Eski ou pe aplik sa ki ou’n aprann dan Lasanble Distrik “Bann Ansennyan Parol Bondye?”
1 Nenport dimoun ki ti asiste lasanble distrik pour sa lannen in kapab vwar ki pep Zeova i annan lentansyon akonpli zot misyon pour vin bann ansennyan Parol Bondye. (Mat. 28:19, 20) Kan ou ti retourn dan lakour, ki konsey spesifik ki ou ti determinen pour met an pratik dan ou lavi e dan predikasyon?
2 Lekritir enspire i itil pour ansennyen: Tenm pour sa premye lazournen ti met lanfaz lo 2 Timote 3:16. Diskour tenm ti montre ki pour “byen ekipe konman bann Ansennyan Parol Bondye,” nou bezwen estim Parol Bondye, respekte li plis ki okenn lopinyon oubyen tradisyon zonm, e servi li konstaman. Toulezour nou bezwen priy pour lespri sen pour ed nou dan nou minister e travay pour kiltiv son fri prensipal—lanmour. E nou bezwen les lorganizasyon Zeova lo later form nou konman bann minis atraver tou bann renyon kongregasyon.
3 Vandredi, diskour an trwa parti, “Ansenny nou prop Lekor anmenmtan ki nou ansenny lezot,” ti eksplike ki nou devret egzanpler dan (1) reste atase avek lalwa Bondye dan tou laspe moralite Kretyen, (2) fer zefor pour mentenir en bon labitid pour etidye, (3) elimin bann latitid ek bann kondisyon leker ek lespri ki Dyab i kapab eksplwate. Apre sa, nou ti aprann bann fason pratik pour protez nou fanmiy kont pornografi, sa fleo ki’n anvair lemonn. Paran ti ganny ankouraze pour demontre legzanp pour evite zet menm en pti kou-d-ey lo en senn seksyel e pour sirvey zot zanfan kan zot pe servi Internet oubyen regard televizyon. Ki bann pwen dan sesyon Vandredi ki ou’n met an pratik?
4 Dernyen diskour pour sa lazournen ti fortifye nou determinasyon pour seri lalimyer Zeova, pour reste pre avek laklas fidel Bondye, e pour kontribye ver lape parmi pep Zeova. Eski ou’n lir sa nouvo liv La prophétie d’Isaïe, lumière pour tous les humains II?
5 Kalifye pour ansenny lezot: Tenm pour sa dezyenm lazournen ti 2 Timote 2:2. Anmezir ki ou ti pe ekout sa diskour an trwa parti Sanmdi bomaten, eski ou ti not bann sizesyon lo konman pour (1) rod bann ki merite, (2) kiltiv zot lentere, e (3) ansenny zot pour obzerv tou sa ki Kris in komande? Eski ou pe aplik sa ki ou’n aprann—pour montre sa dimoun omwen en pwen enportan dan Lekritir e pour poz en fondman pour en vizit plitar?
6 Progranm apremidi ti met lanfaz lo lenportans pour imit sa Gran Ansennyan, Zezi. Dan ki fason ki ou pe esey vin pli parey li? Dapre sa ki ou ti aprann dan sa dezyenm diskour an plizyer parti sa zour, dan ki fason ki ou santi ou kapab “Tir plis Benefis dan Ledikasyon Teokratik”? Ki bann sizesyon ki ou’n aplike pour ogmant ou lakantite letan konsantrasyon pandan letid personnel ek renyon kongregasyon?
7 San dout, sa prosen provizyon Benefit From Theocratic Ministry School Education pou ed nou devlop nou abilite konman bann orater ek ansennyan Parol Bondye. Plis latansyon pou ganny mete lo bann abilite pour kominike ki bann serviter fidel Bondye dan letan Biblik ti annan. Sak leson dan sa nouvo liv letid i annan bann bwat ki montre an bref ki nou bezwen fer, akoz i enportan, e konman pour fer li. I osi enkli bann legzersis pratik. Bann ser pou annan 29 senn ki zot kapab swazir kan zot pe fer zot ekspoze. Avek letan, lanons bann sanzman pou ganny fer dan laranzman lekol. Eski ou annan en bon labitid pour etidye e prepare afen pour benefisye plennman atraver Lekol Minister Teokratik?
8 An pran kont Letan vin bann Ansennyan: Ebre 5:12 ti prepar lespri lodyans Dimans. Diskour an trwa parti bomaten, “Profesi Malaki i prepar nou pour Zour Zeova,” ti ankouraz nou pour donn Zeova sa ki pli bon e pour ay tou form traizon afen ki nou kapab sirviv sa gran zour efreyan Zeova. Dram, “Respectons L’autorité de Jéhovah,” ti montre dan en fason konman ki lafyerte, lanbisyon, zalouzi, e mank lwayote ti fer Kora ek son bann asosye rebel kont Zeova li menm. Sa diskour ki ti swiv apre dram ti konsantre lo bezwen dan letan modern pour soumet avek lotorite divin dan fanmiy e dan kongregasyon. Diskour piblik, “Lekel ki pe ansenny tou Nasyon Laverite?” ti fourni laprev ki Temwen Zeova pe fer li kontrerman avek Kretyente, ki pe senpleman pretann ki zot pe ansenny laverite ki dan Labib.
9 I kler ki Zeova pe form nou pour vin bann pli bon ansennyan pour ansenny son Parol. Annou aplik sa ki nou’n aprann, ‘vey byen nou lekor e fer byen atansyon avek nou lansennyman, afen ki nou ava kapab sov nou lekor ek tou bann ki ekout nou.’—1 Tim. 4:16.