Bann lasanble distrik i rann temwannyaz lo laverite
1. Bann lafet tou le-z-an ti donn loportinite bann Izraelit pour reflesir e diskit lo kwa?
1 Bann Izraelit dan letan lontan ti rasanble trwa fwa par an pour bann lafet. Menm si zis bann zonm ki ti oblize asiste sa bann levennman, souvan bann fanmir antye ti vwayaze ziska Zerizalenm pour al sa bann rasanbleman. (Det. 16:15, 16) Dan sa bann lokazyon, zot ti annan sa loportinite pour reflesir e diskit lo bann laverite enportan. Ki sa bann laverite? Enn se ki Zeova i en Bondye ki donn avek zenerozite ek lanmour. (Det. 15:4, 5) En lot se ki nou kapab depan lo li pour ganny gidans ek proteksyon. (Det. 32:9, 10) Bann Izraelit ti osi kapab reflesir lo lefet ki zot ti pep Zeova, alor zot ti devret reflekte son ladrwatir. (Det. 7:6, 11) Pareyman ozordi, nou benefisye en kantite avek nou bann lasanble distrik.
2. Ki mannyer progranm lasanble distrik i ed nou konpran laverite?
2 Progranm i met lanfaz lo laverite: Pandan bann lasanble distrik, nou kontan pour ekout bann diskour, get bann demonstrasyon, entervyou ek dram ki ed nou konpran e aplik bann konsey Labib. (Zan 17:17) Deza la konmela, i annan en kantite preparasyon ki pe ganny fer pour nou lasanble distrik ki pe vini. Lorganizasyon Zeova pe prepar en progranm ki pou adres bann bezwen global. (Mat. 24:45-47, NW) Eski ou eksite pour vwar e tann sa ki pou ganny prezante?
3. Ki nou devret fer pour benefisye avek progranm lasanble?
3 Byensir, nou pou tir bann byenfe si nou la sa trwa zour e ekout atantivman. Si ou pa ankor fer li, koz avek ou anplwayer konsernan ou konze. Fer sir ki tou le swar ou byen dormi pour ki ou atantif pandan progranm. Bokou i vwar ki zot pli atantif si zot get zis sa orater e pran bann pti not. Fer sir ki ou telefonn mobil pa deranz ou ouswa lezot. Pa bezwen koze lo telefonn, anvoy mesaz, bwar ouswa manze pandan progranm.
4. Dan ki fason paran i kapab ed zot zanfan benefisye pandan lasanble?
4 Pandan bann lannen Saba, kan bann fanmir Izraelit ti rasanble ansanm pour ekout Lalwa pe ganny lir pandan Lafet bann Payot, zot “bann zanfan” ti avek zot ‘pour ki zot kapab ekoute e aprann.’ (Det. 31:12) Pa i vreman ankourazan pour vwar bann fanmir asiz ansanm pandan lasanble e bann zenn pa pe dormi me pe ekout atantivman! Tou le swar apre lasanble, akoz ou pa repas lo ou bann not e diskit ansanm bann pwen ki zot in apresye pandan progranm? “Sotiz i atase avek leker en garson,” savedir bann paran i devret sirvey zot zanfan enkli zot bann adolesan pandan poz midi e kot zot pe reste si zot in vwayaze, olye ‘les zot san en kontrol.’—Prov. 22:15; 29:15.
5. Ki mannyer nou bon kondwit kot bann lotel i kapab rann temwannyaz lo laverite?
5 Nou bon kondwit i rann temwannyaz lo laverite: Nou bon kondwit kot lasal lasanble i rann temwannyaz lo laverite. (Tit 2:10) Bann travayer lotel i remarke kan en group i obeir bann regleman lotel e demontre pasyans ek ladouser anver bann staf sa lotel. (Kol. 4:6) Kan bann reprezantan en biro brans ti pe fer negosyasyon avek direkter en lotel lannen pase, sa direkter ti dir zot: “Nou kontan pour annan zot avek nou akoz zot bann dimoun zantiy. Zot annan bon konportman, zot amikal e zot touzour annan respe pour bann staf ek sa landrwa li menm.”
6. Dan ki fason lafason ki nou sanze i annan lefe lo laverite?
6 Kan nou met nou badz lasanble, i pa zis en fason pour fer lezot vwar e permet lezot delege idantifye nou, me i donn en temwannyaz pour bann ki pe gete. Bann dimoun ki pase pou vwar ki sa bann ki’n met en badz lasanble i sanz dan en fason respektab e byen. Zot pa pe met bann lenz provokan ouswa debraye parey sa lemonn. (1 Tim. 2:9, 10) Alor, nou devret vey byen nou laparans ek resanz kan nou dan landrwa lasanble, e osi kan nou pe al reste dan en landrwa lwe. Si nou ariv kot lotel dan kannson kourt ek triko, sa pa pou donn en bon temwannyaz. Ki swa lasanble i ganny fer dan en landrwa fermen ouswa oplenner, nou lenz i devret respektab. Si nou deside sanz nou lenz pour al restoran apre ki progranm lasanble in terminen, nou pa devret oubliye ki nou ankor bann delege lasanble e nou pa devret met en lenz ki devergonde.
