Akoz nou retournen plizyer Fwa
1. Ki kestyon ki ganny souleve konsernan nou travay predikasyon?
1 Dan bokou landrwa, nou kouver nou teritwar ase souvan. Nou kontinyen repas kot menm lakaz plizyer fwa, menm si sa met lakour ti’n kapab dir nou ki i pa enterese. Akoz nou kontinyen vizit bann ki pa’n montre lentere dan lepase?
2. Ki sa rezon prensipal nou persevere dan servis predikasyon?
2 Lanmour pour Zeova e pour Dimoun: Sa rezon prensipal pour persevere dan predikasyon i akoz nou lanmour pour Zeova. Nou leker i pous nou pour kontinyen koz avek lezot lo nou gran Bondye. (Lik 6:45) Nou lanmour pour Zeova i motiv nou pour obeir son bann komannman e ed lezot pour fer parey. (Prov. 27:11; 1 Zan 5:3) Nou landirans dan sa travay pa depan lo lafason ki dimoun i reazir anver nou mesaz. Menm ler bann Kretyen dan premye syek ti ganny persekite, zot ti kontinyen prese “toulezour.” (Akt 5:42) Ler dimoun pa oule ekoute olye les sa dekouraz nou, nou reste ferm, e sa i montre profonder nou lanmour ek devosyon pour Zeova.
3. Ki mannyer lanmour pour dimoun i ed nou pour kontinyen prese?
3 Nou osi persevere akoz nou kontan nou prosen. (Lik 10:27) Zeova pa oule ki personn i ganny detri. (2 Pyer 3:9) Menm dan teritwar ki souvan ganny fer, nou ankor pe trouv dimoun ki anvi servi Zeova. Par egzanp, Guadeloupe, kot 1 dan sak 56 dimoun i en Temwen Zeova, 214 dimoun ti ganny batize lannen pase. Pros 20,000 dimoun ti asiste Memoryal, apepre 1 pour sak 22 dimoun Guadeloupe!
4. Dan ki fason ki teritwar i sanze?
4 Sanzman dan Teritwar: I konstaman annan bann nouvo dimoun ki vin reste dan nou teritwar. La prosenn fwa nou vizit en lakour kot dernyen fwa dimoun pa ti enterese, petet en lot manm fanmir ki pa’n deza tann nou mesaz i kapab ouver laport e ekout nou. Oubyen nou kapab zwenn bann nouvo dimoun ki’n fek vin reste kot sa lakour e ki enterese pour ekout nou. Bann zanfan ki zot paran ti opoz laverite in grandi e kit lakour. I kapab ki aprezan zot anvi ekout sa mesaz Rwayonm.
5. Kwa ki kapab fer dimoun vin pli enterese?
5 Dimoun osi i sanze. Dan lepase zapot Pol ‘ti blasfenm, persekit e ensilte lezot.’ (1 Tim. 1:13) Pareyman, bokou ki pe servi Zeova ozordi a en moman donnen zot pa ti enterese avek laverite. Petet serten ti menm opoz sa bon nouvel dan lepase. Anmezir ki bann kondisyon lemonn i sanze, serten opozan oubyen bann ki pa ti enterese i kapab ganny motive pour ekout sa bon nouvel. Serten i kapab pli enterese apre ki zot in pas dan kou, parey en lanmor dan fanmir, perdi en travay, problenm finansyel, oubyen problenm lasante.
6. Akoz nou devret kontinyen pres avek lantouzyasm?
6 Sa sistenm pe ariv ver son lafen, me nou travay pour prese e ansennyen pe akselere. (Iza. 60:22) Alors, nou kontinyen pres avek lantouzyasm e fer bokou zefor pour gard en latitid pozitif. Sa lot dimoun ki nou koz avek i kapab ekoute. Nou bezwen kontinyen prese! ‘Si nou azir koumsa nou ava sov nou lekor ek tou bann ki ekout nou.’—1 Tim. 4:16.