Gard Letan Lwazir dan son Plas apropriye
1 Dan sa bann zour difisil, nou tou nou bezwen en sanzman aktivite detanzaot. En serten kantite letan rekreasyon i bon. Sepandan, depans tro bokou letan dan lwazir, divertisman, e fer bann rankont i kapab diminyen vizilans en Kretyen e osi ptit-a-pti fer li pas mwens letan dan bann aktivite spirityel. Nou devret gard letan lwazir dan son plas apropriye. (Mat. 5:3) Konman ki sa i posib? An swivan sa konsey dan Efezyen 5:15-17.
2 Fikse bann Limit: Pol ti ekri ki bann Kretyen i devret “fer byen atansyon” pour ki zot viv zot lavi dan en fason ki saz. Moderasyon ek kontrol lo nou prop lekor i neseser pour limit letan lwazir dan lakantite letan ki vreman neseser. I bon pour nou reflesir seryezman lo lafason ki nou servi nou letan lib. Rekreasyon i devret akonpli serten keksoz itil olye ki fer nou santi ki nou’n gat nou letan oubyen fer nou fatige. Si nou santi nou vid, pa satisfe, e osi santi nou koupab, apre ki nou’n fer en aktivite, sa pou endike ki bann lazisteman i merit ganny fer dan lafason ki nou servi nou letan.
3 Fodre ki nou rezonnab: Pol ti donn konsey pour “servi byen tou bann lokazyon” pour bann keksoz pli enportan dan lavi, e pa vin “konman bann enbesil.” Bann Kretyen ki’n dedye zot lavi avek Zeova pa kapab les zot lavi santre lo aktivite lwazir. Kantmenm repo ek relaksasyon i kapab refer nou fizikman, sours lenerzi spirityel i lafors aktif Bondye. (Iza. 40:29-31) Nou resevwar son lespri atraver bann aktivite teokratik—letid Labib, asiste bann renyon kongregasyon, partisip dan predikasyon—non pa atraver rekreasyon.
4 Etablir bann Priyorite: Pol ti demann bann Kretyen pour “fer tou zot posib pour konpran konman Senyer i oule zot azir.” Zezi ti ansennyen ki nou aktivite i devret santre lo Rwayonm Bondye konman nou priyorite dan lavi. (Mat. 6:33) I tre enportan ki nou premyerman fer bann keksoz ki pou permet nou viv an armoni avek nou dedikasyon avek Zeova. Apre sa, letan lwazir i kapab ganny garde dan son plas apropriye. Kan sa in ganny fer, i pou annan en bon lefe, e nou pou rezwir li bokou plis.—Ekle. 5:12.