Kontinyen esper Zeova
1. Ki tenm lasanble, e akoz i apropriye?
1 Izai ti ekrir ki Zeova i en Ziz. I ti osi dir: “Ere tou bann ki pe kontinyen esper li.” (Iza. 30:18b) Bokou resi dan Labib i rakont zizman Bondye lo son bann lennmi e kot i sov son bann serviter fidel. Ki leson sa bann resi i ansenny bann adorater Zeova ozordi? Ki nou bezwen fer la konmela pour prepar nou pour “sa gran zour efreyan Zeova”? (Yoel 2:31, 32) Nou Lasanble Distrik “Delivrans i pros!” ki pe vini pou pous nou pour reflesir lo sa bann kestyon e pour egzamin nou lekor. I pou osi ed nou pour kontinyen esper Zeova.
2. Ki mannyer nou kapab montre lapresyasyon pour nou lasanble distrik?
2 Eski ou’n fer laranzman pour asiste e benefisye pandan sa trwa zour lasanble? Par egzanp, eski ou’n apros ou anplwayer pour demann konze? Pa ekspekte ki sa pou arive zis par azar. Priy lo sa size. Apre demande. (Nee. 2:4, 5) Pareyman, nou pa devret tarde pour fer bann laranzman transpor, landrwa reste, ek lezot keksoz enportan. Ler nou fer en bon plan sa pou demontre nou gran lapresyasyon pour latab spirityel Zeova. Bann ansyen i devret pare pour ed bann ki bezwen led pour asiste lasanble, sirtou bann aze dan kongregasyon.—Gal. 6:10.
3. Ki bann kalite pep Zeova i devret demontre kot landrwa lasanble?
3 Bon Kondwit i onor Bondye: Ler nou’n rasanble an gran kantite dan bann lasanble, nou bon kondwit i en temwannyaz pour kominote. Ki nou bezwen fer? Ler nou kot lotel, dan restoran, oubyen dan bann landrwa biznes ki pros avek landrwa lasanble, bann dimoun ki nou rankontre pou ganny touse par bann kalite Kretyen ki nou demontre, parey pasyans, ladouser, kontrol lo nou lekor, e osi si nou rezonnab. (Gal. 5:22, 23; Fili. 4:5) Nou tou nou devret demontre sa kalite lanmour ki “pa fer nanryen ki fer onte. Lanmour [ki] pa rod son prop lentere; [ki] pa pran lakoler.” Menm si serten difikilte oubyen bann lenkonvenyans i arive, nou pou anvi “fer tou pour laglwar Bondye.”—1 Kor. 10:31; 13:5.
4. Ki mannyer paran i kapab ed zot zanfan pour kondwir zot dan en fason ki fer Zeova ganny loue?
4 Apre en lasanble, en manedyer lotel ti telman enpresyonnen par kondwit ek laparans nou bann zenn ki i ti dir ki i anvi “toultan annan bann Temwen Zeova konman kliyan dan son lotel.” Pa sa i fer nou zwaye! I pe montre sa bon formasyon ek sipervizyon ki zot bann paran zot in donnen. I pa pou byen si paran i les zot zanfan tousel dan en lasanm san sipervizyon. Zot devret toultan ganny byen sipervize. (Prov. 29:15) Fotespere ki zot bon kondwit i fer Zeova ganny loue e fer son leker rezwir!—Prov. 27:11.
5. Ki mannyer nou kapab onor Zeova par nou fason sanze ek laparans fizik?
5 Fason sanze ek Laparans fizik: Nou tou nou kapab kontribye pour donn en bon lenpresyon par evit bann stil sanze ek laparans ki pe swiv lanmod, ki pa apropriye, endesan, oubyen tro ekstravagan. Sa i aplik ler nou pe vwayaze pour vin kot landrwa lasanble e ler nou pe retournen, ler nou pe ede pour prepar landrwa lasanble, e ler nou pe asiste bann sesyon. Konman bann serviter Bondye, non Zeova ek son repitasyon i nou premye konsern, non pa nou preferans ek konfor personnel. Bann sef fanmiy i annan sa responsabilite pour fer sir ki laparans zot fanmiy i toultan respektab e konvenab.—1 Tim. 2:9.
