“Ou kapab vin en bon pionye!”

1. Ki mannyer en ser ti santi konsernan son servis pionye?

¹ “Mon pa ti pou’n zanmen kapab trouv okenn travay ki ti pou’n kapab anmenn en kantite benediksyon spirityelman.”Sa i sa ki Kathe Palm ti dir. Pour plizyer dizenn lannen, Kathe in demontre en leta lespri sakrifis par servi konman en pionye pour rann temwannyaz Sili, Sid Lanmerik, dan en bout ziska lot bout sa pei. Petet, apre ki i’n reflesir lo bann benediksyon ki bann ki dan servis a plen tan i gannyen dan zot lavi, en dimoun in deza dir ou: “Ou kapab vin en bon pionye!”

2. Eksplike akoz nou ganny vre satisfaksyon kan nou fer bann aktivite spirityel.

² En lavi satisfezan: Nou Model, Zezi, ti ganny vre satisfaksyon ler i ti pe fer lavolonte son Papa. (Zan 4:34) Alor, Zezi ti senser kan i ti ansenny son bann disip ki vre satisfaksyon i vin atraver fer bann aktivite ki annan pour fer avek ladorasyon Zeova. Nou ganny satisfaksyon kan nou santre nou lavi lo bann aktivite ki fer nou ganny laprouvasyon Zeova. An plis ki sa, anmezir nou donn plis nou letan, lenerzi ek resours pour ed lezot, nou ganny plis lazwa.—Akt 20:31, 35.

3. Ki lazwa nou kapab gannyen kan nou pas bokou letan dan predikasyon?

³ Pli nou pas letan dan predikasyon, pli nou ganny plis loportinite pour eksperyans sa lazwa ki en proklanmater i gannyen ler i konmans e kondwir letid Labib. Menm dan bann landrwa kot plizyer met lakour i kapab paret pa enterese, si nou amelyor nou abilite e ganny plis leksperyans dan predikasyon, nou pou kapab remarke ki nou teritwar i vin pli prodiktif ki nou ti panse avan. Bann pionye i kapab servi sa bon formasyon ki zot gannyen dan Lekol Pionye, en lekol ki zot ganny loportinite pour asiste apre ki zot in fer servis pionye pour en lannen. (2 Tim. 2:15) Anmezir nou persevere, i kapab ki nou pe senm lagrenn laverite ki pou prodwir fri plitar.—Ekle. 11:6.

4. Ki bann zenn ki pros pour fini lekol i devret reflesir lo la?

⁴ Zenn: Vi ki ou pros pour fini lekol, eski ou’n reflesir seryezman lo ou lavenir? Ziska prezan, leson lekol pe pran tou ou letan. Ki ou pou fer avek sa letan apre ki ou’n fini lekol? Olye rod en travay profann a plen tan, akoz ou pa konsider sa lobzektif pour fer pionye ordiner dan lapriyer? Ou pou devlop diferan abilite ki pou ed ou tou dilon ou lavi, tel parey rann temwannyaz avek diferan kalite dimoun, sirmont diferan lobstak dan ou lavi, devlop kontrol lo ou lekor ek abilite pour ansennyen.

5. Ki mannyer bann paran ek kongregasyon i kapab ankouraz bann zenn pour fer pionye?

⁵ Paran, eski ou pe fer ou par pour ed ou zanfan fikse servis a plen tan konman en lobzektif? Ou bon legzanp an parol oubyen aksyon i kapab fer bokou pour ed zot met lentere Rwayonm premye dan zot lavi. (Mat. 6:33) Ray, ki ti konmans fer pionye apre ki i ti’n fini lekol pos segonder i dir: “Mon manman ti touzour dir ki servis pionye i en aktivite ki anmenn plis satisfaksyon.” Par zot aksyon ek sipor tou dimoun dan kongregasyon i kapab ankouraz kanmarad pour fer servis pionye. Jose, ki sorti Lespanny, i dir: “Mon kongregasyon ti konsider servis pionye konman sa pli bon karyer pour bann zenn. Zot komanter, zot lapresyasyon ek led pratik ti fer li pli fasil pour mwan konmans fer pionye.”

