pa i ti en loportinite pour bann Izraelit ankouraz kanmarad pandan sa bann lafet Zwif! Fanmir Zezi ti san dout enpasyan pour pas letan avek bann zanmi ki zot ti konnen depi lontan. Zot ti osi apresye sa loportinite ki zot ti gannyen pour fer bann nouvo zanmi parmi sa lafoul Zwif ek bann ki ti’n konverti dan larelizyon Zwif ki ti pou la oubyen pe vwayaz avek zot Zerizalenm.
4. Ki mannyer ou kapab demontre ki ou pa pran sa linite ki egziste parmi nou bann frer e ser Kretyen alalezer?
4 En rezon akoz lesklav fidel e pridan i fer laranzman pour nou zwenn ansanm pour ekout sa bann diskour dan lasanble distrik olye prezant sa menm lenformasyon lo papye, i pour ki nou kapab ankouraz kanmarad. (Ebr. 10:24, 25) Alor, fer laranzman pour ariv boner tou le zour pour profit lasosyasyon bann frer ek ser avan ki tyermenn i entrodwir lanmizik pour endike ki i lemoman pour pran plas. Olye kit landrwa lasanble pour al rod manze pandan poz midi, nou ganny ankouraze pour anmenn en repa leze e reste dan landrwa lasanble pour ki nou kapab zwenn e koz avek lezot. Nou lasosyasyon frer ek ser Kretyen ki ini i en kado sorti kot Bondye ki nou pa devret zanmen pran alalezer.—Mik. 2:12.
5. Kwa ki pou ed nou pour benefisye plennman avek progranm lasanble?
5 En letan pour aprann: Depi laz byen zenn, Zezi ti profit sa letan lafet pour aprann konsernan son Papa dan lesyel. (Lik 2:41-49) Kwa ki pou ed nou ek nou fanmir tir plennman profi avek tou sa bann size ki pou ganny prezante pandan lasanble? Pandan bann sesyon lasanble, reste dan ou plas e evite koze si i pa neseser. Pa les ou ganny distrer oubyen distrer lezot avek ou telefonn portab oubyen lezot keksoz elektronik. Port ou latansyon lo sa orater e pran bann not bref. Asiz ansanm an fanmir pour fer sir ki ou zanfan pe ekoute. Aswar pran en pe letan pour diskit ansanm bann pwen ki zot in apresye.
6. Ki nou devret gard antet konsernan nou fason sanze ek nou laparans?
6 Resanz ek laparans: Bann marsan etranze ki ti pe vwayaze ti fasilman kapab rekonnet fanmir Zezi ek lezot adorater Zwif ki ti pe vwayaz avek zot pour lafet akoz sa franz lo zot lenz ek sa lakord ble parlao sa franz. (Nom. 15:37-41) Menm si bann Kretyen pa met bann lenz spesyal, dimoun i konn nou konman bann dimoun ki abiy dan en fason modes, byen annord e prop. Nou devret sirtou vey nou laparans ler nou pe al lasanble e pe retournen, osi byen ler nou dan sa landrwa kot lasanble pe ganny fer. Menm si nou sanz nou lenz apre lasanble, nou devret gard en laparans ki anmenn loner lo non Zeova e nou devret gard nou badz lasanble lo nou. Dan sa fason dimoun pou vwar nou diferan avek bann dimoun ki pa Temwen e sa pou annan en bon lefe lo bann ki pe obzerv nou.
7. Akoz nou devret volonter pour ede kot lasal lasanble?
7 Bezwen volonter: I annan en bezwen pour bann ki ti a kontan ede pandan lasanble afen ki tou keksoz i deroul dan en bon fason. Eski ou kapab volonter pour ede? (Ps. 110:3) Sa travay ki ganny fer kot lasanble i form parti nou servis sakre e i donn en bon temwannyaz. Manedyer en landrwa kot lasanble ti ganny fer ti telman enpresyonnen par bann volonter ki ti netway sa batiman ki i ti ekrir: “Mon remersi zot, zanmen mon’n deza eksperyans en levennman koumsa oparavan. Mon’n touzour tande ki Temwen Zeova i bann dimoun spesyal e depi en bon pe letan nou lakonpannyen i konn sa bon labitid ki zot annan pour kit sa landrwa pli prop ki ler nou ti donn zot. Zot ek zot lorganizasyon in fer sa landrwa en meyer landrwa pour sa kominote e zot in servi sa group dimoun ki pli zantiy ki zanmen mon’n deza ganny lokazyon zwenn oparavan.”
8. Ki loportinite nou pou gannyen pour donn temwannyaz ler nou pou dan landrwa kot lasanble pour ganny fer?
8 Loportinite pour donn temwannyaz: En kantite dimoun dan sa landrwa kot lasanble pou ganny fer pou remark bann viziter avek en laparans respektab e ki’n byen sanze avek zot badz lo zot. Sa pour kapab atir zot latansyon e donn nou sa loportinite pour rakont zot sa ki’n pase dan lasanble. En pti garson kat-r-an ti anmenn en kopi en nouvo piblikasyon avek li restoran apre lasanble e i ti montre sa piblikasyon en servez. Sa ti donn paran sa pti garson loportinite pour envit sa madanm lasanble.