7. Nonm en fason ki nou demontre linite Kretyen pandan lasanble.
7 Pandan bann rasanbleman tou le-z-an, bann Izraelit ti apresye lasosyasyon ankourazan avek lezot adorater Zeova sorti dan lezot nasyon e dan lemonn e sa ti promot linite. (Akt 2:1, 5) Diran nou bann lasanble distrik, sa linite ki annan parmi nou i vreman evidan. Bann dimoun ki pe get nou i souvan apresye sa zoli laspe nou paradi spirityel. (Ps. 133:1) Olye kit landrwa pandan poz midi pour al aste manze, pa i pou pli bon pour anmenn en pti manze senp avek nou e profit lokazyon pour zwenn e koz avek bann frer ek ser ki’n vin lasanble!
8. Akoz i bon port nou volonter pour ede avan oubyen apre lasanble si nou sirkonstans i permet nou?
8 Bann dimoun ki obzerv nou i souvan enpresyonnen par sa fason byen organize ek lord ki nou lasanble i deroule, sirtou kan zot aprann ki bann volonter ki’n fer tou sa bann louvraz. Eski ou pare pour ‘ofer ou lekor volonterman’ pour ede dan preparasyon lasal lasanble? (Ps. 110:3) Souvan bann fanmir antye i ede volonterman e sa i en bon formasyon pour bann zanfan ed lezot. Si ou en dimoun ki timid, kan ou ede kot lasal lasanble ou pou ganny sa sans pour ou zwenn lezot frer ek ser dan lezot kongregasyon. En ser ti dir: “Apard mon fanmir ek detrwa zanmi, mon pa ti konn bokou dimoun laba. Me kan mon ti ede avek netwayaz, mon ti zwenn bokou frer ek ser. I ti vreman gou!” Nou pou ganny en kantite lazwa kan nou ede kot lasanble si nou fer zanmi avek lezot. (2 Kor. 6:12, 13) Si ou pa’n deza ede, demann bann ansyen ki ou kapab fer pour ede.
9. Ki mannyer nou pou envit lezot pour asiste lasanble?
9 Envit lezot pour vin ekout laverite: Parey bann lannen presedan, trwa semenn avan lasanble i konmanse, nou pou partisip dan en kanpanny pour envit lezot dimoun pour asiste. I byen pour bann kongregasyon kouver otan teritwar ki zot kapab avek sa lenvitasyon. (Vwar bwat “Konman nou pou ofer sa lenvitasyon?”) Bann lenvitasyon ki reste i devret ganny anmennen kot lasal lasanble. I pou ganny servi par bann Temwen menm pour envit bann dimoun ki pe pase dan zalantour lasal lasanble.
10. Rakont bann leksperyans ki montre ki sa kanpanny ki nou fer tou le-z-an i anmenn bon rezilta.
10 Ki reaksyon bann dimoun ler nou envit zot lasanble? Diran en lasanble, en manm servis lakey ti ed en koup pour trouv en plas asize. Zot ti dir sa frer ki zot ti’n ganny en lenvitasyon e “zot ti vwar li enteresan.” Zot ti dray 320 kilomet zis pour zot asiste sa lasanble. En lot leksperyans, en ser ki ti pe al portanport ti donn en lenvitasyon avek en msye ki ti paret enterese avek sa lasanble. Alor, sa ser ti pran letan pour koz lo sa lenvitasyon avek li. Detrwa zour pli tar dan lasanble, sa ser ti zwenn sa zonm avek enn son zanmi e sakenn ti annan enn nou bann nouvo piblikasyon avek zot.
11. Akoz i enportan pour asiste lasanble distrik tou le-z-an?
11 Bann lafet tou le-z-an ti en provizyon sorti kot Zeova pour ed bann Izraelit pour “servi li dan en fason san defo e dan laverite.” (Zoz. 24:14) Pareyman, ler nou asiste lasanble distrik tou le-z-an, sa i ed nou pour kontinyen “mars dan laverite” e i en parti enportan dan nou ladorasyon. (3 Zan 3, NW) Ki Zeova i beni zefor tou sa bann ki kontan laverite, ki asiste e benefisye plennman avek sa laranzman!
