Eski ou’n pare pour sa festen spirityel?
1. Ki kalite preparasyon nou bezwen fer pour prepar en festen?
1 Pour fer en festen i demann bokou preparasyon. Nou bezwen aste manze, prepar byen pour fer li goute e apre met atab pour ganny servi. Pour servi sa repa tou keksoz i bezwen ganny byen organize. Deplis, landrwa kot sa repa pou ganny servi i bezwen ganny byen prepare davans. Bann envite osi i bezwen prepar zot, espesyalman si zot pou bezwen fer en gran vwayaz pour ariv landrwa kot sa festen pou ganny fer. Menm si i annan bokou pour fer, apresye en repa byen apetisan e nourisan avek bann zanmi ek fanmir i fer tou sa travay vo lapenn. Byento bann Temwen Zeova dan lemonn antye pou zwenn ansanm an gran ek pti group pour selebre en festen spirityel, dan Lasanble Distrik ‘Kontinyen Veye!’ ki zot pe espere avek enpasyans. Bokou travay in fini konmans ganny fer pour prepar progranm e pour met tou keksoz pare. Nou tou nou’n ganny envite. Pour kapab prezan e pour tir maksimonm byenfe, nou bezwen prepar nou personnelman.—Prov. 21:5.
2. Pour nou prezan pour gout sak pla dan nou festen spirityel ki preparasyon nou bezwen fer?
2 Tir maksimonm byenfe: Eski ou’n fini fer ou plan pour ki ou kapab gout sak pla dan nou festen spirityel? Si i neseser, koz avek ou anployer pour enform li ki ou pou asiste tou sesyon lasanble, enkli sa premye zour. Eski ou’n fini fer laranzman transpor ek landrwa reste? Bann ansyen i devret verifye si bann aze, bann ki annan dezabilite e osi lezot ki bezwen lasistans in ganny swen neseser.—Zer. 23:4; Gal. 6:10.
3. Akoz nou pa devret asiste en lasanble enternasyonal si nou pa’n ganny envite?
3 Serten pei pou ganny sans apresye lasanble enternasyonal. Gard antet ki serten kongregasyon ek delege sorti dan diferan pei in ganny envite pour asiste sa bann levennman. Par fer sa bann laranzman, biro brans in byen kalkile konbyen delege pour ganny envite, par pran an konsiderasyon lakantite plas asize ek lasanm lotel ki disponib. I kapab annan tro bokou dimoun si bann proklanmater ki pa’n ganny envite i asiste lasanble enternasyonal.
4. Ki bann rapel ki pou ed nou pare pour konmans swiv progranm sak zour?
4 Prepare pour ariv lasanble ase boner sak zour, pour rod plas asize avan progranm i konmanse. Avan progranm i konmanse pran detrwa minit pour get lo progranm. Sa pou ed ou prepar ou leker pour resevwar lenformasyon ki pou ganny prezante. (Ezra 7:10) Avan progranm i konmanse, tyermenn pou entrodwir lanmizik, ekout avek plezir, e prepare pour sant kantik e pour lapriyer louvertir.
5. Ki mannyer nou fanmir i kapab tir plis byenfe avek progranm lasanble?
5 Si bann manm fanmir i asiz ansanm pandan lasanble, paran pou kapab fer sir ki zot zanfan pe ekout progranm atantivman. (Det. 31:12) Tou dimoun i ganny ankouraze pour swiv dan zot Labib an menm tan ki bann verse pe ganny lir. Kan ou pran bann not, sa pou ed ou pli byen konsantre. Plitar, not ki ou’n pran, pou ed ou mazin bann pwen dan bann diskour. Reziste tantasyon pour koze kan pa neseser oubyen pour leve dan ou plas pandan ki sesyon pe deroule. Si ou annan en telefonn mobil, regle li pour ki i pa deranz ou ek lezot pandan ki progranm pe deroule. Apre ki sak sesyon i terminen, akoz ou pa diskit avek lezot konsernan kwa ki ou’n apresye dan progranm?
6. Ki laspe remarkab nou bann lasanble, e ki mannyer nou kapab ganny bokou lazwa?
6 Dan lasanble distrik, nou ganny sa loportinite pour nou pas en bon moman dan lasosyasyon nou bann frer ek ser ki pa kapab ganny eksperyanse par bann dimoun dan lemonn. (Ps. 133:1-3; Mark 10:29, 30) Akoz ou pa fer li ou lobzektif pour entrodwir ou lekor avek bann ki asiz o bor ou e koz avek zot pandan poz midi? Sa i enn bann lavantaz ki nou annan ler nou anmenn en repa senp e reste dan landrwa lasanble olye al aste bwat manze. Fer sir ki ou pa mank sa loportinite pour ankouraz lezot.—Rom. 1:11, 12.
7. An rapor avek resanz, ki preparasyon nou devret fer?
7 Resanz: I remarkab ki Zeova ti demann bann Izraelit pour met franz avek bordir zot lenz, avek en lakord ble parlao sa franz. (Nom. 15:37-41) Sa ti en rapel ki ti vizib, i ti rapel zot ki zot ti en pep ki ti’n ganny met apar pour ador Zeova. Ozordi, ler nou sanz dan en fason byen respektab e apropriye kan nou asiste lasanble, sa i fer nou diferan avek sa lemonn. Menm apre ki progranm in terminen, pour bann ki pe obzerve sa i en temwannyaz pwisan. Alor, reflesir byen davans ki resanz ou pou mete.
