Akoz nou devret kontinyen prese?
1 Eski sa travay pres Rwayonm pe kontinyen ganny fer dan ou kominote pour en bon pe letan? (Mat. 24:14) Si wi, petet ou kapab santi ki teritwar kongregasyon in sifizaman kouver. Aprezan kan ou prese, petet laplipar dimoun ki ou zwenn i paret endiferan anver sa mesaz Rwayonm. Kantmenm sa, remarke kwa ki ti ganny dir lo bann vre disip Zezi dan liv Prophétie d’Isaïe II lo paz 141: “Dan serten landrwa, petet i paret ki zot minister napa preski okenn rezilta kan i ganny konpare avek lakantite travay ek zefor ki ganny depanse. Kantmenm sa, zot persevere.” Me akoz nou devret kontinyen prese?
2 Mazin Zeremi: Nou fidelite dan sa travay predikasyon pa devret depan lo ki swa dimoun i ekoute oubyen non. Zeremi ti prese pour 40 an dan menm teritwar menm si ti annan en pti gin dimoun ki ti ekout li e en kantite ti kont son mesaz. Akoz Zeremi ti persevere? Akoz i ti pe fer en travay ki Bondye ti’n demann li pour fer e osi son konnesans ki i ti annan lo sa ki ti pou arive dan lavenir ti obliz li pour kontinyen koze.—Zer. 1:17; 20:9.
3 Nou sitiasyon i parey. Zezi in “donn nou lord pour prese e anons bann dimoun ki se limenm ki Bondye in etabli pour ziz bann vivan ek bann mor.” (Akt 10:42) Sa mesaz ki nou pe anmennen i kapab enplik lavi oubyen lanmor pour bann ki tann li. Bann dimoun pou ganny zize dapre zot reaksyon anver sa bon nouvel. Alor, nou responsabilite se pour fer egzakteman parey nou’n ganny demande pour fer. Menm si dimoun i refize pour ekoute, sa i donn nou loportinite pour demontre profonder nou lanmour pour zot ek nou devosyon anver Zeova par persiste pour fer sa ki nou bezwen fer. Me sa pa tou.
4 Nou pe benefisye: San pran kont bann rezilta ki nou gannyen dan teritwar, fer lavolonte Bondye i donn nou lape enteryer, satisfaksyon, e lazwa, ki nou pa zanmen kapab gannyen dan okenn lezot fason. (Pson. 40:8) Nou lavi i annan vre sans ek bi. Pli nou partisip dan predikasyon, pli nou leker ek lespri i konsantre lo sa lespwar ek lazwa pour viv dan nouvo monn Bondye. Ler nou konsantre lo sa bann promes Biblik sa i ogmant nou spirityalite e ranforsi nou relasyon avek Zeova.
5 Menm si nou pa vwar bann rezilta imedya dan nou aktivite predikasyon, i kapab ki en lagrenn laverite in ganny plante dan leker en dimoun ki pour zermen dan letan ki Zeova in fikse. (Zan 6:44; 1 Kor. 3:6) Nou pa konnen ki kantite dimoun ankor ki pou aprann lo sa Rwayonm atraver zefor pep Zeova, swa lokalman oubyen dan lemonn antye.
6 Plis ki zanmen oparavan, nou devret port latansyon lo lenstriksyon Zezi: “Fer atansyon, veye, parski zot pa konnen kan sa ler pou arive. Sa ki mon dir avek zot, mon dir avek tou dimoun: Veye.” (Mark 13:33, 37) Alor, fotespere ki nou tou nou kontinyen deklar sa bon nouvel Rwayonm. I fer leker Zeova rezwir ler nou partisip dan sangtifikasyon son gran e sen non.