6. Ki nou kapab fer si la konmela nou napa sa dezir pour fer pionye?

⁶ Sirmont bann lobstak: Me si i arive ki ou napa sa dezir pour fer servis pionye. Si ou santi koumsa o konmansman, priy Zeova e dir li, ‘Mon pa konnen si mon pou kapab fer servis pionye, me mon anvi fer sa ki fer ou plezir.’ (Ps. 62:8; Prov. 23:26) Apre rod son gidans dan son Parol e atraver son lorganizasyon. Bokou bann ki pe fer servis pionye ordiner ti konmans “gout” servis pionye par fer pionye asistan avan e sa lazwa ki zot ti gannyen ti pous zot pour fer en karyer dan servis a plen tan.—Ps. 34:8.

7. Ki mannyer nou kapab sirmont sa dout ki nou pa pou kapab arive fer sa 70 erdtan ki ganny rekomande tou le mwan?

⁷ Me si ou pa asire si ou pou kapab fer sa 70 erdtan ki ganny rekomande tou le mwan? Akoz ou pa koz avek bann pionye ki dan menm sityasyon ki ou? (Prov. 15:22) Apre met an ekrir plizyer progranm ki pou pli kapab adapte avek ou sityasyon. Ou pou remarke ki si ou fer letan pour prese, olye fer bann aktivite ki pa sitan enportan, i pou vin pli fasil ki ou ti pe mazinen.—Efe. 5:15, 16.

8. Akoz detanzaot nou bezwen re egzamin nou sityasyon?

⁸ Analiz ou sityasyon ankor: Sirkonstans i kapab sanze. I byen pour analiz ou sityasyon detanzaot. Par egzanp, eski ou pros pou al pran ou retret? Randy, ki’n pran son retret byen boner, i dir: “Sa desizyon ki mon’n fer in permet mwan konmans fer servis pionye ordiner ansanm avek mon madanm e sa in donn nou loportinite pour al reste dan en landrwa kot i annan en pli gran bezwen. Mon’n ganny bokou benediksyon pour sa desizyon ki mon’n fer, me parmi tou, sa pli gran benediksyon i en bon konsyans.”

9. Ki bann koup marye i devret reflesir lo la?

⁹ Avek letan serten koup in remarke ki i pa neseser pour zot tou le de travay a plen tan. I vre, sa i kapab fer ki lafanmir i bezwen senplifye zot fason viv, me i vo lapenn pour fer sa kalite sakrifis. John, ki tou resaman son madanm in kit son travay a plen tan pour li kapab fer plis dan minister, i dir: “Napa en pli gran lazwa ki mon kapab gannyen ki sa lazwa pour konnen ki mon madanm i okipe avek bann keksoz spirityel en lazournen antye.”

10. Kwa ki pous bann Kretyen pour konsider fer servis pionye?

¹⁰ I demontre nou lanmour ek lafwa: Zeova in fer travay predikasyon vin sa travay pli enportan ki nenport ki parmi nou i kapab fer. Sa lemonn i pros pour ganny detrir e zis bann ki kriy lo non Zeova ki pou ganny sove. (Rom. 10:13) En leker ranpli avek lanmour pour li ek rekonesans pour tou sa ki i’n fer pour nou pou motiv nou pour obeir sa komannman ki son Garson in donn nou, pour pres avek devouman. (Mat. 28:19, 20; 1 Zan 5:3) Deplis, lefet ki nou annan lafwa ki nou pe viv dan dernyen zour, sa pou pous nou pour fer tou sa ki nou kapab dan predikasyon konman i ankor annan letan olye profit plennman dan sa lemonn.—1 Kor. 7:29-31.

11. Ki mannyer nou devret santi si en dimoun i dir nou ki nou kapab vin en bon pionye?

¹¹ Fer servis pionye ordiner i plis ki zis nou pe reponn en lapel pour fer en serten kantite ler dan predikasyon, i en fason pour demontre nou devosyon anver Bondye. Alor si en dimoun i dir ou ki ou kapab vin en bon pionye, vwar li konman en konpliman e reflesir lo la dan lapriyer pour ou kapab zwenn bann ki pe fer sa servis pour Bondye, ki anmenn satisfaksyon.

[Ekstre lo paz 4]

Paran eski ou pe fer ou par pour fer ou zanfan fikse servis a plen tan konman son lobzektif?

[Ekstre lo paz 5]

Zeova in fer travay predikasyon vin sa travay pli enportan ki nenport ki parmi nou i kapab fer.