Servis aplentan i anmenn Lazwa
1 Konman en zenn, sirman ou’n reflesir en pe lo ou lavenir. Proverb 21:5 i dir nou ki “plan sa enn devoue i sertennman anmenn lavantaz.” I pou dan ou lavantaz pour ou reflesir seryezman lo ou bann lobzektif dan lavi. Ler ou fer ou plan pour lavenir, konsider antreprann servis aplentan. Akoz?
2 Demann serten adilt ki’n fer pionye pandan zot zenntan ki zot lenpresyon e zot tou zot pou dir ou menm keksoz: “Sa ti bann pli meyer lannen dan mon lavi!” En frer aze ki’n eksperyans lazwa dan servis aplentan depi son zenes ti dir: “I anmenn bokou satisfaksyon ler en dimoun i reflesir lo son zenntan e i kapab dir ki i’n aplik sa konsey saz: ‘Alor, mazin ou gran Kreater dan letan ou zenntan.’ ” (Ekle. 12:1) Ou ek ou paran zot bezwen fer en bon plan konmela menm, pour ki ou eksperyans sa kalite lazwa pandan ki ou ankor zenn.
3 Paran, ankouraz Servis aplentan: Zeova, konman en bon Papa, i montre ou egzakteman ki semen pour ale. (Iza. 30:21) An sa ki konsern fourni bann bon gidans, i etablir en bon legzanp pour ou konman bann paran Kretyen. Olye les ou zanfan swazir lo zot menm ki semen ki bon pour zot, avek sazes form zot dan sa semen ki zot devret ale afen ki zot pou ganny benediksyon Zeova. Apre, ler zot in vin pli aze, ou formasyon pou ed zot “fer diferans ant sa ki byen ek sa ki mal.” (Ebr. 5:14) Bann adilt i konnen dapre zot prop leksperyans ki zot pa kapab depan lo zot prop zizman; zot bezwen depan lo Zeova pour fer zot semen drwat. (Prov. 3:5, 6) Bann zenn i bezwen depan plis ankor lo Zeova vi ki zot napa bokou leksperyans dan lavi.
4 Paran, anmezir ki ou zanfan i apros bann lannen adolesan, oubyen menm pli boner, koz fran avek zot konsernan travay ki zot oule fer. Bann konseye lekol, ansennyan, ek kanmarad lekol pou esey enfliyans zot pour fer bann swa ki pou fer zot konsantre tou zot letan pour ganny larises. Ed ou zanfan pour swazir bann kour ki fourni formasyon pratik, ki pou ekip zot pour pran swen avek zot bann bezwen materyel san sakrifye lentere Rwayonm. (1 Tim. 6:6-11) Dan bokou ka, en ledikasyon nivo politeknik ansanm avek formasyon vokasyonnel oubyen aprantisaz i sifi pour pran swen avek bann nesesite lavi ler en dimoun i konmans fer pionye ordiner.
5 Ankouraz bann zenn pour reste selibater. E si plitar zot deside pour marye, zot pou dan en pli bon pozisyon pour desarz bann responsabilite pli lour dan lavi maryaz. (Vwar paragraf 19 dan sipleman Nou Minister Rwayonm Zen 2001 avek tit “Eski ou kapab fer ou disponib?”) Pa tarde pour enkilke dan bann zenn en dezir pour servi zot lavi dan en fason ki fer plezir Zeova, ki benefisye lezot, e ki anmenn lazwa pour zot menm, par koz dan en fason pozitif lo servis pionye, servi kot i annan en pli gran bezwen, servi dan Betel, e konman en misyonner.
6 Zenn, met Servis aplentan premye: Zenn pa fodre ki ou mazinen ki mannyer travay pionye i ete. Ou kapab esey fer li lo en baz amitan par fer pionye asistan nenport moman ki posib pandan lannen lekol e pandan vakans. Alors ou pou vwar konman ki servis pionye i vreman satisfezan! Eski ou’n fer plan pour fer pionye asistan pandan bann mwan ki pe vini?
7 Si ou en zenn frer dan lorganizasyon Bondye, reflesir osi seryezman konsernan aspir pour kalifye konman en asistan ministeryel. (1 Tim. 3:8-10, 12) Osi, deside si ou anvi fer en laplikasyon pour servis Betel oubyen pour asiste Lekol Formasyon Ministeryel ler ou ariv sa laz neseser. Ou leksperyans dan servis pionye pou ansenny ou bann leson enportan, tel parey konman pour viv dapre en progranm, konman pour pli byen organiz ou lekor, konman pour annan bann bon relasyon avek lezot, e konman pour vin pli responsab. Tousala pou prepar ou pour servi dan bann pli gran privilez plitar.
8 En fakter enportan pour reisi dan servis aplentan se pour annan en leta lespri pour travay dir dan bann aktivite teokratik. Zapot Pol ti ankouraz en tel latitid, e i ti fer resorti benediksyon ki i anmennen: “Dan tou sa ki zot fer, fer li avek tou zot leker konmsi zot pe travay pour [Zeova, NW ] . . . zot pou resevwar avek [Zeova, NW ] . . . zot rekonpans.” (Kol. 3:23, 24) Ki Zeova i beni ou avek bokou lazwa dan servis aplentan!