Rasanble Dimoun sorti dan tou Langaz
1 Parol Bondye pe ganny akonpli! Dimoun “sorti dan tou langaz bann nasyon” pe aksepte vre ladorasyon. (Zeka. 8:23) Ki mannyer Temwen Zeova pe ed bann endividi sorti dan tou “tribi, pep, ek lalang” pour ganny konsidere konman pir devan Zeova, avek sa lespwar pour sirviv ‘sa gran ladetres’?—Rev. 7:9, 14.
2 Lorganizasyon Zeova i reazir: Konsey Direkter in fer laranzman pour bann piblikasyon disponib dan apepre 380 langaz pour ki tou dimoun lo later i konpran klerman lenportans sa bon nouvel. Pour prepar e pibliy piblikasyon dan sitan kantite langaz i en gran latas. I enkli rasanble bann tim tradikter kalifye e donn zot sa led ki zot bezwen pour tradwir nou piblikasyon dan tou sa bann langaz, osi byen ki pour enprim e anvoy sa bann piblikasyon. Rol prensipal i ganny zwe par sak proklanmater Rwayonm ki anmenn sa mesaz ki sov lavi kot bann dimoun.
3 Aksepte sa Defi: Dan bokou landrwa i annan bann gran group dimoun ki koz en lot langaz. Pour kapab partaz sa bon nouvel avek sa bann dimoun, bokou plis serviter Bondye pe fer zefor pour aprann langaz Sinwan, Ris, Espanyol, ek lezot langaz ki komen dan zot rezyon. Lezot pe aprann Langaz Siny. Isi Sesel, bann pti group dimoun sorti Lenn, Madagaskar, Filipin, Sri Lanka e serten parti Les Lafrik in vini pour travay oubyen pour rezon biznes. Parmi sa bann kominote, serten i koz en pti gin Angle oubyen Franse. Serten ki pa’n zanmen tann koz lo Zeova oubyen ki pa konn nanryen lo Labib pe aksepte laverite dan Parol Bondye.—Rom. 15:21.
4 Eski nou kapab fer plis zefor pour anons sa bon nouvel avek bann dimoun dan nou teritwar ki sorti dan lezot pei? (Kol. 1:25) Bokou kongregasyon pe organiz travay predikasyon dan landrwa kot bann etranze i reste. Bann proklanmater i premyerman aprann sifizaman sa langaz pour zot kapab donn en prezantasyon senp, tel parey: “Alo. La en bon nouvel pour ou. [Apre ofer li en trak ouswa en brosir ki disponib dan sa langaz.] Orevwar.” Zeova pe vreman beni sa bann pti konmansman!
5 Mesaz Rwayonm i atiran pour dimoun sorti dan diferan lorizin ek langaz. Annou sezi sa loportinite pour partaz li avek zot.