Trwa zour lankourazman spirityel
1. Ki nou kapab ekspekte dan sa lasanble ki pe vini?
1 Dan sa lemonn Satan ki dan en sans spirityel i parey en dezer, Zeova pe kontinyelman rafresir son bann serviter. (Iza. 58:11) En mwayen ki Zeova i donn nou lafors i atraver lasanble distrik tou le lannen. Anmezir ki lasanble pour sa lannen i aprose, ki mannyer nou kapab prepar nou pour ganny ankouraze e pour ankouraz lezot spirityelman?—Prov. 21:5.
2. Ki laranzman ki nou bezwen fer la ki lasanble pe aprose?
2 Si ou pa ankor fer li, pran letan pour aranz ou progranm personnel e fer laranzman pour pran konze dan travay ki ou a kapab asiste tou le trwa zour sa lasanble. Eski ou’n kalkil lakantite letan ki i pou pran ou pour ariv kot lasal lasanble sak zour pour ou kapab ariv boner e trouv en landrwa asize avan ki progranm i konmanse? Sirman nou pa pou anvi mank okenn manze spirityel ki Zeova in prepare pour nou! (Iza. 65:13, 14) Eski ou’n fini fer laranzman pour landrwa reste ek transpor?
3. Ki sizesyon ki pou kapab ed nou ek nou fanmir benefisye antyerman avek progranm lasanble?
3 Kwa ki pou ed ou reste konsantre pandan progranm lasanble? Si i posib, repoz byen tou le swar pandan sa trwa zour lasanble. Gard ou lizye fikse lo sa orater. Get tou verse ki ganny site dan ou prop Labib. Pran bann not bref. I pou byen pour bann fanmir asiz ansanm pour ki paran i kapab ed zot zanfan pour port byen latansyon. (Prov. 29:15) Petet ou kapab diskit lo bann pwen enteresan dan progranm pour lazournen an fanmir son aswar. Pour ki ou fanmir i kontinyen ganny ankouraze menm apre lasanble, ou kapab fer letan pour diskit serten pwen spesifik ki ou fanmir i kapab aplike pandan en sesyon Ladorasyon an Fanmir.
4. Ki mannyer nou kapab ed lezot dan kongregasyon ganny sa lankourazman spirityel?
4 Ed lezot ganny sa lankourazman spirityel: Nou anvi ki lezot osi i ganny ankouraze avek sa lasanble. Eski i annan bann proklanmater aze oubyen lezot dan kongregasyon ki bezwen led pour asiste lasanble? Eski ou kapab ed zot? (1 Zan 3:17, 18) Bann ansyen, espesyalman bann sirveyan group i devret fer sir ki bann proklanmater i ganny sa lasistans ki zot bezwen.
5. Ki mannyer nou pou distribye bann lenvitasyon pour lasanble? (Vwar osi bwat anler.)
5 Parey dan lepase, nou pou partisip dan en kanpanny pour envit lezot asiste lasanble trwa semenn davans. Bann kongregasyon i devret fer li en lobzektif pour distribye tou zot lenvitasyon e pour kouver otan teritwar ki zot kapab. Lenvitasyon ki ou fanmir pa’n fini distribye a lafen sa kanpanny i devret ganny anmennen kot lasal lasanble pour ou servi kan ou pe prese enformelman. Lezot lenformasyon konsernan sa bann lenvitasyon pou ganny donnen pandan progranm Vandredi. Lenvitasyon ki ou fanmir i panse zot pa pou servi, i devret ganny donnen avek bann manm servis lakey kot lasal lasanble. Silvouple gard en kopi pour ou akoz ou pou bezwen pandan diskour final Dimans.
6. Ki mannyer nou kapab demontre en bon kondwit kot lasanble?
6 En bon kondwit i ankourazan: Vi ki nou pe viv dan en letan kot dimoun i “egois” e pa enterese avek santiman lezot, pa i pou ankourazan pour parmi nou bann frer ek ser Kretyen ki fer bokou zefor pour demontre en bon kondwit! (2 Tim. 3:2) Nou demontre en bon kondwit kan nou antre dan lasal lasanble dan en fason kalm e annord kan laport i ouver 8:00 bomaten. Nou kapab anmas plas asize zis pour bann ki reste avek nou, vwayaz dan menm transpor avek nou oubyen pour nou etidyan Labib. Nou devret ekout tyermenn kan i demann nou pour pran nou plas pour ki nou kapab ekout lanmizik ki entrodwir sak sesyon. Kan nou aziste nou telefonn pour ki i pa distrer personn pandan sesyon, sa pou demontre ki nou annan en bon kondwit. Nou pou osi demontre nou bon kondwit par reste trankil, pa anvoy mesaz lo telefonn, manze oubyen marse dan koridor kan i pa neseser pandan progranm.
