Devlop ou Kapasite pour disteng sa ki byen ek sa ki mal

¹ Sa bann dernyen zour penib, ki nou pe viv ladan, in anmenn plis presyon ansanm avek bann vre leprev dan son diferan form lo pep Bondye partou. (2 Tim. 3:1-5) Nou tou nou bezwen lankourazman pour reste ferm dan lafwa. (1 Kor. 16:13) Nou kapab fer sa avek led Zeova, anmenmtan ki nou kontinyen nouri regilyerman lo son Parol, depan lo son lespri sen, e reste atase avek son lorganizasyon.—Pson. 37:28; Rom. 8:38, 39; Rev. 2:10.

² Pour rezon valab, sa tenm “Montre Matirite dan zot Rezonnman” ti ganny devlope dan progranm zournen lasanble spesyal lannen pase. Sa tenm ti baze lo 1 Korentyen 14:20, kot zapot Pol ti dir: “Mon bann frer, pa fer konman zanfan dan zot rezonnman. Fer konman zanfan konsernan sa ki mal, me dan zot rezonnman montre matirite.” Ki ou ti panse lo sa progranm?

³ “Ti vreman ankourazan!” “Sa ti toutafe sa ki nou ti bezwen!” Sa i zis de parmi bann reaksyon. Menm en msye ki pa en Temwen ki ti senpleman asiste sa lasanble pour regard son fiy 12 an batize ti dir ki i ti vreman enpresyonnen avek progranm e ki i ti kapab vwar konman sa ti pou benefisye son fanmiy. Eski ou annan menm santiman? Annou revwar enpe bann pwen for sa progranm.

⁴ Konnesans egzakt i neseser pour devlop Kapasite pour disteng sa ki byen ek sa ki mal: Dapre diskour louvertir, “Devlop ou Kapasite Rezonnman konmela menm,” kwa ki neseser pour nou fer fas avek bann defi denozour ki sa orater ti met lanfaz lo la? Nou bezwen plis ki zis abilite mantal. Nou bezwen devlop e agrandi nou kapasite pour konpran Labib, sansan nou pou ganny konkerir par tou sa bann move keksoz ki nou ganny ekspoze avek. Pour devlop sa kapasite pour rezonnman nou bezwen demann gidans Bondye. Parey sa psalmis, dan lapriyer nou bezwen demann Zeova pour fer nou konpran son lalwa ek son bann rapel afen ki nou ava kapab servi li avek tou nou leker.—Pson. 119:1, 2, 34.

⁵ Dan lot parti, sirveyan rezyonal ti montre ki Zeova, atraver son Parol ek lorganizasyon, i fourni nou avek “Led pour montre Matirite dan Rezonnman Biblik.” Kapasite pour konpran ti ganny defini konman “sa abilite pour vwar kler atraver en keksoz e disernen kwa ki konpoz li par konpran konneksyon ki annan ant son bann diferan parti ek son lansanm, e alor sezi sans sa keksoz.” Lekel ki kapab ed nou pour devlop sa kapasite? Zeova in donn nou bann don an zonm pour ed nou pour progrese spirityelman. (Efe. 4:11, 12) Son lorganizasyon lo later i ankouraz nou pour lir Parol Bondye toulezour e pour asiste renyon kongregasyon regilyerman. (Pson. 1:2) Nou ganny ansennyen konman pour servi Labib ek nou bann piblikasyon Kretyen dan nou letid personnel e an fanmiy, osi dan preparasyon pour renyon kongregasyon ek predikasyon. Eski ou pe profit tou sa bann laranzman? Eski ou pe mentenir en progranm lektir Labib ki regilye? Sa i esansyel si nou anvi evite tonm dan pyez bann tandans, lanmod, filozofi, ek lenfliyans tronper ki sa monn i ofer.—Kol. 2:6-8.

⁶ Nou Kapasite pour disteng sa ki byen ek sa ki mal i bezwen ganny formen: Dan son premye diskour ki ti annan pour tit “Protez ou Spirityalite an devlopan ou Kapasite pour disteng sa ki byen ek mal,” orater viziter ti eksplike ki bann ki dan sa monn pa kapab disteng sa ki byen ek sa ki mal. (Iza. 5:20, 21) Sa i akoz zot refize rekonnet e obzerv bann standar drwat Bondye. Lo lot kote, nou ki’n resevwar formasyon spirityel dan lorganizasyon Zeova, nou rekonnet bann standar Bondye, ki servi pour gid nou bann aktivite ek kondwit. Alor, nou dan en pozisyon pour aprann par leksperyans kwa ki bon e akseptab dan son lizye e kwa ki an akor avek son lavolonte parfe.—Rom. 12:2.

⁷ Pour evit bann lopinyon konfizan sa monn e par laswit son bann move fri, nou devret kontinyelman devlop nou kapasite pour disteng sa ki byen ek sa ki mal. Konman nou kapab arive fer sa? Parey i ganny rikorde dan Ebre 5:12-14, zapot Pol ti met lanfaz lo nesesite pour nouri pa zis lo “dile” laparol. Nou bezwen nouritir spirityel ki solid, tel parey sa ki nou pe resevwar dan etidye profesi Izai dan Letid Liv Kongregasyon. Apre nou bezwen pare pour aplik sa ki nou’n aprann dan nou lavi. Ler nou fer sa, nou konvenki ki bann prensip ek standar Zeova i bon. Sa i devlop nou abilite pour disteng sa ki byen ek sa ki mal.

