Pa oubliy bann Frer ek Ser fidel ki aze
1 Menm si i ti en vev e i ti avanse dan laz, Ann ki ti annan 84 an “pa ti kit Tanp.” Zeova ti akord li en benediksyon spesyal akoz son fidelite. (Lik 2:36-38) Denozour, bokou frer ek ser i demontre en leta lespri parey Ann kantmenm zot pe fer fas avek bann sitiasyon difisil. Letan zot fer fas avek bann problenm lasante oubyen bann limitasyon akoz lavyeyes, zot kapab parler dekouraze. Annou konsider serten fason pratik kot nou kapab ankouraz zot e ed zot gard en bon progranm spirityel.
2 Renyon ek Predikasyon: I pli fasil pour sa bann frer ek ser ki fidel asiste renyon regilyerman, kan lezot i ofer pour donn zot pasaz. Sa i batir sa bann serviter ki fidel depi lontan spirityelman e menm benefisye kongregasyon osi. Eski ou pe partisip dan sa travay ekselan?—Ebr. 13:16.
3 Partisip regilyerman dan predikasyon i anmenn lazwa ek satisfaksyon pour bann vre Kretyen. Me pour bann ki aze e ki malad sa i kapab difisil pour zot fer. Eski i posib ki enn sa bann fidel i kapab akonpanny ou konman en “koleg travay” dan serten laspe predikasyon? (Rom. 16:3, 9, 21) Petet ou kapab envit li pour partisip avek ou dan temwannyaz par telefonn oubyen pour al avek ou lo en retourn vizit oubyen lo en letid Labib. Si sa ser oubyen sa frer aze pa kapab sorti kot son lakour, eski en etidyan Labib i kapab vin kot son lakour pour etidye?
4 Letid ek Lasosyasyon: Tanzantan, serten i envit en dimoun aze oubyen enn ki malad pour asiste zot letid fanmiy. Zot kapab menm al fer sa letid kot son lakour. En manman ti anmenn son de zanfan kot lakour en ser aze pour etidye zot dan liv Zistwar Labib. Zot tou zot ti ganny ankouraze par sa lasosyasyon. Bann dimoun koumsa i osi apresye ler zot ganny envite pour pran en repa oubyen pour lezot lokazyon. Si kondisyon en dimoun malad pa permet li pour resevwar en gran vizit, petet ti pou pli bon si ou telefonn li. Ouswa ou kapab fer en pti vizit pour lir, priye oubyen partaz en bon leksperyans avek li.—Rom. 1:11, 12.
5 Zeova i apresye bann frer ek ser fidel ki aze. (Ebr. 6:10, 11) Nou kapab imit li par eksprim nou lapresyasyon pour bann aze e ed zot pour gard en bon progranm spirityel.