Loue Zeova dan sa gran Kongregasyon
1, 2. Ki loportinite lasanble distrik i donn nou, e dan ki fason nou kapab fer sa?
1 Nou bann lasanble distrik sak lannen i donn nou en loportinite merveye pour glorifye Zeova. Nou santi parey David, ki ti sante: “Mon pou loue ou dan sa gran kongregasyon; mon pou loue ou parmi en kantite dimoun.” (Ps. 35:18) Dan Lasanble Distrik “Lobeisans anver Bondye” ki pe aprose, ki mannyer nou kapab asire ki konman en pep ini, nou fer Zeova ganny loue?
2 En fason ki nou kapab fer sa i atraver nou kondwit. Ladministrasyon en landrwa kot i fer lasanble ti dir: “Baze lo zot bann lasanble, nou ti dir avek lezot group relizye ki anvi lwe sa landrwa pour vin gete ki mannyer Temwen Zeova i organiz en lasanble, akoz zot fer en laranzman parfe.” Par nou laparans, korperasyon, ek kondwit, nou tou nou kontribye pour fer nou Bondye ki merite, ganny bann tel louanz.—1 Pyer 2:12.
3, 4. Ki mannyer ler nou modes i pou ed nou sanz dan en fason ki apropriye pour bann minis Kretyen ler nou dan lasanble e apre bann sesyon?
3 Nou Laparans fizik: Pour sanz e abiy dan en fason ki fer Zeova ganny loue fodre ki nou modes. (1 Tim. 2:9) Liv Lekol Minister paz 132, i dir: “En dimoun ki modes i vwar li enportan pour pa ofans lezot pour en rezon initil e atir latansyon ki pa neseser lo li menm.” Dan bokou pei, bann lenz endesan i partou. Me Zeova i apresye zefor ki nou fer pour byen reprezant li. (Akt 15:14) Menm si lasanble i ganny fer dan en sant sport oubyen dan en fasilite rekreasyonnel, sa rasanbleman i vin nou “gran kongregasyon” pandan sa trwa zour lasanble. Alor, ler nou rasanble devan Zeova, nou devret sanz avek dinite ki loue sa pli gran Personnaz dan liniver.—1 Kron. 29:11.
4 Nou bezwen osi port latansyon lo nou laparans apre sesyon sak zour. Menm si nou anvi met bann lenz pli konfortab pandan moman lwazir oubyen ler nou pe al manz dan en restoran, i enportan ki nou lenz ek laparans i apropriye pour ‘bann dimoun ki relizye.’ (1 Tim. 2:10) I pa bann fason sanze ki popiler dan lemonn ki pou fer nou determinen ki lenz ki akseptab pour nou. (1 Zan 2:16, 17) Nou bann piblikasyon i donn legzanp konman bann zonm ek fanm i kapab sanz byen e dan en fason modes dan diferan moman. Ler nou met nou badz lasanble pandan ki nou dan sa landrwa kot lasanble pe ganny fer, i pou fer nou rapel ki nou bann minis Kretyen dan tou moman.—2 Kor. 6:3, 4.
5, 6. Konman nou kapab montre respe pour latab spirityel Zeova?
5 Respe Latab Zeova: Souvren Senyer liniver in plas devan nou en festen. (Iza. 25:6; 1 Kor. 10:21) Si nou apresye en kantite nou plas lo latab spirityel Zeova, nou pou fer sir ki nou asiste tou le trwa zour lasanble. Eski ou’n fer laranzman pour landrwa reste, transpor, ek konze dan travay? Eski ou’n met ase letan dekote pour preparasyon ek vwayaz pour ki ou kapab ariv kot landrwa lasanble ase boner pour rod plas asize, pour asosye avek ou bann frer ek ser, e pour zwenn ansanm avek zot pour loue Zeova dan kantik ek lapriyer louvertir?—Ps. 147:1.
6 Respe pour latab Zeova pou pous nou pour port bokou latansyon lo progranm e pour evite koz avek lezot san okenn rezon enportan, manze, oubyen marse dan koridor. Atraver lesklav fidel e pridan, Zeova pe donn manze spirityel ki nou bezwen la konmela. (Mat. 24:45) Nou pa devret mank okenn bout lo progranm. Paran i devret asiz avek zot zanfan e ed zot pour byen benefisye.—Det. 31:12.
7. Ki nou ganny demande pour fer pour nou dezennen, e akoz?
7 Tou dimoun i ganny demande pour anmenn zot dezennen olye kit landrwa lasanble pour al rod manze pandan poz midi. I ti byen ki laplipar dimoun ti swiv sa laranzman dan lasanble lannen pase. Pa i pou byen si tou dimoun i fer parey sa lannen! (Ebr. 13:17) Sa laranzman i donn en bon loportinite pour rezwir konpanni nou bann frer ek ser e i kontribye pour kree en latmosfer linite ek lape ki anmenn loner pour Zeova.—Ps. 133:1.
8, 9. Ki lot loportinite sa lasanble pou donn nou pour loue Zeova?
8 Temwannyaz enformel: Ler nou pe vwayaze pour vin kot landrwa lasanble e ler pe nou retournen, nou annan bokou loportinite pour loue Zeova avek nou labous. (Ebr. 13:15) Ki swa nou pe manze dan en restoran oubyen pe fer en konversasyon avek en travayer lotel, annou rod bann fason pour donn en temwannyaz. Nou lespri ek leker pou ranpli avek bann trezor spirityel ki nou’n gannyen dan lasanble. Annou partaz sa bann bon keksoz avek tou dimoun ki nou zwenn.—1 Pyer 3:15.
9 Nou esper avek enpasyans sa loportinite pour beni Zeova “parmi bann lafoul ki’n rasanble.” (Ps. 26:12) Annou ansanm dan linite loue Zeova dan sa Lasanble Distrik “Lobeisans anver Bondye.”
[Bwat lo paz 5]
Bann Rapel pour Lasanble Distrik
◼ Ler Progranm: Progranm pou konmans 9:30 bomaten tou le trwa zour. Laport pou ouver depi 8:00 bomaten. Tyermenn pou asiz lo lestrad enn de minit avan sesyon i konmanse pandan ki bann kantik Rwayonm i ganny zwe. Tou dimoun i devret pran zot plas pour ki progranm i kapab konmans dan en fason respektab. Progranm pou fini 5:05 Vandredi ek Sanmdi e 4:10 Dimans.
◼ Kontribisyon: En gran kantite depans i ganny fer pour organiz en lasanble distrik. Nou kapab montre nou lapresyasyon ler nou fer bann kontribisyon volonter pour sa travay mondyal dan nou Lasal Rwayonm oubyen kot lasanble. Okenn tyek ki ganny mete kot lasanble i devret ganny adrese lo “Association of Jehovah’s Witnesses.”
◼ Dezennen: Silvouple anmenn zot dezennen olye kit landrwa lasanble pour al rod manze pandan poz midi. Ou kapab servi en pti bwat (icebox) ki pa pran tro bokou plas. Bann gro bwat (icebox), sopin, ek labwason alkolik pa devret ganny anmennen kot lasanble.
◼ Lanrezistreman: Okenn lenstriman ki rikord keksoz pa devret ganny konnekte avek sistenm elektrik oubyen sistenm son sa landrwa. Zot devret ganny servi dan en fason ki pa pour deranz lezot.
◼ Tir Portre: Si ou tir portre, ou pa devret servi flas pandan bann sesyon.
◼ Telefonn mobil: Zot devret ganny regle pour pa koz okenn deranzman.