Ofer Piblikasyon dan Teritwar kot i annan Dimoun ki koz diferan Langaz
1. Akoz bokou kongregasyon i bezwen annan bann piblikasyon dan lezot langaz?
1 Dan bokou pei, bann proklanmater pe rankontre dimoun ki sorti dan lezot pei ki pe reste dan zot teritwar. Bokou parmi zot i aprann laverite pli vitman e zot byen konpran ler zot ganny ansennyen dan zot prop langaz. Ki laranzman i annan pour fourni bann dimoun ki enterese avek piblikasyon baze lo Labib dan sa langaz ki zot pli byen konpran?
2. Ki korperasyon ki neseser ler de oubyen plis kongregasyon ki koz diferan langaz i travay dan menm teritwar?
2 Kan pour ofer Piblikasyon: Ler de ou plis kongregasyon ki koz diferan langaz i travay dan menm teritwar, konsey bann ansyen ki dan sa bann kongregasyon, pou travay ansanm avek bann sirveyan servis pour etablir en laranzman ki akseptab. Sa i fer ki sak dimoun ki koz diferan langaz i ganny donnen en temwannyaz oprofon. Ler pe pres port-an-port, bann proklanmater pa pou ofer piblikasyon dan langaz lezot kongregasyon. Me ler bann proklanmater pe donn temwannyaz enformel ouswa pe pres dan bann landrwa piblik, zot kapab ofer piblikasyon dan langaz sa kominote.—Vwar Kwen Kestyon dan Nou Minister Rwayonm Oktob 1990 (Angle/Franse).
3. Kan ki en kongregasyon pou gard an stok bann piblikasyon ki dan lezot langaz?
3 Kan pour gard Piblikasyon an Stok: Ki nou kapab fer si i annan en gran kantite dimoun ki koz en lot langaz dan en landrwa me napa okenn kongregasyon ki koz sa langaz? Dan sa ka, bann kongregasyon i kapab gard an stok en pe piblikasyon ki disponib dan sa langaz, tel parey bann trak, brosir Ekspekte ek Zanmi Bondye, ek liv Konnesans. Bann proklanmater i kapab ofer sa piblikasyon nenport ler ki zot zwenn dimoun ki kapab lir sa langaz.
4. Konman proklanmater i kapab ganny piblikasyon dan en langaz ki kongregasyon napa an stok?
4 Konman pour rekomann Piblikasyon: Si kongregasyon napa piblikasyon dan sa langaz ki en dimoun enterese i lir, ki fodre fer pour kapab ganny sa piblikasyon? Sa proklanmater i devret tyek avek sa asistan ministeryel ki okip piblikasyon pour konnen ki piblikasyon ki disponib dan sa langaz. Si napa sa piblikasyon ki sa dimoun i oule dan kongregasyon, alor i kapab ganny rekomande avek prosenn demann piblikasyon pour kongregasyon. Lalis bann piblikasyon ki disponib dan sa langaz i kapab ganny vwar dan S-15. (Watchtower Publications list)
5. Si en proklanmater i byen bezwen en piblikasyon avan ki rekomann pou vini, kwa ki kapab ganny fer?
5 Kordinater pour piblikasyon oubyen en dimoun ki i’n swazir i kapab fer en rekomann avek biro brans atraver lapos. Sa piblikasyon pou ganny anvoye par bato lo ladres kongregasyon.
6. Ki nou lobzektif ler nou fer bann piblikasyon Kretyen disponib?
6 Annou byen servi bann piblikasyon Kretyen pour ed “tou dimoun,” nenport ki langaz zot koze, ‘pour ganny konnesans egzakt laverite e ganny sove.’—1 Tim. 2:3, 4.