Kwa ki pli enportan pour ou?
1 Ki mannyer ou ti pou reponn sa kestyon? Byensir, nou tou nou anvi met lentere Rwayonm premye. (Mat. 6:33) Me nou kapab demann nou lekor, ‘Eski bann swa ki mon fer i montre ki mon pe fer sa?’ Labib i ankouraz nou: “Teste zot lekor.” (2 Kor. 13:5) Ki mannyer nou kapab teste nou lekor pour vwar si nou pe met Rwayonm premye?
2 Nou Letan: Premyerman, nou kapab egzamin nou pour vwar ki mannyer nou deside servi nou letan. (Efe. 5:15, 16) Ki kantite letan nou pase tou le semenn pour detann avek lezot, get televizyon, servi Internet, oubyen lo en pastan? Si nou ekrir ki kantite letan nou pase lo sa bann keksoz e konpar zot avek sa kantite letan ki nou pase dan bann aktivite spirityel, nou kapab sirprann. Eski nou fer overtaym dan travay zis pour ganny plis keksoz materyel, olye pas sa letan dan nou servis sakre? Eski nou sakrifye nou renyon ek prediksyon ase souvan zis pour al bann wikenn kot nou detann?
3 Etablir nou bann Priyorite: Laplipar nou napa ase letan pour fer tou sa ki nou ti a kontan fer. Alors pour nou met lentere Rwayonm premye, nou bezwen egzamin nou bann priyorite e apre fer letan pour “sa ki pli enportan.” (Fili. 1:10, NW) Sa i enkli etidye Parol Bondye, partisip dan predikasyon, pran swen avek nou fanmiy, e asiste nou bann renyon. (Ps. 1:1, 2; Rom. 10:13, 14; 1 Tim. 5:8; Ebr. 10:24, 25) Lezot aktivite parey en pe legzersis ek bann bon rekreasyon i annan zot byenfe. (Mark 6:31; 1 Tim. 4:8) Me zot mwen enportan e zot devret ganny garde dan zot plas.
4 En zenn frer ti fer zefor pour met lentere Rwayonm premye. I ti pran servis aplentan olye kontinyen son letid lo en pli onivo pour prepar li pour en karyer dan lemonn. I ti aprann en lot langaz e al servi dan en landrwa kot ti annan plis bezwen. I ti dir: “Mon pe eksperyans bann pli bon moman dan mon lavi isi. Predikasyon i telman gou! Mon zis swete ki tou zenn ti a fer en keksoz koumsa e santi parey mon pe santi. Napa pli bon keksoz pour fer ki servi Zeova avek tou sa ki nou annan.” Wi, ler nou met Rwayonm premye, nou ganny benediksyon. Me pli enportan ankor, i fer plezir nou Papa dan lesyel, Zeova.—Ebr. 6:10.