Prepare pour etidye Profesi Izai!
1 “Bann adorater fidel i kapab annan konfyans ki Zeova . . . pa pou les lemonn Satan egziste pour en zour anplis ki lazistis i demande.” Pa i en deklarasyon ankourazan! Kote ki sa in ganny site? La prophétie d’Isaïe, lumière pour tous les humains I. Eski profesi Izai i donn nou rezon pour tir en konklizyon ankourazan? Wi! Dan sa liv Labib, tenm delivrans i ganny aksantye bokou e dan en fason kler. (Iza. 25:9) Se pour sa rezon ki i pou en gran lankourazman pour nou etidye sa porsyon dan Parol Bondye dan Letid Liv Kongregasyon. Eski nou pou prezan sak semenn pour apresye sa liv? Akoz nou devret prezan?
2 Dan Izai 30:20, Zeova i ganny apele konman nou “Gran Ansennyan.” Sak Kretyen i devret ekout atantivman anmezir ki Zeova i enstri nou atraver son Parol ek bann piblikasyon baze lo Labib ki ganny fourni par ‘lesklav fidel e pridan.’ (Mat. 24:45; Iza. 48:17, 18) Sa i leka avek liv La prophétie d’Isaïe I. Konman ki ou kapab retir maksimonm benefis an etidyan sa liv?
3 Prepare pour partisipe: Met dekote sifizaman letan sak semenn pour prepar letid liv. Lir tou paragraf ki’n ganny dezinyen pour sak semenn. Reflesir lo sak kestyon. Mark bann larepons dan ou liv. Bann verse Izai ki’n ganny site i pli nwanr ki lezot lekritir. Lir zot atantivman. Pour bann lezot teks ki’n ganny mansyonnen, regard zot pour vwar konman zot relye avek sa lenformasyon. Medit lo sa ki ou pe aprann. Apre partaz sa ki ou’n gannyen dan ou preparasyon avek ou group letid liv.
4 Sa frer ki kondwir letid liv i devret ed tou lasistans pour byen servi Labib e pour apresye valer pratik sa lenformasyon ki pe ganny kouver. Si ou ganny demande pour donn premye komanter, donn en larepons senp, direk. Si en dimoun in deza fini fer sa, ou kapab elabor sa pwen ki pe ganny diskite. Petet ou kapab montre konman ki en verse kle i siport sa tenm. Esey fer komanter dan ou prop mo, e rezwir sa lazwa pour partisip dan diskisyon.
5 Avek lantouzyasm annou egzamin ansanm sa mesaz presye dan liv Izai. I pou ankouraz nou pour sak zour viv avek lazwa anmezir ki nou esper delivrans Zeova!—Iza. 30:18.