Anons byen Mesaz Laverite
1 Kan i ti pe temwanny avek en zofisye, “Filip ti eksplik li, konmansan par sa pasaz Lekritir i ti anons bonn nouvel konsernan Zezi.” (Akt 8:35) Filip ti pe “anons byen mesaz laverite.” (2 Tim. 2:15) Parkont, bann sirveyan rezyonal in remarke ki konmela en kantite proklanmater i rarman servi Labib kan zot pe rann temwannyaz. Eski ou servi Labib kan ou prese?
2 Parol Bondye i sours tou keksoz ki nou krwar e ansennyen. (2 Tim. 3:16, 17) Se li ki atir bann dimoun ver Zeova e edik zot pour ganny lavi. Se pour sa rezon ki i enportan ki nou servi Labib dan nou minister plito ki nou zis koz lo bann topik ki enteres nou. (Ebr. 4:12) Lefe ki laplipar dimoun napa en gran konnesans lo Labib, nou bezwen alor lir dan Labib pour montre zot gidans pratik ki i ofer e lavenir ki i rezerve pour limanite.
3 Lir direkteman dan Labib: Ou kapab esey al prese san en sak. Ou kapab met sa piblikasyon ki ou anvi prezante dan en fayl e anmenn ou Labib dan ou lanmen oubyen met li dan ou pos. Apre, kan ou angaz dan konversasyon avek en dimoun, ou kapab tir ou Labib san ki ou fer sa dimoun ganny lenpresyon ki ou pe esey pres en sermon. Debout dan en pozisyon ki sa dimoun i kapab swiv ansanm avek ou dan ou Labib. Si i posib demann sa dimoun pour lir en verse, aotvwa. I kapab fer en pli bon lenpresyon lo sa dimoun kan i vwar sa ki Labib i dir olye ki zis antann. Byensir, pour ed li konpran sa lide dan sa teks, met lanfaz lo bann mo ki fer resorti sa lide.
4 Prezant en Verse: Apre ki ou’n entrodwir ou lekor, ou kapab dir: “Dimoun i al kot diferan sours pour ganny gidans dan zot lavi. Lekel ki ou panse i sa pli bon sours pour gid nou dan en fason pratik? [Les sa dimoun reponn.] Ki ou panse lo sa deklarasyon? [Lir Proverb 2:6, 7, e les sa dimoun reponn.] Lasazes imen in ganny prouve vreman enferyer, i’n anmenn bokou dimoun ver dezespwar. Toutfwa, lasazes Bondye in toultan prouv diny avek konfyans e in anmenn benefis.” Apre montre sa piblikasyon ki ou pe prezante, e fer resorti en legzanp lasazes pratik Bondye.
5 Zezi ti servi Lekritir pour ed bann dimoun ki ti annan leker senser. (Lik 24:32) Pol ti servi Labib pour prouv bann keksoz ki i ti ansennyen. (Akt 17:2, 3) Nou konfyans ek lazwa dan minister pou ogmante anmezir ki nou vin pli kalifye pour anons byen Parol Bondye.