Servi byen ou Letan
1 Nou dezir pour fer plezir Zeova i pous nou pour konsantre lo bann keksoz spirityel. Son Parol i ansenny nou pour ‘kontinyen rod plito Rwayonm Bondye’ e pour “verifye sa ki pli enportan.” (Mat. 6:33; Fili. 1:10, NW) Konman nou kapab fer letan pour bann lentere Rwayonm e met bann keksoz ki pa tro enportan dan dezyenm plas?—Efe. 5:15-17.
2 Met bann Aktivite Rwayonm premye: Organiz ou letan dan en fason pour ki ou pa pas tou ou letan dan bann keksoz ki pa enportan. Serten proklanmater i plàn serten letan spesifik okonmansman sak mwan lo zot kalandriye pour predikasyon. Apre zot fer sir ki zot pa les lezot keksoz deranz sa bann plan. Nou kapab fer menm zafer pour letid personnel, asiste bann renyon, ek lasanble. Bokou dimoun i annan en progranm kot toulezour zot konmans oubyen termin zot lazournen avek lektir Labib. Met dekote en letan spesifik pour sak aktivite enportan, e pa les lezot keksoz ki pa esansyel deranz sa progranm.—Ekle. 3:1; 1 Kor. 14:40.
3 Limit lakantite Letan nou pase dan bann Aktivite Lemonn: Dan serten pei i annan bokou sport, divertisman, detant, pastan, ek lezot aktivite. Bokou dimoun i pas tro bokou letan devan televizyon oubyen servi konpiter. Me si nou les bann aktivite lwazir ek bann nouvo lekipman ki sa lemonn i ofer preokip nou, sa pou sertennman anmenn dezapwentman. (1 Zan 2:15-17) Pour sa rezon, Labib i ankouraz nou pour pa profit plennman dan sa lemonn. (1 Kor. 7:31) Par ekout sa konsey saz, ou kapab montre Zeova ki son ladorasyon i okip premye plas dan ou lavi.—Mat. 6:19-21.
4 Letan ki reste pour sa sistenm ki nou pe viv ladan pe al fini. Bann ki met lentere Rwayonm premye pou ere e zot pou ganny faver Bondye. (Prov. 8:32-35; Zak 1:25) Annou alor, servi byen nou letan, ki en resours presye.