En lokazyon pour ganny nouri spirityelman e pour rezwir
1. Ki mannyer Zeova i pran swen avek bezwen spirityel son bann serviter?
1 Avek lanmour, Zeova i pran swen avek bezwen spirityel son bann serviter. Menm si dan sa lemonn an zeneral dimoun i mank nouritir spirityel, sirman nou, nou pe ganny byen nouri spirityelman. (Iza. 65:13) En fason ki Zeova pe nouri nou spirityelman se atraver nou bann lasanble distrik tou le-z-an. Eski ou pe fer bann preparasyon pour asiste tou bann sesyon nou Lasanble Distrik “Lespri sen i gid nou” ki pe vini? En festen spirityel ki byen apetisan e nourisan in ganny prepare.
2. Kwa ki enplike kan nou pe fer plan davans pour asiste lasanble?
2 Prepar davans: “Bann plan sa enn ki devoue i sirman anmenn lavantaz.” (Prov. 21:5) Alors, kan ou pe fer bann laranzman final pour asiste tou le trwa zour sa lasanble, pa tarde pour koz avek ou anplwayer si ou bezwen pran konze. Eski ou’n fer laranzman pour trouv landrwa reste? I byen pour fer laranzman pour anmenn ou dezennen pour ou kapab manz avek ou bann frer ek ser kot lasanble pou ganny fer. Fer laranzman pour ariv ase boner tou le trwa zour pour rod en landrwa asize e prezan pour konmans kantik ek lapriyer.
3. Ki mannyer nou fason sanze i devret ete pour sa lokazyon?
3 Annou fer sir ki nou pou sanz dan en fason modes e byen respektab. (1 Tim. 2:9, 10) Lasanble distrik i donn nou en bon loportinite pour donn en temwannyaz dan nou kominote. Par sanz dan en fason respektab e met nou badz ler nou pe vwayaze pour ariv kot lasanble pou ganny fer oubyen ler nou pe retourn kot nou, bann ki pe obzerv nou pou vwar ki nou diferan avek lezot e zot pou annan en bon pwennvi lo nou.
4. Kwa ki pou ed nou ek nou fanmir tir bokou benefis dan progranm lasanble?
4 Ekout atantivman: Sirman nou pa anvi mank ni menm en bout sa progranm ki pour ganny donnen dan sa festen spirityel. (Prov. 22:17, 18) Ler nou swiv dan nou Labib bann verse ki ganny site e pran bann not, sa pou ed nou pour gard nou latansyon lo progranm ki pe ganny donnen e evit okenn distraksyon. Pli tar kot lakour, nou kapab servi nou not pour diskit serten pwen enteresan ki’n ganny devlope dan progranm lasanble avek lezot. Tou dernyenman, nou’n obzerve ki serten zenn i asiz ansanm dan lasanble e zot koze oubyen servi telefonn mobil pour anvoy mesaz pandan ki progranm lasanble pe deroule. Si nou annan zanfan enkli bann adolesan i pou anmenn bokou byenfe si zot asiz e ekout progranm lasanble ansanm an fanmir olye ki nou les zot asiz dan en lot plas avek lezot zenn.
5. Ki nou kapab fer pour nou lasanble vin pli agreab?
5 Rezwir lasosyasyon kanmarad: Nou pli apresye en bon repa kan nou manz sa repa dan konpanni nou bann zanmi. (Prov. 15:17) Pareyman, kan nou asosye avek nou bann frer ek ser i fer li en plezir pour asiste lasanble. Alors, pandan poz midi, i pou vreman agreab pour pran linisyativ pour fer konnesans avek lezot e rezwir zot konpanni. (Ps. 133:1) Kan tyermenn i envit nou pour pran nou plas avan ki lanmizik i konmanse, nou bezwen aret koze e pran nou plas pour progranm konmanse.
6. Rakont en leksperyans personel ki montre ki mannyer nou kapab rann temwannyaz avek bann dimoun ki nou zwenn kan nou pe vwayaze avan oubyen apre lasanble.