7. Ki mannyer nou kapab ganny ankouraze e ankouraz lezot kan nou asosye avek nou bann frer ek ser?
7 Lasosyasyon ki ankourazan: Bann lasanble i donn nou plis loportinite pour pas en moman agreab avek nou bann frer ek ser dan linite. (Ps. 133:1-3) Akoz ou pa pran linisyativ pour ‘ouver gran ou leker’ e fer konnesans avek bann frer ek ser ki sorti dan lezot kongregasyon? (2 Kor. 6:13) Ou kapab fer li en lobzektif pour fer konnesans avek omwen en dimoun oubyen fanmir sak zour. Sa poz midi pou en bon loportinite pour fer sa. Alors, anmenn en repa leze e manz ansanm avek lezot kot lasal lasanble plito ki kit landrwa lasanble pour al aste manze oubyen manz dan restoran. Si ou fer sa ou pou kapab ganny beni avek bann bon zanmi.
8. Akoz nou devret ofer pour travay kot lasal lasanble e ki mannyer nou kapab fer sa?
8 Pa i ankourazan pour travay ansanm avek nou bann frer ek ser dan sa servis sakre! Eski ou kapab ofer pour ede dan okenn departman oubyen ed ou kongregasyon avek netwayaz? (Ps. 110:3) Si ou napa okenn responsabilite, eski ou kapab apros Servis Volonter kot lasal lasanble? Kan plizyer dimoun i ede, sa i fer sa travay pli gou e pli fasil.
9. Akoz nou bezwen port bokou latansyon lo nou kondwit ek nou laparans pandan lasanble?
9 Nou kondwit i ankouraz bann ki obzerv nou: Nou pou bann delege lasanble pandan tou le trwa zour sa lasanble, pa zis pandan sa progranm. Bann ki obzerv nou kot landrwa ki lasanble pou ganny fer i devret vwar sa diferans ant nou ek bann ki pa Temwen. (1 Pyer 2:12) Nou resanz ek laparans kot lasanble, kot nou pou reste ek kot bann restoran i devret onor Zeova. (1 Tim. 2:9, 10) Si nou met nou badz, bann dimoun ki vwar nou pou kapab idantifye nou konman Temwen Zeova. Sa pou kapab donn nou en loportinite pour koz avek zot lo nou lasanble e rann en temwannyaz avek zot.
10. Ki leksperyans ki montre ki kan nou annan en bon kondwit, sa i donn en bon temwannyaz?
10 Ki lenpresyon nou bon kondwit pou annan lo lezot kot lasanble? Dapre en lartik dan en zournal, manedyer enn bann landrwa kot lasanble distrik i ganny fer ti dir: “Bann dimoun i byen poli. Nou vreman kontan pour lwe zot sa lasal tou le lannen.” Lannen pase en msye ki pa Temwen ti perdi son portfey dan en lotel kot bann delege lasanble ti pe reste. Ler sa portfey ti ganny anmennen kot manedyer lotel avek tou son bann zafer ladan, sa manedyer lotel ti dir avek sa msye: “Gran mersi Temwen Zeova ti pe asiste zot lasanble lanmenm la o bor e lotel ti plen avek zot. Si non, tre probab ou pa ti pou retrouve.”
11. Anmezir ki lasanble i aprose kwa ki nou bezwen met konman nou lobzektif e akoz?
11 Lasanble pour sa lannen pe aprose tre vit. En kantite letan ek zefor pe ganny mete pour fer ki sa progranm ek landrwa ki lasanble pour ganny fer i ankourazan e agreab. Fer li ou lobzektif pour asiste tou le trwa zour e met ou pare pour sa ki Zeova ek son lorganizasyon i annan pour ofer ou. Ou osi kapab determinen pour ankouraz lezot atraver ou bon kondwit ek lasosyasyon. Alor, ou ek lezot pou kapab santi parey en ser ki ti ekrir apre ki i ti’n asiste lasanble lannen pase: “Mon pa kapab mazin okenn leksperyans pli satisfezan!”
[Ekstre page 4]
Parey dan lepase, nou pou partisip dan en kanpanny pour envit lezot asiste lasanble trwa semenn davans
[Ekstre page 6]
Nou resanz ek laparans kot lasanble, kot nou pou reste ek kot bann restoran i devret onor Zeova
[Ekstre page 7]
Fer li ou lobzektif pour ankouraz lezot atraver ou bon kondwit ek lasosyasyon
[Bwat lo page 4]
Bann rapel pour Lasanble Distrik 2011
◼ Ler progranm: Progranm pour konmans 9:20 bomaten tou le trwa zour. Laport pou ouver 8:00 bomaten. Kan tyermenn i entrodwir kantik, tou dimoun i devret dan zot plas pour ki progranm i kapab konmans dan en fason respektab. Progranm pou fini 4:55 apremidi Vandredi ek Sanmdi e 3:40 apremidi Dimans.
