“Zot devre annan bonn kondwit parmi bann payen”
1. Akoz i enportan ki nou gard en bon kondwit pandan sa prosen lasanble distrik?
1 Pandan nou bann lasanble sak lannen, nou atir latansyon piblik lo nou alor i enportan ki par nou kondwit nou reflekte sa Bondye ki nou adore. (Lev. 20:26) Nou bon konportman ensi ki nou labiyman ek laparans i devret klerman idantifye nou konman bann vre disip Kris. Anmezir nou asiste sa prosen lasanble distrik oubyen enternasyonal, ki mannyer nou kapab “annan bonn kondwit parmi bann payen” e glorifye nou Papa dan lesyel?—1 Pyer 2:12.
2. Ki loportinite nou annan pour demontre personnalite Kretyen pandan sa lasanble?
2 Demontre personnalite Kretyen: Sa lanmour ki nou demontre anver lezot e lafason ki nou reazir avek “bann non-krwaryan” i devret vreman diferan avek lafason ki dimoun dan lemonn i tret kanmarad. (Kol. 3:10; 4:5; 2 Tim. 3:1-5) Nou devret zantiy e pasyan anver bann dimoun ki nou zwenn an deor lasanble parey kot restoran oubyen lotel menm si en problenm i leve. Bon konportman i osi enkli donn sa travayer en pti tip pour servis ki zot rann nou.
3. Ki rapel ki paran i gannyen e akoz?
3 Paran i devret vey byen zot zanfan kot lasanble, restoran e dan lotel. (Prov. 29:15) Manedyer en lotel ti dir avek en koup: “Nou kontan zot. Ou fanmir ek ou zanfan i annan en bon konportman e zot zantiy e poli. Tou bann travayer pe koz lo zot e nou ti a swete ki zot reste isi tou le wikenn.”
4. Ki mannyer nou laparans i devret ete pandan lasanble?
4 Sanz dan en fason respektab: Nou lenz pour lasanble i devret apropriye e respektab e i pa devret reflekte lanmod egzazere sa lemonn. (1 Tim. 2:9) Menm ler nou al lotel, pandan letan lwazir avan e apre lasanble, nou devret evite met bann lenz ki tro devergonde oubyen ki parey lenz lakour. Alor, nou pou fyer pour met nou badz lasanble partou kot nou ale e nou pa pou kanmi pour rann en temwannyaz kan nou ganny en loportinite. Nou laparans ek bon kondwit ler nou pe asiste sa prosen lasanble pa pou zis atir bann dimoun ki annan en leker senser ver mesaz Labib me i pou osi fer Zeova plezir.—Tsef. 3:17.
[Bwat lo paz 2-5]
Bann rapel pour lasanble 2014
◼ Ler progranm: Laport pou ouver 8 er bomaten tou le trwa zour. Progranm mizikal pou konmans 9:20 bomaten tou le trwa zour. A sa moman, nou tou nou devret al dan nou plas pour ki progranm i kapab konmans dan en fason annord. Kantik ek lapriyer final pou ganny fer 4:55 apre midi Vandredi ek Sanmdi, e Dimans i pou fini 3:50.
◼ Plas asize: Kan laport i ouver tou le bomaten, silvouple pa taye pour al pran ou plas ki ou plifere konmsi ou pe fer paryaz avek lezot. En lespri sakrifis ki pous nou pour rod sa ki bon pour lezot i idantifye nou konman bann vre Kretyen e pous bann ki pe obzerv nou pour loue Bondye. (Zan 13:34, 35; 1 Kor. 13:4, 5; 1 Pyer 2:12) Ou kapab anmas plas zis pour bann ki’n vin avek ou dan menm transpor oubyen ki reste avek ou. Ou osi kapab anmas plas pour ou etidyan Labib. Vi ki lakantite sit ki ganny rezerve pour bann frer ek ser aze oubyen ki annan dezabilite i limite, i pa pou toultan posib pour tou zot fanmir asiz avek zot. Alor, silvouple kit sa bann sit pour bann ki bezwen oubyen bann ki asiste zot.
◼ Dezennen: Silvouple anmenn zot dezennen olye kit landrwa lasanble pour al rod manze pandan poz midi. Ou kapab servi en pti bwat ki pa pran tro bokou plas. Bann gro bwat manze ek okenn keksoz an ver pa devret ganny anmennen kot lasal lasanble.
◼ Kontribisyon: Nou kapab demontre nou lapresyasyon ler nou fer bann kontribisyon volonter kot lasanble pour sa travay mondyal. Bann tyek i devret ganny adrese lo “Association of Jehovah’s Witnesses.”
◼ Latizann: Si ou bezwen pran okenn latizann ki’n ganny preskri par dokter, silvouple fer sir ki ou anmenn lakantite ki ou pou bezwen avek ou vi ki i pou napa kot lasal lasanble. Bann pikir ek sereng pour bann dyabetik pa devret ganny mete dan bann plastik bin otour lasanble, me plito dan en landrwa apropriye kot i pa prezant en danze pour personn.
◼ Sekirite: Silvouple gard byen antet pour evit bann domaz ki kapab arive par glise e tap ou lipye avek en keksoz. Tou le lannen i annan bann aksidan ki arive akoz kalite soulye ki nou mete. I pli bon pour swazir bann soulye konfortab e apropriye ki pou permet en dimoun mont dan peron, mars dan bann landrwa kot i annan bann griy par lao bann trou oubyen rigol ek lezot ankor san ganny okenn dimal.
◼ Pous pti baba ek fotey: Pous pti baba ek fotey pa devret ganny anmennen kot lasanble pou ganny fer. Par kont, bann sez pti baba ki kapab ganny atase lo en sez o bor son paran i akseptab.
◼ Lesans: Laplipar lasanble i ganny fer dan bann landrwa fermen kot nou depan lo erkonn. Alor, i pou en siny labonte si nou pa met bokou lesans for ki kapab fer ditor bann ki annan problenm respiratwar oubyen lezot problenm parey.—1 Kor. 10:24.
◼ Bann form Please Follow Up (S-43): Ou devret servi en form Please Follow Up pour donn lenformasyon konsernan okenn dimoun ki montre lentere atraver temwannyaz enformel pandan lasanble. Bann form ki’n ganny ranpli i devret ganny donnen avek sekreter kongregasyon apre lasanble.
◼ Restoran: Onor non Zeova atraver ou bon kondwit dan bann restoran. Sanz dan en fason ki demontre ki ou en Kretyen. Ou kapab kit en pti larzan pour sa servez.
◼ Servis volonter: Si en dimoun i anvi volonter i devret fer konnen bann frer ki responsab kot lasanble. Bann zanfan anba 16 an i kapab partisipe si zot vin avek enn zot paran oubyen en dimoun ki zot paran in met responsab zot.