8. Ki mannyer nou kapab rann temwannyaz avek bann dimoun ki nou zwenn avan oubyen apre lasanble?
8 Donn en temwannyaz: Si nou reflesir en pti pe davans, petet nou pou kapab donn temwannyaz avek bann dimoun avan oubyen apre lasanble. En frer ki ti al dan en restoran avek son madanm apre lasanble, ti senpleman montre sa server son badz lasanble e demann li: “Eski ou’n vwar plizyer dimoun avek sa badz?” Sa server ti dir ki i’n remarke ki i annan plizyer zot avek sa badz e i ti pe demann son lekor akoz ki zot ti annan sa badz lo zot. Sa ti fer ki en konversasyon ti konmanse e sa frer ti envit sa server lasanble.
9. Ki mannyer nou kapab demontre lapresyasyon pour Zeova, sa Enn ki’n envit nou?
9 Menm si nou bann frer ki pou prezant tou bann diskour, entervyou ek demonstrasyon, Zeova nou Papa dan lesyel ki kontan nou, i sa Enn ki fourni nou avek sa festen spirityel tou le lannen. (Iza. 65:13, 14) Nou demontre lapresyasyon pour sa Enn ki’n envit nou kan nou prezan sak zour pour gout sak pla sa manze spirityel ki pou ganny servi. Eski ou’n fini fer preparasyon pour ou prezan sak zour?
[Bwat lo paz 6]
Bann rapel pour Lasanble Distrik
◼ Ler Progranm: Progranm pou konmans 9:20 bomaten tou le trwa zour. Laport pou ouver depi 8:00 bomaten. Kan tyermenn i entrodwir kantik, tou dimoun i devret dan zot plas pour progranm konmans dan en fason respektab. Progranm pou fini 4:55 apremidi Vandredi ek Sanmdi e 4:00 apremidi Dimans. Pour bann lasanble enternasyonal, Zedi progranm pour konmans 1:20 e fini 4:45 apremidi.
◼ Plas asize: Ou kapab anmas plas zis pour bann ki’n vin avek ou dan menm transpor oubyen ki viv avek ou dan menm lakour.
◼ Dezennen: Silvouple anmenn zot dezennen olye kit landrwa lasanble pour al rod manze pandan poz midi. Ou kapab servi en pti bwat (icebox) ki pa pran tro bokou plas. Bann gro bwat (icebox), sopin, pa devret ganny anmennen kot lasanble.
◼ Kontribisyon: Nou kapab demontre nou lapresyasyon ler nou fer bann kontribisyon volonter pour sa travay mondyal dan nou Lasal Rwayonm oubyen kot lasanble. Okenn donasyon ki ganny fer par tyek kot lasanble i devret ganny adrese lo “Association of Jehovah’s Witnesses.”
◼ Aksidan ek ka irzans: Dan serten pei, bann landrwa konsernen i resevwar en kantite koudtelefonn konsernan bann ka ki pa tro serye. Si i annan en ka ki arive kot landrwa lasanble, silvouple vwar en manm servis lakey, ki kapab enform Premye Swen toudswit pour ki bann ki kalifye i kapab vwar sa sityasyon e donn lasistans. Si i neseser, bann ki responsab i kapab telefonn 999.
◼ Soulye: Tou le lannen i annan bann ka ki arive akoz kalite soulye ki nou mete. I pli bon pour swazir bann soulye ki konfortab e apropriye ki pou permet en dimoun mont dan peron, mars dan bann landrwa kot i annan bann gril parlao bann trou oubyen rigol ek lezot ankor san ganny okenn dimal.
◼ Lanrezistreman: Okenn lenstriman rikorde pa devret ganny konnekte avek sistenm elektrik oubyen sistenm son sa landrwa. Zot kapab ganny servi zis dan en fason ki pa pour deranz lezot.
◼ Pous pti baba ek fotey: Pous pti baba ek fotey pa devret ganny anmennen kot lasanble pou ganny fer. Parkont, bann sez pti baba ki kapab ganny atase lo en sez o bor son paran i akseptab.
◼ Lesans: Laplipar lasanble i ganny fer dan bann landrwa fermen kot nou depan lo erkonn. Alor, i pou en siny labonte si nou pa met bokou lesans for ki kapab fer ditor bann ki annan problenm respiratwar oubyen lezot problenm parey.—1 Kor. 10:24.
◼ Form Follow-Up: Ou devret servi en form Please Follow Up (S-43) pour donn lenformasyon konsernan okenn dimoun ki montre lentere akoz en temwannyaz enformel pandan lasanble. Bann proklanmater i kapab anmenn enn de sa form avek zot kot lasanble. Bann form ki’n ganny ranpli i devret ganny donnen avek sekreter kongregasyon apre lasanble.—Vwar Nou Minister Rwayonm Fevriye 2005, p. 6.