Petet avan prese, ou pou bezwen rode
1. Akoz dan bann teritwar kot dimoun i koz diferan langaz, en kongregasyon ki koz en langaz spesifik i devret pres avek dimoun ki koz sa langaz?
1 Zour Lapannkot lannen 33 N.L., apre ki zot ti’n resevwar lespri sen, bann disip Zezi ti “konmans koz dan lezot langaz” avek bann ki ti sorti dan lezot parti lemonn. (Akt 2:4) An rezilta sa, apepre 3,000 dimoun ti ganny batize. I paret ki laplipar sa bann viziter ti osi koz swa Ebre oubyen Grek. Pourtan, Zeova ti vwar li neseser pour ki sa mesaz Rwayonm i ganny prese dan zot lalang maternel. En rezon pour sa i akoz souvan dimoun i pli pare pour ekout sa bon nouvel ler zot tann li dan zot prop langaz. Pour sa rezon alor, ozordi dan bann teritwar kot i annan dimoun ki koz plizyer langaz, en kongregasyon ki koz sa langaz spesifik i pres avek dimoun ki koz sa langaz. (Organized, paz 107, par. 2-3) Bann group lezot langaz pa ganny en teritwar, me zot pres avek sa bann ki koz zot langaz dan teritwar sa kongregasyon ki responsab zot ouswa lezot kongregasyon dan zalantour.
2. (a) Ki nou bezwen fer e kote i kapab neseser pour fer sa? (b) Ki mannyer bann kongregasyon i kapab ed kanmarad dan bann teritwar kot dimoun i koz plizyer langaz? (c) Ki nou merit fer si nou zwenn en dimoun ki montre lentere me ki koz en lot langaz?
2 Si ou reste dan en landrwa kot tou dimoun i koz menm langaz, ou kapab zis pres portanport. Me, ou sityasyon pou diferan si ou pe reste dan en landrwa kot i annan dimoun ki koz diferan langaz. Lezot kongregasyon i kapab pe pres dan sa menm landrwa. Menm si lezot kongregasyon i kapab donn ou lenformasyon konsernan bann dimoun ki zot in trouve ki koz ou langaz, i responsabilite ou kongregasyon oubyen group pour esey trouv bann dimoun ki ou kapab pres avek. (Vwar bwat “Ed kanmarad.”) Alor ou pou bezwen fer zefor pour esey rode kote pour trouv bann dimoun ki koz en langaz spesifik. Ki mannyer ou kapab fer sa?
3. Kwa ki pou determinen kote en kongregasyon oubyen group i kapab rod bann ki koz en serten langaz e ki kantite letan zot kapab pase dan sa aktivite?
3 Konman pour organiz sa travay: Lakantite letan ki pou ganny dedye dan sa travay pour rod dimoun ki koz diferan langaz pou depan lo sirkonstans lokal. Par egzanp, ki kantite dimoun dan lakominote ki koz sa langaz? Ki kantite proklanmater i annan? Ki kantite ladres sa kongregasyon oubyen group i deza annan? I pa neseser pour sa kongregasyon rod dimoun ki koz zot langaz partou kote, me zot kapab konsantre dan bann landrwa ki tonm dan zot teritwar kot i annan plis dimoun ki koz sa langaz ek bann teritwar ki pa tro lwen. Par kont i enportan pour byen organiz sa travay pour ki otan dimoun i ganny sa loportinite pour kriy non Zeova.—Rom. 10:13, 14.
4. (a) Konman sa travay pour rod bann ki koz en lot langaz i devret ganny organize? (b) Ki bann diferan fason ou kapab trouv dimoun ki koz en lot langaz?
4 Pour evite ki menm travay i ganny fer dan menm teritwar, bann ansyen, sirtou sirveyan servis i merit organiz oubyen siperviz sa travay. (1 Kor. 9:26) Dan en group ki koz en lot langaz, i pli bon pour en frer kalifye, parey en ansyen oubyen en asistan ministeryel organiz sa travay. Konsey ansyen ki siperviz sa group pou swazir sa frer responsab. Bokou kongregasyon ek group in fer en laranzman sistematik pour konn apepre kote pour prese par servi liv telefonn oubyen Internet pour get bann sinyatir ki popiler dan sa langaz. Apre sa, zot swa telefonnen oubyen fer bann vizit pour konnen kote zot pou zwenn sa bann dimoun. Si i pratik pour fer li, bann ansyen ki pe siperviz sa group i kapab fer laranzman detanzaot pour ki kongregasyon antye i partisip dan sa travay.—Vwar bwat “Konman pour trouv bann ki koz ou langaz.”
5. (a) Ki serten sizesyon i annan pour bann proklanmater ki pe rod bann ki koz en lot langaz? (b) Ki nou kapab dir bann dimoun ler nou pe rod bann ki koz en lot langaz?
