“Nou’n travay dan nou Teritwar plizyer Fwa!”
1 Eski ou’n deza santi ki ou teritwar in ganny travay ase souvan e ki i nepli annan ankor dimoun ki resanble mouton? Petet ou’n dir dan ou menm: ‘Mon konnen konman sa bann dimoun pou reazir. Akoz fodre kontinyen al kot sa bann ki pa enterese?’ I vre ki bokou teritwar i ganny travay souvan. Sepandan, sa i merit ganny vwar pozitivman, non pa negativman. Akoz? Not sa kat rezon ki’n ganny donnen pli ba.
2 Nou Lapriyer in ganny reponn: Zezi ti dir: “Rekolt i an labondans, me napa bokou travayer. Alor sipliy Propriyeter rekolt pour li anvoy bann travayer pou ranmas son rekolt.” (Lik 10:2) Pour plizyer dizenn lannen nou’n sipliy Zeova pour plis led. Konmela dan bokou landrwa, nou annan sa bann travayer siplemanter, e nou pe kouver bann teritwar pli souvan. Lefe ki Zeova in reponn nou lapriyer pa sa i merit fer nou zwaye?
3 Persistans i aport bon Rezilta: Menm dan bann teritwar ki souvan ganny travay, bann dimoun pe aksepte mesaz Rwayonm e pe ganny konnesans laverite. Alors, nou bezwen kontinyen ale e reale avek lespwar ki nou ava trouv plis dimoun ki annan leker senser. (Iza. 6:8-11) Parey bann premye disip Zezi ti fer, “al kontinyelman” kot bann dimoun dan ou teritwar, e trouv en mwayen pour revey zot lentere pour Rwayonm Bondye.—Mat. 10:6, 7, NW.
4 An Portigal, bokou kongregasyon i kouver zot teritwar tou le semenn, me zot kontinyen trouv bann ki resanble mouton. En ser an partikilye ti annan en latitid tre pozitif. I ti dir: “Avan ki mon konmans prese tou le bomaten, mon priy avek Zeova pour ed mwan trouv en dimoun ki enterese pour etidye Labib.” En zour i ti aranze pour fer en letid avek bann travayer dan en salon kwafir. Me, plitar, zis en dimoun ki ti vini pour letid. Sa dimoun ti dir: “Lezot pa enterese, me mwan wi.” Dan lespas en mwan, sa etidyan li menm ti pe diriz de letid Labib. Apre en pti pe letan i ti batize, e plitar i ti antreprann servis pionye!
5 Sa Travay pe ganny fer: Sa bon nouvel pe ganny prese, zis parey Zezi ti’n predir. (Mat. 24:14) Menm dan bann landrwa kot dimoun ‘pa oule ekout [nou],’ zot in ganny averti par sa aktivite predikasyon. Nou ekspekte ki enpe pour vin ensansib oubyen menm opoz laverite. Pourtan, se sanmenm sa bann ki merit ganny byen averti konsernan zizman Zeova ki tre pros.—Ezek. 2:4, 5; 3:7, 8, 19.
6 Nou pa ankor fini: I pa nou ki pou deside kan pour aret sa travay predikasyon. Zeova i konn egzakteman kan ki i pou terminen. I konnen si i ankor annan dimoun dan nou teritwar ki kapab aksepte sa bon nouvel. Ozordi, serten dimoun i dir ki zot pa enterese, me bann gran sanzman dan zot lavi—perdi travay, maladi grav, lanmor en dimoun pros—i kapab fer zot pli sansib prosenn fwa. Pour rezon prezidis oubyen akoz senpleman zot tro okipe, bokou dimoun pa’n vreman tande sa ki nou pe prese. Bann vizit amikal detanzaot i kapab atir zot latansyon e fer zot ekoute.
7 Bann ki’n grandi dan bann lannen resan e ki aprezan annan zot fanmiy pe pran lavi oserye e pe demann bann kestyon ki selman Parol Bondye ki kapab reponn. En zenn manman ti envit de ser Temwen kot son lakour e dir: “Letan mon ti ankor en pti fiy, mon pa ti zanmen konpran akoz mon manman pa ti antren bann Temwen e dir zot ki i pa enterese, kan zot ti senpleman anvi koz lo Labib. Mon ti fer mon lide ki ler mon pou’n gran, mon pou’n marye, e annan mon prop lakaz, mon pou demann bann Temwen Zeova pour vin eksplik mwan Labib.” Se sanmenm sa ki i ti fer e avek plezir sa de Temwen ti vin kot li.
8 Eski ou kapab vin pli efikas? Souvannfwa se pa dimoun ki nou zwenn dan teritwar ki fer sa teritwar difisil pour travay. Parfwa se nou menm. Eski nou konmans avek bann pwenn-vi negatif? Sa i kapab afekte nou latitid e probableman nou ton lavwa ek lenpresyon lo nou vizaz. Prezant ou dan en fason agreab avek en lespri pozitif. Esey en nouvo lapros. Varye ou prezantasyon, e esey amelyor li. Petet ou kapab sanz ou premye kestyon oubyen travay lo en verse Labib diferan dan ou konversasyon. Demann lezot frer ek ser ki sa ki’n fer zot reisi letan zot in travay dan teritwar. Travay avek diferan proklanmater ek pionye dan predikasyon, e note ki sa ki fer zot minister vin efikas.
9 Travay predikasyon lo Rwayonm i resevwar laprouvasyon ek benediksyon Zeova, e nou partisipasyon i montre nou lanmour pour li ek nou prosen. (Mat. 22:37-39) Annou kontiny nou travay ziska son lafen, san ki nou santi nou fatige pour travay dan teritwar detanzaot.