La i Lemoman pour prese!

1. Akoz la i lemoman pour prese?

¹ ‘Annan lakrent pour Bondye, e rann li glwar.’ Anba direksyon bann lanz, sa mesaz pe ganny anonse avek “tou nasyon, tribi, lalang, ek pep.” Akoz? ‘Parski ler zizman Bondye in arive.’ Ozordi, nou pe viv dan sa ‘ler zizman,’ ki pou fini avek destriksyon sa sistenm ki nou pe viv ladan. I tre enportan pour dimoun “ador sa Enn ki’n fer lesyel, later, lanmer ek bann sours delo.” Napa okenn lezot travay ki pe ganny fer ozordi ki kapab sitan enportan oubyen irzan ki pres sa “levanzil eternel.” Wi, la i lemoman pour prese!—Rev. 14:6, 7.

2. Ki mannyer bann serviter Zeova pe demontre ki zot rekonnet ki nou pe viv dan en letan irzan?

² Pandan sa dernyen 10 zan, bann serviter Zeova in pas preski 12 bilyon er-d-tan dan travay predikasyon e pour fer disip. Bokou zot in fer bann sanzman dan zot lavi pour kapab fer plis dan sa rekolt spirityel. (Mat. 9:37, 38) Par egzanp lannen pase, en mwayenn plis ki 850,000 proklanmater ti fer pionye sak mwan. Bann pionye ordiner i bezwen pas en mwayenn 70 er-d-tan sak mwan dan predikasyon. Bann pionye asistan zot, zot bezwen pas 50 er-d-tan.

3. Ki sanzman bann proklanmater i bezwen fer souvan pour kapab fer pionye?

³ Kwa ki neseser pour fer Pionye: Vi ki zot rekonnet ki “letan i kourt,” bann pionye i fer zefor pour gard zot lavi senp. (1 Kor. 7:29, 31) Zot rod fason pour redwir zot depans pour ki zot pa depans bokou letan dan zot travay profann. Par egzanp, serten in deside reste dan bann pli pti lakaz. Lezot in debaras zot avek bann keksoz materyel ki pa neseser. (Mat. 6:19-21) Souvannfwa, zot osi bezwen redwir lakantite aktivite personnel. Tousala i ganny fer avek lobzektif pour dedye plis letan ek latansyon pour predikasyon. (Efe. 5:15, 16) Avek perseverans, en leta lespri sakrifis, ek led Zeova atraver lapriyer, bokou proklanmater in kapab fer en progranm pratik ki ed zot fer pionye.

4. Ki bann pa pratik ki kapab ed ou atenn sa lobzektif pour fer pionye?

⁴ Eski ou kapab fer pionye? Akoz ou pa demann bann pionye ki pe reisi dan zot servis konman zot kapab fer li? Travay avek zot dan predikasyon, e eksperyans zot lazwa. Etidye bann lartik ki koz lo servis pionye dan nou bann piblikasyon. Etablir bann lobzektif pratik ki pou kapab ed ou fer pionye. Si i annan bann lobstak ki pe anpes ou fer pionye la konmela, mansyonn zot avek Zeova dan ou lapriyer e demann li pour ed ou rezourd zot.—Prov. 16:3.

5. Ki mannyer servis pionye i ed nou amelyor nou abilite dan predikasyon?

⁵ Benediksyon ek Lazwa: Servis pionye i amelyor nou abilite pour servi Parol Bondye, ki an retour i anmenn bokou lazwa. En zenn ser pionye ti dir: “I vreman en benediksyon pour kapab anons byen mesaz Parol Bondye. Ler ou fer pionye, ou servi Labib en kantite. Prezan ler mon al port-an-port, mon kapab mazin bann verse Labib ki apropriye pour sak dimoun.”—2 Tim. 2:15.

6. Ki formasyon en dimoun i gannyen atraver servis pionye?

⁶ Ler nou fer pionye nou osi kapab devlop bann skil ki itil dan nou lavi. I kapab ed bann zenn aprann konman pour plàn byen zot letan, ki mannyer mannyen zot larzan, e konman pour annan en bon relasyon avek lezot. Bokou i devlop en pwennvi pli spirityel lo lavi ler zot fer pionye. (Efe. 4:13) Anplis ki sa, souvan bann pionye i ganny sa privilez pour eksperyans led ek rekonpans Zeova dan zot lavi.—Akt 11:21; Fili. 4:11-13.

7. Ki mannyer servis pionye i ed nou vin pros avek Zeova?

⁷ Vin pros avek Zeova i kapab enn parmi bann pli gran benediksyon nou kapab gannyen ler nou fer pionye. Sa i kapab soutenir nou ler nou fer fas avek leprev. En ser ki ti andir gro difikilte ti dir: “Sa relasyon pros ki mon’n devlope avek Zeova ler mon ti pe fer pionye in ed mwan pour andir tou.” I ti azoute: “Mon tre kontan ki mon’n servi mon lavi konman en adilt pour servi Zeova aplentan. I’n permet mwan ofer mon lekor dan bann fason ki mon pa ti mazinen mon pou kapab.” (Akt 20:35) Nou osi, nou eksperyans bokou benediksyon ler nou fer tou sa ki nou kapab dan sa travay predikasyon, ki tre enportan.—Prov. 10:22.