◼ Plas asize: Ou kapab anmas plas zis pour bann ki’n vin avek ou dan menm transpor oubyen ki viv avek ou dan menm lakour. Ou osi kapab anmas plas pour ou etidyan Labib.—1 Kor. 13:5.
◼ Dezennen: Silvouple anmenn zot dezennen olye kit landrwa lasanble pour al rod manze pandan poz midi. Ou kapab servi en pti bwat ki pa pran tro bokou plas. Bann gro bwat manze ek okenn keksoz an ver pa devret ganny anmennen kot lasal lasanble.
◼ Kontribisyon: Nou kapab demontre nou lapresyasyon ler nou fer bann kontribisyon volonter pour sa travay mondyal kot lasanble. Bann tyek i devret ganny adrese lo “Association of Jehovah’s Witnesses.”
◼ Aksidan ek ka irzans: Si i annan en ka irzans ki arive kot landrwa lasanble, silvouple vwar en manm servis lakey ki kapab enform Premye Swen toudswit pour ki bann ki kalifye i kapab vwar sa sityasyon e donn lasistans. Si i neseser, bann ki responsab pou telefonn 999. Sa pou evite ki bann landrwa konsernen i resevwar en kantite koudtelefonn.
◼ Medikaman: Si ou bezwen pran okenn latizann ki’n ganny preskri par dokter, silvouple fer sir ki ou anmenn lakantite ki ou pou bezwen avek ou vi ki i pou napa kot lasal lasanble.
◼ Soulye: Tou le lannen i annan bann aksidan ki arive akoz kalite soulye ki nou mete. I pli bon pour swazir bann soulye konfortab e apropriye ki pou permet en dimoun mont dan peron, mars dan bann landrwa kot i annan bann gril par lao bann trou oubyen rigol ek lezot ankor san ganny okenn dimal.
◼ Pous pti baba ek fotey: Pous pti baba ek fotey pa devret ganny anmennen kot lasanble pou ganny fer. Par kont, bann sez pti baba ki kapab ganny atase lo en sez o bor son paran i akseptab.
◼ Lesans: Laplipar lasanble i ganny fer dan bann landrwa fermen kot nou depan lo erkonn. Alor, i pou en siny labonte si nou pa met bokou lesans for ki kapab fer ditor bann ki annan problenm respiratwar oubyen lezot problenm parey.—1 Kor. 10:24.
◼ Bann form Please Follow Up (S-43): Ou devret servi en form Please Follow Up pour donn lenformasyon konsernan okenn dimoun ki montre lentere akoz temwannyaz enformel pandan lasanble. Bann proklanmater i kapab anmenn enn de sa form avek zot kot lasanble. Bann form ki’n ganny ranpli i devret ganny donnen avek sekreter kongregasyon apre lasanble.—Vwar Nou Minister Rwayonm Novanm 2009, paz 4.
◼ Restoran: Onor non Zeova atraver ou bon kondwit dan bann restoran. Ou kapab kit en tip.
◼ Servis Volonter: Sa lazwa ki nou gannyen ler nou asiste lasanble pou ogmante si nou volonter pour ede fer bann travay neseser. (Akt 20:35) Si en dimoun i anvi ede i devret fer konnen bann frer ki responsab kot lasanble. Bann zanfan anba 16 an i kapab partisipe si zot vin avek zot paran oubyen sa dimoun ki responsab zot ouswa en lot adilt ki enn ant sa de paran in dakor pour responsab zot.
[Bwat lo page 5]
Konman nou pou ofer sa lenvitasyon?
Pour nou kapab kouver nou teritwar an antye, nou bezwen gard nou konversasyon bref. Petet nou kapab dir: “Bonzour. Nou pe partisip dan en travay ki pe ganny fer dan lemonn antye pour distribye sa lenvitasyon. Sa i ou kopi. Ou pou trouv plis lenformasyon lo sa lenvitasyon.” Sa lenvitasyon in ganny fer pour atir latansyon bann dimoun, alor donn li avek met lakour dan en fason ki ou pou trouv son devan. Koz avek lantouzyasm. Kan nou partisip dan sa kanpanny pandan wikenn, nou devret ofer magazin osi kan i apropriye.