Kwen Kestyon

◼ Ler pe donn temwannyaz par telefonn, eski nou devret eksplik konsernan laranzman kontribisyon?

Ler nou donn en temwannyaz an personn, i kapab posib pour eksplike ki sa travay edikasyonnel lo Labib ki Temwen Zeova i fer i ganny soutenir par bann kontribisyon volonter e ki nou kontan pour aksepte bann tel kontribisyon. Me nou pa devret mansyonn bann kontribisyon ouswa laranzman kontribisyon ler nou pe donn temwannyaz par telefonn. Parski sa i kapab ganny mal enterprete konmkwa ki nou pe telefonn dimoun pour mandyan zot. Dan nenport ki fason, fodre ki dimoun i byen konpran ki minister Temwen Zeova pa komersyal.—2 Kor. 2:17.

◼ Ler pe donn temwannyaz par telefonn, ki nou pou fer si en dimoun i demande ki Temwen Zeova pa telefonn li ankor?

Swa sa dimoun i devret ganny respekte. Nou devret ekrir en not avek dat e osi non sa dimoun ki ti fer sa demann e met li dan lanvlop teritwar pour ki bann proklanmater i evite telefonn sa nimero dan lavenir. Lalis bann dimoun ki’n demande ki nou pa telefonn zot i devret ganny revwar enn fwa par an. Anba direksyon sirveyan servis, bann proklanmater eksperyanse e ki fer byen atansyon sa ki zot dir, i kapab ganny dezinyen pour kontakte sa bann dimoun pour vwar si zot ankor pa oule ki Temwen Zeova i telefonn zot.—Vwar Kwen Kestyon dan Nou Minister Rwayonm Zen 1994.