Kan en met lakour i koz en lot langaz
1. Akoz i annan plis bezwen pour nou korpere kan nou pe travay dan en tel teritwar?
1 Deplizanpli, bann proklanmater Rwayonm otour lemonn pe zwenn bann dimoun enterese ki koz en langaz ki diferan avek sa ki kongregasyon i koze. Pour kapab donn led spirityel sa bann tel dimoun, plizyer biro brans pe vwar li neseser pour form bann group oubyen kongregasyon ki koz diferan langaz. Vi ki i kapab ki zot koz plizyer langaz diferan dan en teritwar, i kapab arive ki plizyer kongregasyon ki koz diferan langaz i pres dan menm teritwar. Ki mannyer sa bann kongregasyon i kapab korpere pour fer sir ki sa travay predikasyon i ganny fer dan en fason byen organize?—1 Kor. 14:33.
2. Kan pe pres portanport, konman ki nou kapab korpere avek bann group oubyen kongregasyon ki koz diferan langaz dan nou teritwar?
2 Bon korperasyon: Kan pe rann temwannyaz lo semen oubyen temwannyaz enformel, en proklanmater i devret santi li alez pour apros en nenport dimoun, enkli bann ki kapab koz en lot langaz e ofer en piblikasyon dan langaz ki sa dimoun i prefere lir. Me parkont, kan nou pe pres portanport dan bann vwazinaz kot i osi annan lezot group oubyen kongregasyon ki koz diferan langaz ki prese, en proklanmater i devret plizoumwen konsantre pour pres kot bann lakour ki annan dimoun ki koz menm langaz avek sa ki son kongregasyon i koze. Ler diferan kongregasyon i pres dan menm teritwar, i vreman enportan ki nou gard en bon rikord an rapor avek servis predikasyon. Bann sirveyan servis i devret kominik avek kanmarad e organiz keksoz dan en fason ki pou benefisye tou dimoun. (Prov. 11:14) Toudmenm, si ler en proklanmater pe pres portanport i zwenn en dimoun ki koz en lot langaz e napa en kongregasyon ki koz sa langaz dan sa zanmirant, sa proklanmater i devret fer zefor pour rann en temwannyaz e kontinyen swiv lentere sa dimoun.
3. Ki nou devret fer ler bann proklanmater ki sorti dan bann group oubyen kongregasyon ki koz en diferan langaz pe pres dan menm teritwar ki nou?
3 Nou pe fer menm travay: Ki nou devret fer ler bann proklanmater sorti dan diferan kongregasyon pe pres dan menm teritwar menm zour ki nou? Byensir, lanmour ki nou annan pour kanmarad pou ed nou sirmont okenn diferans ki relye avek langaz e tou proklanmater pou premyerman konsernen avek bezwen spirityel bann dimoun dan teritwar. (Zan 13:34, 35) Alors, sa enn ki pe responsab group predikasyon pou azir dan en fason rezonnab e demontre lanmour par deside si en group i devret tanporerman al pres dan en lot teritwar.—Zak 3:17, 18.
4. Ki profesi ki pe ganny akonplir dan nou letan?
4 Labib in profetize ki dimoun sorti dan diferan lalang pou tann sa bon nouvel. (Rev. 14:6, 7) Par annan en bon korperasyon avek tou bann ki enplike, en sitiasyon kot proklanmater sorti dan group oubyen kongregasyon ki koz diferan langaz i vizit menm lakour i kapab ganny evite e en kantite bann nouvo pou tann sa bon nouvel, enkli bann ki koz en lot langaz.—Efe. 4:16.