Swiv Kris par demontre Dinite
1. Ki mannyer tenm lasanble sa lannen i relye avek demontre dinite?
1 Labib i dekrir Souvren Liniver, Zeova, konman sa enn ki ranpli avek dinite. (Ps. 104:1) Zezi ti toultan koz e azir dan en fason ki ti onor son Papa ek Son bann laranzman. (Zan 17:4) Nou tou nou pou ganny plizyer loportinite pour imit legzanp Zezi e glorifye Zeova pandan nou Lasanble Distrik, “Swiv Kris!”
2. Ki mannyer preparasyon ki nou fer pour ki nou prezan pour sak sesyon i onor Zeova?
2 En Ladorasyon respektab: Nou kapab onor Zeova par fer laranzman pour nou prezan pour sa festen spirityel ki i’n prepare pour nou. Eski ou’n koz avek ou anplwayer e fer laranzman pour asiste sak zour lasanble enkli, Vandredi? Eski ou’n fer plan pour ariv ase boner pour rod en landrwa asize e prezan pour konmansman kantik ek lapriyer? Eski ou’n fer laranzman pour ou dezennen, pour ki ou kapab manz kot landrwa lasanble avek ou bann frer ek ser? Konmansman sak sesyon, avan lanmizik i konmanse e tyermenn i envit nou pour pran nou plas, deswit nou devret aret koze e pran nou plas pour progranm konmanse.
3. Ki mannyer ler nou ekout byen atantivman progranm lasanble i montre ki nou respe nou ladorasyon?
3 Nou pou osi onor Zeova ler nou ekout byen atantivman progranm lasanble. Apre ki en zournalis ti’n obzerv en lasanble distrik dan en pei, i ti ekri ki bann ki ti pe gete ti enpresyonnen par “kondwit egzanpler bann ki ti prezan, ki ti pe swiv sa ki ti pe ganny dir dan en fason respektab e trankil e ki montre zot enterese avek bann keksoz spirityel.” I ti osi fer komanter lo “lakantite zanfan ki ti prezan . . . , e sa ki i ti vwar remarkab se ki zot tou ti byen konport zot e menm zot ti byen okipe pe rod bann verse dan Labib.” Pandan ki progranm lasanble pe deroule, i pa letan pour koz lo bann keksoz ki pa neseser, anvoy mesaz par telefonn mobil, manze, oubyen ale vini an deor lasal lasanble. Bann zenn i devret asiz avek zot paran pour ki zot paran i kapab ed zot pour benefisye avek progranm. (Det. 31:12; Prov. 29:15) Ler nou fer sa nou pe montre respe pour lezot ek lapresyasyon pour sa nouritir spirityel byen enportan ki pe ganny donnen.
4. Akoz nou devret annan en laparans respektab kot lasanble?
4 Laparans respektab: Bokou dimoun ti eksprim zot lapresyasyon pour bann rapel dan sa diskour “Toultan Demontre dinite konman Kretyen,” dan lasanble distrik lannen pase. Sa diskour ti met lanfaz lo lenportans pour bann serviter Bondye fer bokou zefor pour demontre dinite konman Kretyen dan zot fason sanze e zot laparans fizik. Sa lannen osi, nou devret seryezman vey nou fason sanze ek nou laparans fizik. Nou laparans i reflekte nou santiman pour Zeova e pour sa privilez konman son bann Temwen. Nou devret toultan sanz konman sa bann “ki annan en gran respe pour Bondye.”—1 Tim. 2:9, 10, NW.
5. Ki bon rezilta nou gannyen ler nou demontre dinite Kretyen?
5 Rezilta satisfezan: Ler nou demontre dinite konman Kretyen kot nou bann lasanble sa i kree bann loportinite pour donn en temwannyaz enformel e dimoun ki vwar nou pou annan en bon pwennvi lo nou. Alafen en lasanble, en sekirite ti fer sa remark: “Nou pa’n zanmen vwar dimoun ki konport zot sitan byen koumsa. Se sa fason ki Bondye i ekspekte nou pour ete.” Ler nou demontre dinite sa i montre ki nou annan respe ek lanmour pour kanmarad e sa i glorifye Zeova. (1 Pyer 2:12) I montre ki nou annan lakrent pour Bondye e ki nou apresye sa privilez pour nou ganny enstri par nou Papa. (Ebr. 12:28) Annou fer bokou zefor pour demontre dinite anmezir ki nou esper Lasanble Distrik, “Swiv Kris!” pour sa lannen avek enpasyans.