Travay ansanm pour anons bon nouvel dan teritwar kot dimoun i koz plizyer langaz

Laplipar ditan, dimoun i reazir pli byen ler zot tann sa mesaz Rwayonm dan zot prop langaz. Petet i pour sa rezon ki zour Lapannkot lannen 33, Zeova ti fer ki “bann Zwif ki ti byen relizye sorti dan tou pei dan lemonn” ti tann sa bon nouvel dan zot “lalang maternel,” menm si i kapab ki zot ti koz Ebre oubyen Grek. (Akt 2:5, 8) Ozordi, bann kongregasyon ki fer renyon dan diferan langaz i kapab pres dan menm teritwar. Ki mannyer bann proklanmater dan sa bann kongregasyon i kapab travay ansanm pour rann temwannyaz san ki zot pas kot dimoun souvan e fer dimoun ankoler?

• 

  Demann konsey (Pr 15:22): Sirveyan servis sa bann kongregasyon i devret koz avek kanmarad e ansanm trouv en fason pour anons sa bon nouvel dan en fason ki benefisye tou bann kongregasyon konsernen. Si zot teritwar i ptipti serten kongregasyon i kapab anvi ki ou pa fer bann lakaz kot dimoun i koz sa langaz ki zot kongregasyon i responsab. Par kont, si zot pa kapab kouver zot teritwar regilyerman akoz zot teritwar i eparpiye partou, i kapab ki zot pou oule ki ou fer tou lakaz me ki ou enform zot ler en dimoun ki koz zot langaz i montre lentere. (od-E 93 ¶37) Oubyen zot kapab demande ki ou kongregasyon i ed zot trouv bann dimoun ki koz zot langaz e pour donn zot ladres sa bann dimoun pour ki zot ganny enkli dan teritwar sa kongregasyon ki koz en lot langaz. (km 7/12 5, bwat) Gard an antet ki parfwa dimoun i kapab koz diferan langaz dan en sel lakaz. Bann laranzman pour pres dan sa bann teritwar i bezwen annakor avek bann lalwa ki dir ki mannyer pour servi ladres en dimoun.

• 

  Travay ansanm (Efe 4:16): Swiv byen bann lenstriksyon ki ou gannyen avek sirveyan servis. Eski ou pe fer letid avek en dimoun ki prefere fer letid dan en lot langaz? I tre probab ki sa etidyan i fer progre pli vitman si ou fer laranzman pour li etidye avek en dimoun dan en kongregasyon oubyen group ki pa tro lwen e ki koz son langaz.

• 

  Prepare (Pr 15:28; 16:1, NWT): Si sa met lakour i koz en lot langaz, fer ou mye pour partaz sa bon nouvel avek li. Ou kapab prepare par mazin davans ki bann diferan langaz ki ou kapab zwenn dan ou teritwar e par download Labib ek video dan sa bann langaz lo ou tablet oubyen telefonn. Ou kapab osi servi JW Language app pour aprann konn dir bonzour dan sa bann langaz.