5 Sak fwa nou pe prese, nou lobzektif i merit kler dan nou lespri. Vi ki sa aktivite i form par nou travay predikasyon, nou merit sanz dan en fason ki apropriye. Ler bann proklanmater i egzers zot prezantasyon e koz sa langaz anmezir ki zot pe rod sa bann dimoun, sa pou ede pour ki zot annan lantouzyasm e i pou amelyor zot abilite pour koz sa langaz. Nou kapab kont sa letan ki nou pase ler nou pe rod sa bann dimoun me pa sa letan ki nou pase ler nou pe prepar lalis dimoun ki koz sa langaz oubyen map teritwar. Ler nou trouv en dimoun ki koz sa langaz, nou merit fer zefor pour partaz sa bon nouvel e deswit enform sirveyan servis oubyen sa enn ki responsab pour ki bann rikord i ganny met azour. Nou bezwen fer sa menm si sa dimoun pa’n demontre okenn lentere. Menm si sa travay pour rod bann ki koz en lot langaz i enportan, nou devret osi partisip dan lezot form predikasyon.—Vwar bwat “Ki pour dir ler nou pe rod dimoun ki koz en lot langaz.”
6. Ki defi i annan pour rod bann dimoun sourd?
6 Rod bann ki sourd: I en defi e i demann bokou zefor ek perseverans pour rod bann dimoun sourd. En dimoun sourd pa kapab ganny idantifye par eple son non, dekrir li fizikman oubyen son lenz. Deplis bann manm fanmir ek zanmi i kapab anvi protez li e alor zot kapab ezite pour donn en proklanmater lenformasyon lo li. Sa bann sizesyon swivan i kapab itil pour rod bann dimoun sourd osi byen ki bann ki koz en lot langaz.
7. (a) Ki kalite kestyon nou kapab demande dan vwazinaz pour trouv dimoun sourd? (b) Ki mannyer nou kapab fer en met lakour santi li alez pour donn nou serten lenformasyon?
7 Bann kongregasyon ek group langaz siny i reisi rod lenformasyon dan bann landrwa rezidansyel. Petet en dimoun ki nou zwenn dan predikasyon in remarke ki en vwazen, en koleg travay, oubyen kanmarad lekol i servi langaz siny. I kapab i’n remarke ki i annan en lansenny lo semen ki pe averti bann vwazen ki i annan manrmay sourd dan zalantour. I kapab ki li menm i annan fanmir ki sourd. Gard antet ki serten dimoun i kapab annan en move pwennvi lo rezon akoz ou pe fer bann vizit. Me ou kapab fer sa met lakour santi li alez si ou amikal e ou donn en leksplikasyon bref, onnet e respektab. Serten in ganny bon rezilta ler zot demann sa met lakour si i pa konn personn ki sourd par montre Labib oubyen lezot piblikasyon lo DVD. Apre sa, zot zis dir ki zot ti anvi partaz sa lespwar ki dan Labib avek zot. Si sa dimoun i ezite menm pour donn lenformasyon, ou kapab donn li ou ladres oubyen en lenvitasyon pour asiste renyon pour li donn son fanmir oubyen zanmi ki sourd.
8. Ki mannyer en kongregasyon ki pa tro lwen i kapab ed en kongregasyon langaz siny?
8 En kongregasyon ki servi langaz siny i kapab envit en lot kongregasyon ki pa tro lwen avek zot pour ed zot rod bann ki sourd enn oubyen de fwa par an. Dan en renyon predikasyon pour en kongregasyon langaz siny, sirveyan group i kapab enkli bann lenstriksyon lo sa aktivite e fer en demonstrasyon. Sak pti group predikasyon i kapab annan omwen en proklanmater ki sorti dan en kongregasyon langaz siny ek en map ki montre egzakteman kote pour rod zot.
9. Ki mannyer ou kapab rod bann ki sourd dan bann landrwa kot zot normalman zwenn pour detant oubyen ganny led?
9 Nou osi kapab rod sa bann dimoun dan bann landrwa kot dimoun sourd i souvan zwenn pour bann moman detant oubyen pour ganny led ki ganny ofer dan lakominote. Bann proklanmater i devret sanz dan en fason ki apropriye pour sa lokazyon. I pou pli bon si ou pridan e koz avek enn ou de dimoun olye fer en prezantasyon devan en group dimoun. Si ou remarke ki sa dimoun i enterese, petet ou kapab demann li son ladres ek nimero telefonn e donn li pour ou osi.
10. Ki mannyer bann proklanmater i kapab rod bann sourd dan landrwa biznes?
10 En opsyon se ki ou kapab prepar bann map dan landrwa biznes e apre vizit zot pandan en ler apropriye. Lo en map i kapab annan detrwa stasyon petrol. Lo en lot, ou kapab met bann landrwa kot ou kapab lav lenz, restoran, lotel oubyen lezot kalite biznes. Si sak map i annan menm kalite biznes, bann proklanmater i kapab servi menm lapros e ganny leksperyans ek skil. Par egzanp, vi ki normalman i annan kliyan ki sourd dan bann lotel, nou kapab eksplik sa ki nou pe fer avek sa resepsyonnis e donn li en pti parsel ki ou’n deza fini prepare ki annan en DVD ek en lenvitasyon pour asiste renyon pour li donn bann kliyan sourd. Dan lezot landrwa biznes, nou kapab demande si i annan okenn travayer oubyen kliyan ki servi langaz siny. Si i annan en lekol pour bann sourd dan ou teritwar, ou kapab ofer serten nou bann DVD pour zot bibliotek.
