Fodre vizilan pour trouv bann Dimoun sourd dan ou Teritwar
1 Zeova pe kontinyen ofer sa lenvitasyon: “ ‘Vini!’ . . . ki sa ki anvi, i pran delo lavi gratwitman.” (Rev. 22:17) En gran nonm dimoun sourd i parmi sa bann ki pe reponn sa lapel. An rezilta, pandan sa 13 dernyen lannen, i annan 27 kongregasyon e 43 group ki kominik avek bann siny ki’n ganny formen Letazini. Dan losean Endyen, lo zil Renyon, plizyer group in ganny formen.
2 Kantmenm napa bann kongregasyon oubyen group ki kominik avek bann siny dan Sesel ki kapab konsantre tou zot zefor dan predikasyon pour kontakte bann dimoun sourd ek bann ki pa byen tande dan zot teritwar respektif, i annan serten sa bann dimoun dan nou teritwar ki pa ankor ganny trouve e ganny temwannyaz.
3 Konman ou kapab ede? Letan ou dan bann landrwa piblik, eski ou’n obzerv bann dimoun ki kominik avek siny? Eski ou konn en dimoun dan ou landrwa travay oubyen kot lekol ki annan en manm fanmiy ki sourd? Fodre ou vizilan pour trouv sa bann ki sourd anmezir ki ou pe fer ou bann aktivite toulezour. Me konman ou kapab asire ki zot pou ganny en temwannyaz lo Rwayonm?
4 Donn en Temwannyaz: Konman en lareg zeneral, nou ganny demande pour donn ladres sa dimoun sourd avek en kongregasyon oubyen en group pli pre ki kominik avek siny. Bokou dimoun sourd i fer progre pli vitman pour aprann laverite letan zot kapab zwenn avek lezot Temwen sourd dan bann renyon kongregasyon ki kominik avek bann siny. Alor, si i annan en kongregasyon oubyen en group ki kominik avek siny dan ou rezyon, sekreter ou kongregasyon i devret anvoy lenformasyon konsernan tou bann dimoun sourd dan ou teritwar.
5 Me si napa personn ki disponib pour donn lasistans spirityel bann dimoun sourd dan ou kominote? Konman ou kapab ede? Akoz ou pa fer en retourn vizit e koz avek okenn manm sa fanmiy ki kapab ekoute? Ofer pour montre en kaset video ki kominik avek siny pour revey lentere sa dimoun sourd. Serten proklanmater in menm aprann kominik avek siny pour kapab tous leker bann dimoun sourd dan en fason pli efikas. (Akt 16:9, 10) Brosir Ekspekte ek liv Konnesans i disponib lo kaset video dan Langaz Siny Ameriken. Kondwir bann letid Labib an servan sa bann zouti ki’n deza prodwir bokou rezilta pozitif.
6 Fodre vizilan pour trouv bann dimoun sourd dan ou rezyon, koumsa ou pou kapab donn zot sa loportinite pour pran delo lavi gratwitman.—Mat. 10:11.