⁸ I tris pour dir ki serten in tonbe spirityelman. Akoz? Zot pa’n port zot latansyon lo sa ki bon e drwat dan lizye Zeova. E rezilta se ki zot in vin viktim bann deba lo radyo ek televizyon ki kontyen bann keksoz ki pa an akor avek Labib, bann lanmizik degradan, oubyen bann move lenfliyans dan bann kwen koze lo konpiter. Par azir avek sazes, nou pou evite ganny enfliyanse par bann zonm imoral, bet oubyen mesan.—Prov. 13:20; Gal. 5:7; 1 Tim. 6:20, 21.

⁹ Bann Zenn i bezwen “fer konman Zanfan konsernan sa ki mal”: Sa progranm ti annan de parti ki ti spesifikman ankouraz bann zenn pour devlop zot kapasite pour rezonnen. Orater ti montre ki “fer konman zanfan konsernan sa ki mal” i vedir mank leksperyans, setadir, inosan konman bann pti baba anver bann keksoz ki mal dan lizye Zeova. (1 Kor. 14:20) Nou tou nou ti ganny ankouraze pour fer byen atansyon konman nou servi nou letan pour ki nou reziste ganny ekspoze avek tou sort kalite mesanste e evite ganny enfliyanse par zot. (Efe. 5:15-17) Nou ti ganny ankouraze pour kalkile konbyen letan nou pase pour lir lenformasyon ki pa direkteman kontribye ver nou devlopman pour konpran bann keksoz spirityel. Eski ou’n fer sa? Ki rezilta i demontre? Apar ki lir Labib toulezour, determinen pour kontinyen lir lenformasyon ki lorganizasyon i fourni. Sa pou ed nou tou, enkli bann zenn, pour “ganny lentelizans.”—Prov. 4:7-9.

¹⁰ “Benefis en bon Rezonnman an aplikan Prensip Labib”: Sa ti tenm diskour final pour progranm zournen lasanble spesyal. Orater viziter ti eksplike ki Zeova i Sours kapasite rezonnman ki donn lavi, e ki enfiniman siperyer avek sa ki pour imen. Zis mazinen ki nou annan sa loportinite pour servi rezonnman Zeova! Avek zenerozite i donn tou sa bann ki senserman resers li e demann li avek lafwa. (Prov. 2:3-5, 9; 28:5) Eski ou pe profit plennman sa ki Zeova pe ofer?

¹¹ Nou ti ganny ankouraze pour aprann idantifye bann prensip anmezir ki nou lir Labib. (2 Tim. 3:16, 17) Etidye zot avek bokou latansyon pour ganny en konpreansyon egzakt lo sa ki Zeova pe dir. Pran letan pour medit lo sa bann prensip e fikse zot dan ou lespri ek leker. Sa pou form ou kapasite pour rezonnen afen ki ou kapab reisi kan ou pe fer bann desizyon dan lavi. (Zoz. 1:8) Annou vwar detrwa sitiasyon ki en kantite dimoun i fer fas avek e vwar konman ki aplik bann prensip Labib i kapab ed nou pour reisi.

¹² ‘Eski mon devret adopte en serten lanmod lenz oubyen kwafir?’ Tandans ekstravagan sa monn dan fason sanze ek kwafir i souvan reflekte en leta lespri rebelyon. En tel leta lespri i enfliyans bann dimoun pour sanz dan en fason debraye, dan en fason ki pa atiran oubyen montre zot seksyalite. Ki bann prensip Labib apropriye ki pou ed nou pour rezet bann tel tandans? Kan nou devlop nou kapasite pour rezonnen, nou pou pran an konsiderasyon sa prensip ki trouve dan 1 Timote 2:9, 10, pour sanz ‘dan en fason konvenab e senp . . . , ki nou ganny admire pour nou bann bonn aksyon, ki apropriye pour bann dimoun ki relizye.’ Lezot prensip ki apropriye i enkli sa bann ki ganny mansyonnen dan 2 Korentyen 6:3 ek Kolosyen 3:18, 20.

¹³ ‘Ki mon kapab fer pour gard mon relasyon familyal for?’ Bon kominikasyon ant manm lafanmiy i vreman enportan. Zak 1:19 i dir nou: “Tou dimoun i devre pare pou ekoute, me pran letan avan koze, avan pran lakoler.” Bann manm fanmiy i bezwen ekoute osi byen ki koz avek kanmarad akoz kominikasyon antre fanmiy i en lesanz. Menm kan sa ki nou dir i vre, si i ganny dir dan en fason kriyel, vantar, oubyen mank konsiderasyon, i probab ki i pou fer dimal olye dibyen. Alor ki swa nou en mari oubyen en madanm, en paran oubyen en zanfan, nou devret fer ki nou parol i “touzour agreab e enteresan.”—Kol. 4:6.

¹⁴ ‘Eski mon pe ganny afekte par lanmour pour larzan?’ Lanmour pour larzan i en presyon lemonn ki fer lavi en dimoun difisil. I pa ed en dimoun pour atenn vre boner. (Ekle. 5:10; Lik 12:15; 1 Tim. 6:9, 10) Pour ed nou evite tonm dan pyez pour annan lanmour pour larzan, Zezi ti ansenny nou sa prensip enportan: Gard ou lizye senp. Viv en lavi balanse ki mwen konplike i enplik fikse nou lizye lo bann lentere Rwayonm, met lezot keksoz dan dezyenm plas.—Mat. 6:22, 23, 33.

¹⁵ Kwa ki devret nou Lobzektif: Dan Parol Bondye nou annan en sours bann prensip drwat ki diny konfyans pour gid nou pour fer bann desizyon. Nou bezwen aprann sa bann prensip, medit lo zot, e konpran konman pour aplik zot dan nou lavi. Alor par ‘egzers nou kapasite pour rezonnen pour disteng sa ki byen ek sa ki mal,’ nou pou benefisye e onor Zeova.—Ebr. 5:14.