Bann rapel pour lasanble
Ler progranm: Laport pou ouver 8 er bomaten tou le trwa zour. Progranm mizikal pou konmans 9:20 bomaten tou le trwa zour. A sa moman, nou tou nou devret al dan nou plas pour ki progranm i kapab konmans dan en fason annord. Progranm pou fini ver 5:00 apre midi Vandredi ek Sanmdi e Dimans i pou fini 4:00.
‘Sant kantik pour loue Zeova’: Pep Bondye dan lepase ti loue Zeova avek kantik e ozordi lanmizik i ankor en keksoz enportan dan vre ladorasyon. (Ps. 28:7) Sak sesyon nou lasanble rezyonal trwa zour i konmans avek lanmizik. Sa i pa zis en pti lanmizik lanbyans me i’n ganny prepare pour ki nou kapab aprann lo Zeova e ador li. Alor, kan tyermenn i dir ki lanmizik pe al konmanse, la i lemoman pour nou asize e ekout avek lapresyasyon sa lanmizik dan plas kontinyen koze. Par fer sa nou montre ki nou apresye bann zefor ki bann ki dan Watchtower orchestra in fer. De fwa par an, sa bann frer ek ser i pey zot prop vwayaz pour vin Patterson, New York, pour zwe sa bann zoli lanmizik pour nou. Apre ki nou’n ekout atantivman sa lanmizik, tou dimoun i devret zwenn lavwa ansanm pour loue Zeova par sant bann kantik Rwayonm.
Plas asize: Kan laport i ouver tou le bomaten, silvouple pa taye pour al pran ou plas ki ou plifere konmsi ou pe fer paryaz avek lezot. Silvouple pran konsiderasyon pour lezot e menm pare pour sakrifye ou plas prefere pour byennet ou bann frer ek ser. En lespri sakrifis ki pous nou pour rod sa ki bon pour lezot i idantifye nou konman bann vre Kretyen e pous bann ki pe obzerv nou pour loue Bondye. (Zan 13:34, 35; 1 Kor. 13:4, 5; 1 Pyer 2:12) Ou kapab anmas plas zis pour bann ki’n vin avek ou dan menm transpor oubyen ki reste avek ou. Ou osi kapab anmas plas pour ou bann etidyan Labib. Silvouple pa met okenn keksoz lo plas asize ki ou pa pe rezerve. Ou korperasyon dan sa laspe pou permet lezot vwar bann plas asize ki vid. Bann plas spesyal pour bann aze ek bann ki annan dezabilite in ganny rezerve. Vi ki lakantite sa bann plas asize i limite, zis enn oubyen de dimoun ki pe asiste sa enn aze oubyen ki annan dezabilite ki kapab asiz avek zot.
Sanz dan en fason respektab: Nou lenz pour lasanble i devret apropriye e respektab e i pa devret reflekte lanmod egzazere sa lemonn. (1 Tim. 2:9) Menm ler nou al lotel, pandan letan lwazir avan e apre lasanble, nou devret evite met bann lenz ki tro devergonde oubyen ki parey lenz lakour. Alor, nou pou fyer pour met nou badz lasanble partou kot nou ale e nou pa pou kanmi pour rann en temwannyaz kan nou ganny en loportinite. Nou laparans ek bon kondwit ler nou pe asiste sa prosen lasanble pa pou zis atir bann dimoun ki annan en leker senser ver mesaz Labib me i pou osi fer Zeova plezir.—Tsef. 3:17.
Servi byen bann lekipman elektronik: Nou demontre lapolites pandan progranm par aziste nou mobayl oubyen lezot lekipman elektronik dan en fason ki i pa pou deranz lezot. Sirman nou anvi pran konsiderasyon pour lezot, alor si nou pe servi kamera, video recorder, tablet oubyen lezot lekipman elektronik, nou pa pou deranz lezot oubyen bar zot. Nou osi demontre lapolites ler nou evite teks oubyen anvoy imel ki pa neseser pandan progranm.
Dezennen: Silvouple anmenn zot dezennen olye kit landrwa lasanble pour al rod manze pandan poz midi. Ou kapab servi en pti sak ki pa pran tro bokou plas. Bann gro sak manze ek okenn keksoz an ver pa devret ganny anmennen kot lasal lasanble.
Kontribisyon: Nou kapab demontre nou lapresyasyon ler nou fer bann kontribisyon volonter pour sa travay mondyal kot lasanble. Bann tyek i devret ganny adrese lo “Association of Jehovah’s Witnesses.”
Latizann: Si ou bezwen pran okenn latizann ki’n ganny preskri par dokter, silvouple fer sir ki ou anmenn lakantite ki ou pou bezwen avek ou vi ki i pou napa kot lasal lasanble. Bann pikir ek sereng pour bann dyabetik pa devret ganny mete dan bann plastik bin otour lasanble, me plito dan en landrwa apropriye kot i pa prezant en danze pour personn.
Sekirite: Silvouple gard byen antet pour evit bann domaz ki kapab arive par glise e tap ou lipye avek en keksoz. Tou le lannen i annan bann aksidan ki arive akoz kalite soulye ki nou mete, sirtou soulye talon o. I pli bon pour swazir bann soulye konfortab e apropriye ki pou permet en dimoun mont dan peron, mars dan bann landrwa kot i annan bann griy par lao bann trou oubyen rigol ek lezot ankor san ganny okenn dimal.
Pous pti baba ek fotey: Pous pti baba ek fotey pa devret ganny anmennen kot lasanble. Par kont, bann sez pti baba ki kapab ganny atase lo en sez o bor son paran i akseptab.
Lesans: Laplipar lasanble i ganny fer dan bann landrwa fermen kot nou depan lo erkonn. Alor, i pou en siny labonte si nou pa met bokou lesans for ki kapab fer ditor bann ki annan problenm respiratwar oubyen lezot problenm parey.—1 Kor. 10:24.
Bann form Please Follow Up (S-43): Ou devret servi en form Please Follow Up pour donn lenformasyon konsernan okenn dimoun ki montre lentere atraver temwannyaz enformel pandan lasanble. Bann form ki’n ganny ranpli i devret ganny donnen avek sekreter kongregasyon apre lasanble.
Restoran: Onor non Zeova atraver ou bon kondwit dan bann restoran. Abiy dan en fason ki apropriye pour en Kretyen. Ou kapab kit en pti larzan pour sa servez.
Servis volonter: Si en dimoun i anvi volonter i devret fer konnen bann frer ki responsab kot lasanble. Bann zanfan anba 16 an i kapab partisipe si zot vin avek enn zot paran oubyen en dimoun ki zot paran in met responsab zot.