[Ekstre paz 4]
Nou bon kondwit i rann temwannyaz lo laverite
[Ekstre on paz 5]
Trwa semenn avan lasanble i konmanse, nou pou partisip dan en kanpanny pour envit lezot dimoun pour asiste
[Bwat lo paz 3-6]
Bann rapel pour Lasanble Distrik 2012
◼ Ler progranm: Progranm pou konmans 9:20 bomaten tou le trwa zour. Laport pou ouver 8:00 bomaten. Kan tyermenn i entrodwir progranm mizikal, tou dimoun i devret dan zot plas pour ki progranm i kapab konmans dan en fason apropriye. Vandredi ek Sanmdi progranm pou fini 4:55 apremidi e Dimans i pou fini 3:40 apremidi.
◼ Plas asize: Ou kapab anmas plas zis pour bann ki’n vin avek ou dan menm transpor oubyen ki reste avek ou. Ou osi kapab anmas plas pour ou etidyan Labib.—1 Kor. 13:5.
◼ Dezennen: Silvouple anmenn zot dezennen olye kit landrwa lasanble pour al rod manze pandan poz midi. Ou kapab servi en pti bwat ki pa pran tro bokou plas. Bann gro bwat manze ek okenn keksoz an ver pa devret ganny anmennen kot lasal lasanble.
◼ Kontribisyon: Nou kapab demontre nou lapresyasyon ler nou fer bann kontribisyon volonter pour sa travay mondyal kot lasanble. Bann tyek i devret ganny adrese lo “Association of Jehovah’s Witnesses.”
◼ Aksidan ek ka irzan: Si i annan en ka irzan ki arive kot landrwa lasanble, silvouple vwar en manm servis lakey ki kapab enform Premye Swen toudswit pour ki bann ki kalifye i kapab vwar sa sityasyon e donn lasistans. Si i neseser, bann ki responsab pou telefonn 999. Sa pou evite ki bann landrwa konsernen i resevwar en kantite koudtelefonn.
◼ Latizann: Si ou bezwen pran okenn latizann ki’n ganny preskri par dokter, silvouple fer sir ki ou anmenn lakantite ki ou pou bezwen avek ou vi ki i pou napa kot lasal lasanble. Bann pikir ek sereng pour bann dyabetik pa devret ganny mete dan bann plastik bin otour lasanble, me plito dan en landrwa apropriye kot i pa prezant en danze pour personn.
◼ Soulye: Tou le lannen i annan bann aksidan ki arive akoz kalite soulye ki nou mete. I pli bon pour swazir bann soulye konfortab e apropriye ki pou permet en dimoun mont dan peron, mars dan bann landrwa kot i annan bann griy par lao bann trou oubyen rigol ek lezot ankor san ganny okenn dimal.
◼ Pous pti baba ek fotey: Pous pti baba ek fotey pa devret ganny anmennen kot lasanble pou ganny fer. Par kont, bann sez pti baba ki kapab ganny atase lo en sez o bor son paran i akseptab.
◼ Lesans: Laplipar lasanble i ganny fer dan bann landrwa fermen kot nou depan lo erkonn. Alor, i pou en siny labonte si nou pa met bokou lesans for ki kapab fer ditor bann ki annan problenm respiratwar oubyen lezot problenm parey. —1 Kor. 10:24.
◼ Bann form Please Follow Up (S-43): Ou devret servi en form Please Follow Up pour donn lenformasyon konsernan okenn dimoun ki montre lentere atraver temwannyaz enformel pandan lasanble. Bann proklanmater i kapab anmenn enn de sa form avek zot kot lasanble. Bann form ki’n ganny ranpli i devret ganny donnen avek sekreter kongregasyon apre lasanble.—Vwar Nou Minister Rwayonm Me 2011 lo paz 5.
◼ Restoran: Onor non Zeova atraver ou bon kondwit dan bann restoran. Ou kapab kit en pti larzan pour sa servez.
◼ Servis volonter: Si en dimoun i anvi ede i devret fer konnen bann frer ki responsab kot lasanble. Bann zanfan anba 16 an i kapab partisipe si zot vin avek enn zot paran oubyen en dimoun ki zot paran in met responsab zot.
[Bwat lo paz 6]
Konman nou pou ofer sa lenvitasyon?
Pour arive kouver nou teritwar antye, i pli bon nou fer en prezantasyon bref. Petet nou kapab dir: “Bonzour. Nou pe partisip dan en kanpanny mondyal pour distribye sa lenvitasyon. Sa i ou kopi. Ou pou vwar plis lenformasyon lo sa lenvitasyon.” Ofer sa lenvitasyon avek lantouzyasm. Kan ou pe partisip dan kanpanny pandan wikenn, ou kapab ofer bann magazin kan i apropriye.