9. Ki mannyer nou kapab imit lafason ki fanmir Zezi ti demontre zot rekonesans pour bann provizyon spirityel ki sorti kot Zeova?
9 Sa bann lafet dan letan lontan ti bann moman zwaye kot bann Zwif ti esper avek enpasyans pour zot aprann konn plis lo Zeova. (Det. 16:15) Fanmir Zezi ti kontan pour fer nenport sakrifis pour asiste e benefisye plennman avek sa bann lafet. Pareyman nou osi nou apresye nou bann lasanble distrik e konsider zot konman en kado sorti kot nou Papa dan lesyel. (Zak 1:17) I lemoman pour prepar nou pour lasanble sa lannen pour ador Zeova dan lazwa!
[Bwat lo paz 6, 7]
Bann rapel pour Lasanble Distrik
◼ Ler Progranm: Progranm pour konmans 9:20 bomaten tou le trwa zour. Laport pour ouver depi 8:00 bomaten. Kan tyermenn i entrodwir kantik, tou dimoun i devret dan zot plas pour progranm konmans dan en fason respektab. Progranm pou fini 4:55 apremidi Vandredi ek Sanmdi e 3:40 apremidi Dimans.
◼ Plas asize: Ou kapab anmas plas zis pour bann ki’n vin avek ou dan menm transpor oubyen ki viv avek ou dan menm lakour. Ou osi kapab anmas plas pour ou etidyan Labib.—1 Kor. 13:5.
◼ Dezennen: Silvouple anmenn zot dezennen olye kit landrwa lasanble pour al rod manze pandan poz midi. Ou kapab servi en pti bwat (ice-box) ki pa pran tro bokou plas. Bann gro bwat (ice-box) ek sopin pa devret ganny anmennen kot lasanble.
◼ Kontribisyon: Nou kapab demontre nou lapresyasyon ler nou fer bann kontribisyon volonter pour sa travay mondyal dan nou Lasal Rwayonm oubyen kot lasanble. Okenn donasyon ki ganny fer par tyek kot lasanble i devret ganny adrese lo “Association of Jehovah’s Witnesses.”
◼ Aksidan ek ka irzans: Si i annan en ka ki arive kot landrwa lasanble, silvouple vwar en manm servis lakey, ki kapab enform Premye Swen toudswit pour ki bann ki kalifye i kapab vwar sa sityasyon e donn lasistans. Si i neseser, bann ki responsab i kapab telefonn 999. Sa pou evite ki bann landrwa konsernen i resevwar en kantite koudtelefonn konsernan bann ka ki pa tro serye.
◼ Soulye: Tou le lannen i annan bann ka ki arive akoz kalite soulye ki nou mete. I pli bon pour swazir bann soulye konfortab e apropriye ki pou permet en dimoun mont dan peron, mars dan bann landrwa kot i annan bann gril parlao bann trou oubyen rigol ek lezot ankor san ganny okenn dimal.
◼ Lanrezistreman: Okenn lenstriman rikorde pa devret ganny konnekte avek sistenm elektrik oubyen sistenm son sa landrwa. Zot kapab ganny servi zis dan en fason ki pa pour deranz lezot.
◼ Pous pti baba ek fotey: Pous pti baba ek fotey pa devret ganny anmennen kot lasanble pou ganny fer. Par kont, bann sez pti baba ki kapab ganny atase lo en sez o bor son paran i akseptab.
◼ Lesans: Laplipar lasanble i ganny fer dan bann landrwa fermen kot nou depan lo erkonn. Alor, i pou en siny labonte si nou pa met bokou lesans for ki kapab fer ditor bann ki annan problenm respiratwar oubyen lezot problenm parey.—1 Kor. 10:24.
◼ Form Follow-Up: Ou devret servi en form Please Follow-Up (S-43) pour donn lenformasyon konsernan okenn dimoun ki montre lentere akoz temwannyaz enformel pandan lasanble. Bann proklanmater i kapab anmenn enn de sa form avek zot kot lasanble. Bann form ki’n ganny ranpli i devret ganny donnen avek sekreter kongregasyon apre lasanble.—Vwar Nou Minister Rwayonm Novanm 2009, paz 4.
◼ Servis Volonter: Sa lazwa ki nou gannyen ler nou asiste lasanble pou ogmante si nou volonter pour ede fer bann travay neseser. (Akt 20:35) Si en dimoun i anvi ede i devret fer konnen bann frer ki responsab kot lasanble. Bann zanfan anba 16 an i kapab partisipe si zot vin avek zot paran oubyen en dimoun ki responsab zot ouswa en lot adilt ki enn ant sa de paran in dakor pour responsab zot.