11. Akoz sa travay pour rode i en laspe enportan dan nou minister?
11 En travay enportan: I pou pran letan pour esey trouv dimoun ki koz en lot langaz. Deplis, i kapab annan bann sanzman dan serten vwazinaz anmezir ki dimoun i sanz landrwa reste, e sa i kapab fer li difisil pour gard bann rikord azour. Kantmenm sa, dan bokou landrwa, rod bann ki koz en lot langaz oubyen ki sourd i en laspe enportan dan nou minister. Zeova, sa enn ki’n donn nou sa travay pour prese pa fer preferans. (Akt 10:34) I “oule ki tou [“sort kalite,” NW] dimoun i ganny sove e ganny konnesans laverite.” (1 Tim. 2:3, 4) Annou alor korpere avek Zeova e avek kanmarad pour trouv dimoun ki koz tou sort langaz e ki annan en “leker onnet e bon.”—Lik 8:15.
[Bwat lo paz 5]
Ed kanmarad
Si en kongregasyon ouswa group ti ava kontan ede pour trouv bann dimoun ki koz zot langaz ki zot kapab pres avek, sirveyan servis i devret kontakte bann ansyen lezot kongregasyon pros ki koz en lot langaz. I pli bon pour kontakte zis bann kongregasyon ki pa tro lwen ouswa ki annan en bon group dimoun ki koz sa langaz. Sa kongregasyon ki ganny kontakte i kapab apre sa enform bann proklanmater ki si zot zwenn okenn dimoun ki koz sa langaz, zot devret ekrir son ladres e donn sirveyan servis dan zot kongregasyon pour ki i pas lenformasyon avek sa kongregasyon ouswa group ki’n demann led. Bann sirveyan servis i kapab fer en laranzman lo konman pour kouver en teritwar kot i annan dimoun ki koz diferan langaz e diriz bann nouvo ver sa kongregasyon oubyen group apropriye.
Si bann proklanmater i zwenn en dimoun ki koz en lot langaz ki montre lentere (oubyen en dimoun ki sourd), zot devret deswit ranpli en form Please Follow Up (S-43) e donn sekreter kongregasyon. Sa pou permet ki sa dimoun i ganny led vitman.—Vwar km 5/11 p. 5 (paz 3 an Angle).
[Bwat lo paz 6]
Konman pour trouv bann ki koz ou langaz
• Demann lezot, ki swa en etidyan Labib, manm fanmir, koleg travay, ensidswit.
• Servi liv telefonn pour rod bann sinyatir ki popiler dan sa langaz. En liv telefonn ki dan lord dapre ladres i kapab disponib lo Internet oubyen lakonpanni telefonn.
• Avek pridans, rod lenformasyon dan bann landrwa ki ofer servis piblik, par egzanp bibliotek, lofis gouvernman ek lekol.
• Get dan zournal si i annan bann lanons lo bann aktivite piblik ki’n ganny organize par en group etranze.
• Vizit bann laboutik ek biznes ki okip bann kominote etranze.
• Demann permisyon sa bann ki ansarz pour met en latab avek bann piblikasyon dan en landrwa biznes, liniversite oubyen sant transportasyon kot dimoun ki koz en lot langaz i souvan frekante.
• Si i pa kont lalwa dan ou pei, aste en commercial directory oubyen progranm konpiter ki fer resers lo bann landrwa piblik lo Internet.
[Bwat lo paz 7]
Ki pour dir ler nou pe rod dimoun ki koz en lot langaz
Si ou amikal, senser e zantiy, bann dimoun pou santi zot pli alez avek ou. I souvan pli bon pour montre bann piblikasyon dan sa langaz.
Apre ki ou’n dir bonzour, ou kapab dir: “Nou pe rod bann dimoun ki koz ______ pour ki nou kapab partaz sa lespwar ki dan Labib avek zot. Eski ou konn okenn dimoun ki nou kapab koz avek?”
Ler ou pe rod bann ki sourd, ou kapab dir: “Bonzour. Eski mon kapab montre ou en keksoz? [Par servi en video player portab, zwe en verse dan New World Translation—lo DVD.] Sa i en bout dan Labib ki dan Langaz Siny Ameriken. Apard ki Labib, nou annan detrwa video ki’n ganny fer espesyalman pour ed bann sourd spirityelman. Eski ou konn okenn dimoun ki sourd oubyen ki ganny problenm tande e ki servi langaz siny?” Si sa met lakour pa rapel personn, i souvan bon pour demann li si i pa konn en dimoun sourd kot travay, lekol oubyen dan vwazinaz.