Predikasyon Rwayonm i sov Lavi!
1 Ozordi, i sa travay pli enportan ki pe ganny fer dan lemonn. Zeova Bondye, Zezi Kri, ek en gran kantite lanz in konsantre zot latansyon lo sa travay. Ki sa travay, e akoz i esansyel? I predikasyon lo Rwayonm, e i ede sov lavi!—Rom. 1:16; 10:13, 14.
2 Serten dimoun i panse ki nou ti pou pli byen ed lezot si nou ti esey amelyor lemonn otour nou. Bokou i antyerman okipe dan bann zefor pour anmenn lape, geri bann maladi, e amelyor lekonomi. Me kwa ki pou pli byen ed dimoun?
3 En Travay tre enportan: Se selman mesaz Rwayonm ki eksplik bi lavi, akoz imen pe soufer, e i sa sel lespwar asire pour lavenir. Sa bon nouvel i permet dimoun pour vin zanmi Zeova e alor resevwar “lape Bondye ki depas tou konpreansyon imen.” (Fili. 4:7) Selman sa mesaz Rwayonm ki donn gidans pratik pour ed dimoun fer fas avek bann problenm dan lavi konmela e eksplike konman pour ganny sove ler sa monn mesan i ganny detri dan lavenir. (1 Zan 2:17) Eski tousala pa i vo tou zefor ki nou kapab fer pour pres Rwayonm?
4 Par egzanp: Ki pli bon fason pour ed en vilaz ki son bann zabitan pe dormi e ki an danze akoz en danm delo pou kase tre byento? Retir delo par deryer sa danm? Fer zoli sa vilaz? Non! Sa bann zabitan i bezwen leve dan zot sonmey, ganny averti konsernan sa danze ki pe vini, e ganny ede pour sove! Bann ki pe dormi spirityelman i dan en danze tre serye. (Lik 21:34-36) Vi ki sa sistenm pe al ganny detri tre byento, annou pa tarde pour fer nou mye pour pres avek otan dimoun ki nou kapab!—2 Tim. 4:2; 2 Pyer 3:11, 12.
5 Kontinyen persiste: Annou rod fason pour zwenn plis dimoun ki senser avek sa bon nouvel—kot zot lakour, lo semen, par telefonn, e enformelman. Napa keksoz pli enportan ki nou kapab fer ki sa travay ki Zeova in donn nou pour fer. Si nou fer li avek zel, nou pou ‘sov nou lekor ek tou bann ki ekout nou.’—1 Tim. 4:16.