Kondwit ki glorifye Bondye
1. Akoz dimoun i fasilman rekonnet bann Temwen Zeova ler zot asiste bann lasanble distrik?
1 I fasil pour dimoun rekonnet nou kan nou asiste bann lasanble distrik. Dan bokou lavil kot lasanble distrik i ganny fer, medya i enform kominote konsernan nou prezans. Bann lotel ek restoran i souvan plen avek bann delege e bann dimoun ki reste dan zalantour i remarke ki bokou sa bann viziter i annan en badz lo zot. Sa bann rapel swivan pou ed nou pour glorifye Bondye par nou bon kondwit kan nou dan landrwa kot lasanble pe ganny fer.—1 Pyer 2:12.
2. Ki mannyer nou kapab glorifye Bondye par nou fason sanze ki respektab dan landrwa lasanble?
2 Sanz dan en fason respektab: Ler nou sanz dan en fason respektab kan nou asiste lasanble, souvan sa i enpresyonn lezot. Nou fason sanze dan lezot moman osi, par egzanp kan nou pe al reste dan en lotel, kan nou pe manze dan en restoran, kan nou pe rod konmisyon i kapab annan en gran lefe lo bann ki pe obzerv nou. Menm si nou pa bezwen met en kalite lenz spesifik pour sa bann lokazyon, sa ki nou mete i devret respektab e pa devergonde. Bann dimoun i devret remarke diferans ant nou ek dimoun ki pa Temwen. (Rom. 12:2) An plis, nou devret met nou badz lasanble, sa pou fer piblisite pour nou lasanble e donn nou loportinite pour rann temwannyaz e permet lezot delege idantifye nou.
3. Ki mannyer nou kapab demontre pasyans ek lapolites?
3 Pasyans ek lapolites: Dan sa letan kot bokou dimoun dan lemonn i egois e engra, pa bann travayer lotel ek restoran pou kontan kan nou demontre pasyans ek lapolites! (2 Tim. 3:1-5) Kan nou pe anmas plas oubyen fer laliny pour ganny bann nouvo piblikasyon, nou pa devret rod nou prop lavantaz me plito pour lezot. (1 Kor. 10:23, 24) Apre ki i ti’n asiste son premye lasanble, en zonm ti dir: “Mon pa mazin okenn diskour ki ti ganny donnen sa zour, me kondwit bann Temwen ti annan en gran lefe lo mwan ki mon pa pou zanmen bliye.”
4. Akoz nou devret pare pour volonter pour ede dan lasanble si nou sirkonstans i permet?
4 Volonter: Bann vre Kretyen i renonmen konman bann dimoun ki volonter. (Ps. 110:3) Eski ou kapab volonter pour ede kot lasanble? Dan en lasanble distrik, apepre 600 frer ek ser ti volonter pour netwaye avan lasanble. Bann dimoun ki ti travay dan sa landrwa ti dir: “Sa i en keksoz vreman enkrwayab ki nou pa’n deza vwar! I difisil pour krwar ki tou sa bann dimoun i bann volonter.” Nou pe esper avek enpasyans bann lasanble distrik 2013 ek sa loportinite ki nou pou annan, pa zis pour ekoute e aprann avek Bondye me osi pour glorifye li.
[Bwat lo paz 3-6]
Bann rapel pour Lasanble Distrik 2013
◼ Ler progranm: Laport pou ouver 8:00 bomaten. Progranm mizikal pou konmans 9:20 bomaten tou le trwa zour. A sa moman, nou tou nou devret al dan nou plas pour ki progranm i kapab konmans dan en fason annord. Kantik ek lapriyer final pou ganny fer 4:50 apre midi Vandredi ek Sanmdi, e Dimans i pou fini 3:35.
◼ Plas asize: Ou kapab anmas plas zis pour bann ki’n vin avek ou dan menm transpor oubyen ki reste avek ou. Ou osi kapab anmas plas pour ou etidyan Labib. Vi ki lakantite sit ki ganny rezerve pour bann frer ek ser aze oubyen ki annan dezabilite i limite, i pa pou toultan posib pour tou zot fanmir asiz avek zot. Alor, silvouple kit sa bann sit pour bann ki bezwen oubyen bann ki asiste zot.—1 Kor. 13:5.
◼ Dezennen: Silvouple anmenn zot dezennen olye kit landrwa lasanble pour al rod manze pandan poz midi. Ou kapab servi en pti bwat ki pa pran tro bokou plas. Bann gro bwat manze ek okenn keksoz an ver pa devret ganny anmennen kot lasal lasanble.
◼ Kontribisyon: Nou kapab demontre nou lapresyasyon ler nou fer bann kontribisyon volonter kot lasanble pour sa travay mondyal. Bann tyek i devret ganny adrese lo “Association of Jehovah’s Witnesses.”
◼ Latizann: Si ou bezwen pran okenn latizann ki’n ganny preskri par dokter, silvouple fer sir ki ou anmenn lakantite ki ou pou bezwen avek ou vi ki i pou napa kot lasal lasanble. Bann pikir ek sereng pour bann dyabetik pa devret ganny mete dan bann plastik bin otour lasanble, me plito dan en landrwa apropriye kot i pa prezant en danze pour personn.
◼ Soulye: Tou le lannen i annan bann aksidan ki arive akoz kalite soulye ki nou mete. I pli bon pour swazir bann soulye konfortab e apropriye ki pou permet en dimoun mont dan peron, mars dan bann landrwa kot i annan bann griy par lao bann trou oubyen rigol ek lezot ankor san ganny okenn dimal.
◼ Pous pti baba ek fotey: Pous pti baba ek fotey pa devret ganny anmennen kot lasanble pou ganny fer. Par kont, bann sez pti baba ki kapab ganny atase lo en sez o bor son paran i akseptab.
◼ Lesans: Laplipar lasanble i ganny fer dan bann landrwa fermen kot nou depan lo erkonn. Alor, i pou en siny labonte si nou pa met bokou lesans for ki kapab fer ditor bann ki annan problenm respiratwar oubyen lezot problenm parey.—1 Kor. 10:24.
◼ Bann form Please Follow Up (S-43): Ou devret servi en form Please Follow Up pour donn lenformasyon konsernan okenn dimoun ki montre lentere atraver temwannyaz enformel pandan lasanble. Bann form ki’n ganny ranpli i devret ganny donnen avek sekreter kongregasyon apre lasanble.
◼ Restoran: Onor non Zeova atraver ou bon kondwit dan bann restoran. Sanz dan en fason ki montre ki ou en Kretyen. Ou kapab kit en pti larzan pour sa servez.
◼ Servis volonter: Si en dimoun i anvi volonter i devret fer konnen bann frer ki responsab kot lasanble. Bann zanfan anba 16 an i kapab partisipe si zot vin avek enn zot paran oubyen en dimoun ki zot paran in met responsab zot.