6. Akoz pandan moman lwazir nou devret gard sa menm laparans ki nou annan dan bann sesyon lasanble?
6 I osi enportan pour annan en laparans respektab pandan bann moman lwazir kot lotel, dan laboutik, e osi dan restoran. I apropriye ki nou gard nou lenz lasanble si nou al manze apre bann sesyon lasanble. Ler nou met nou badz lasanble, i kapab donn nou loportinite pour donn temwannyaz enformel.—2 Kor. 6:3, 4.
7. Ki mannyer nou kapab kontribye pour annan lord ek lazwa dan sa lasanble? (Vwar “Bann Rapel pour Lasanble Distrik.”)
7 Izai ti predir: “Zeova pou kontinyen espere pour demontre zot faver, e pour sa rezon i pou leve pour demontre zot mizerikord.” (Iza. 30:18a) Rekonesans pour mizerikord ek labonte ki Zeova i demontre i devret pous nou pour onor li par nou kondwit ek laparans ler nou rasanble ansanm dan nou bann lasanble. Fotespere ki sa Lasanble Distrik “Delivrans i pros” i glorifye nou Bondye e i ed nou pour kontinyen esper li!
[bwat lo paz 5]
Bann Rapel pour Lasanble Distrik
◼ Ler Progranm: Progranm pou konmans 9:30 er bomaten tou le trwa zour. Laport pou ouver depi 8:00 er bomaten. Tyermenn pou asiz lo lestrad ennde minit avan sesyon i konmanse pandan ki bann kantik Rwayonm i ganny zwe. Tou dimoun i devret pran plas pour ki progranm i kapab konmans dan en fason respektab. Progranm pou fini 5:15 Vandredi, 5:05 Sanmdi, e 4:10 Dimans.
◼ Plas asize: Ou kapab anmas plas zis pour bann ki’n vin avek ou dan menm transpor oubyen ki viv avek ou dan menm lakour.
◼ Dezennen: Silvouple anmenn zot dezennen olye kit landrwa lasanble pour al rod manze pandan poz midi. Ou kapab servi en pti bwat (icebox) ki pa pran tro bokou plas. Bann gro bwat (icebox), sopin, ek labwason alkolik pa devret ganny anmennen kot lasanble.
◼ Kontribisyon: En gran kantite depans i ganny fer pour organiz en lasanble distrik. Nou kapab montre nou lapresyasyon ler nou fer bann kontribisyon volonter pour sa travay mondyal dan nou Lasal Rwayonm oubyen kot lasanble. Okenn tyek ki ganny mete kot lasanble i devret ganny adrese lo “Association of Jehovah’s Witnesses.”
◼ Aksidan ek Ka Irzans: Dan serten pei, bann landrwa konsernen in fer konplent ki zot ganny en kantite kou-d-telefonn konsernan bann ka ki pa tro serye. Si annan en ka ki arive kot landrwa lasanble, silvouple vwar en manm servis lakey, ki kapab enform Premye Swen toudswit pour ki bann ki kalifye i kapab vwar sa sitiasyon e donn lasistans. Si i neseser, nou kapab telefonn 999.
◼ Lanrezistreman: Okenn lenstriman rikorde pa devret ganny konnekte avek sistenm elektrik oubyen sistenm son sa landrwa. Zot devret ganny servi dan en fason ki pa pour deranz lezot.
◼ Tir Portre: Si ou tir portre, ou pa devret servi flas pandan bann sesyon.
◼ Telefonn mobil: Zot devret ganny regle pour pa deranz lezot.
◼ Lesans: Laplipar lasanble i aprezan ganny fer dan bann landrwa fermen kot nou depan lo erkonn. Alor, i pou en siny labonte si nou pa met bokou lesans for ki kapab fer ditor bann ki annan problenm respiratwar oubyen lezot problenm parey.—1 Kor. 10:24.
◼ Form Follow-Up: Ou devret servi en form Please Follow Up (S-43) pour donn lenformasyon konsernan okenn dimoun ki montre lentere akoz en temwannyaz enformel pandan lasanble. Bann proklanmater i kapab anmenn ennde sa form avek zot kot lasanble. I devret osi disponib kot lasanble. Bann form ki’n ganny ranpli i devret ganny donnen avek sekreter kongregasyon apre lasanble.—Vwar Nou Minister Rwayonm Fevriye 2005, p. 6.