Nouvo Laranzman pour Bibliotek Lasal Rwayonm

Depi bokou lannen, bann kongregasyon atraver lemonn in benefisye avek bibliotek Lasal Rwayonm, ki avan ti apel bibliotek Lekol Minister Teokratik. Dan lepase, i ti ganny konsidere konman neseser pour sak kongregasyon annan son prop bibliotek. Me vi ki konmela bokou Lasal Rwayonm pe ganny servi par plizyer kongregasyon, kot serten kongregasyon i koz en lot langaz, i paret pli bon pour annan zis en bibliotek. Sa bibliotek i bezwen byen ekipe, azour pour sak langaz dan sak Lasal Rwayonm. Dan bann batiman Lasal Rwayonm ki annan plis ki en lasal, sak lasal i devret annan en bibliotek pour sak langaz ki zot servi dan sa lasal.

Nou swete ki sa laranzman pou ede kree plis lespas e redwir depans. Deplis, zwenn bann bibliotek ansanm pour fer vin en sel i kapab kree en pli bon bibliotek. Ler sa bann bibliotek in zwenn ansanm, lezot kopi liv ki reste i kapab ganny garde e ganny servi plitar ler bann nouvo Lasal Rwayonm i ganny konstri. Si sa Lasal Rwayonm i annan en konpiter avek Watchtower Library lo CD-ROM, serten i kapab vwar sa zouti itil.

Pour sak bibliotek Lasal Rwayonm, en frer, preferableman en sirveyan Lekol Minister Teokratik, pou servi konman biblioteker. Gradyelman, i devret azout bann piblikasyon apropriye dan bibliotek, endik byen dan kouvertir sak piblikasyon pour montre ki i pour bibliotek Lasal Rwayonm. Omwen enn fwa par an, i devret tyeke si okenn piblikasyon pa manke e fer sir ki bann piblikasyon i dan bon kondisyon. Piblikasyon dan sa bann bibliotek pa devret ganny anmennen an deor Lasal Rwayonm.

Bibliotek Lasal Rwayonm i kontinyen ganny bokou apresye par bann ki asosye avek kongregasyon. Annou montre ki nou personnelman apresye sa laranzman par pran swen avek li e par servi li pour rod “konnesans Bondye.”—Prov. 2:5.