6 Rod tou loportinite pour rann temwannyaz: Souvandfwa, bann lasanble i permet nou ganny bann bon loportinite pour rann temwannyaz. Serten ki al dan bann restoran apre lasanble, in kapab ganny bann konversasyon e rann temwannyaz avek bann travayer sa restoran ek lezot, ki poz kestyon konsernan tenm lo badz lasanble. Serten parmi bann ki ti demann kestyon ti ganny envite pour asiste sesyon lasanble e zot ti asiste.
7. Akoz nou devret asiste sa lasanble distrik ki pe vini?
7 In pran plizyer milye erdtan pour prepar progranm lasanble, lasal kot lasanble pou ganny fer e bann diskour. Tou sa travay ki’n ganny fer avek lanmour pour prepar sa festen spirityel i endike ki Zeova i pran byen swen avek son bann serviter. Fotespere ki nou tou nou pou prezan e tir bokou byenfe! Tou lekontrer avek lezot dan sa lemonn, anmezir ki nou ganny nouri spirityelman, nou pou “kriye avek lazwa akoz [nou] annan lakontantman dan [nou] leker.”—Iza. 65:14.
[Bwat lo paz 4]
Bann rapel pour Lasanble Distrik
◼ Ler progranm: Progranm pou konmans 9:20 bomaten tou le trwa zour. Laport pou ouver depi 8:00 bomaten. Tou dimoun i devret pran plas pour ki progranm i kapab konmans dan en fason respektab. Progranm pou fini 4:55 Vandredi ek Sanmdi, e 4:00 Dimans.
◼ Plas asize: Ou kapab anmas plas zis pour bann ki’n vin avek ou dan menm transpor oubyen ki viv avek ou dan menm lakour.
◼ Dezennen: Silvouple anmenn zot dezennen olye kit landrwa lasanble pour al rod manze pandan poz midi. Ou kapab servi en pti bwat (icebox) ki pa pran tro bokou plas. Bann gro bwat (icebox), sopin, ek labwason alkolik pa devret ganny anmennen kot lasanble.
◼ Kontribisyon: Nou kapab montre nou lapresyasyon ler nou fer bann kontribisyon volonter pour sa travay mondyal dan nou Lasal Rwayonm oubyen kot lasanble. Okenn tyek ki ganny mete kot lasanble i devret ganny adrese lo “Association of Jehovah’s Witnesses.”
◼ Aksidan ek ka irzans: Dan serten pei, bann landrwa konsernen in fer konplent ki zot ganny en kantite koudtelefonn konsernan bann ka ki pa tro serye. Si i annan en ka ki arive kot landrwa lasanble, silvouple vwar en manm servis lakey, ki kapab enform Premye Swen toudswit pour ki bann ki kalifye i kapab vwar sa sitiasyon e donn lasistans. Si i neseser, nou kapab telefonn lopital.
◼ Lanrezistreman: Okenn lenstriman rikorde pa devret ganny konnekte avek sistenm elektrik oubyen sistenm son sa landrwa. Zot devret ganny servi dan en fason ki pa pour deranz lezot.
◼ Tir portre: Si ou tir portre, ou pa devret servi flas pandan bann sesyon.
◼ Telefonn mobil: Zot devret ganny regle pour pa deranz lezot.
◼ Lesans: Laplipar lasanble i aprezan ganny fer dan bann landrwa fermen kot nou depan lo erkonn. Alor, i pou en siny labonte si nou pa met bokou lesans for ki kapab fer ditor bann ki annan problenm respiratwar oubyen lezot problenm parey.—1 Kor. 10:24.
◼ Pous pti baba ek fotey: Pous pti baba ek fotey ki kapab ganny ploye pa devret ganny anmennen kot lasanble pou ganny fer. Parkont, bann sez pti baba ki kapab ganny atase lo en sez obor son paran i akseptab.
◼ Form Follow-Up: Ou devret servi en form Please Follow Up (S-43) pour donn lenformasyon konsernan okenn dimoun ki montre lentere akoz en temwannyaz enformel pandan lasanble. Bann proklanmater i kapab anmenn enn de sa form avek zot kot lasanble. I devret osi disponib kot lasanble. Bann form ki’n ganny ranpli i devret ganny donnen avek sekreter kongregasyon apre lasanble.—Vwar Nou Minister
Rwayonm Fevriye 2005, p. 6.