Annou gard nou Landrwa Ladorasyon dan en bon Kondisyon
1. Ki bi en Lasal Rwayonm?
1 Atraver lemonn i annan plis ki 94,000 kongregasyon Temwen Zeova. Laplipar kongregasyon i rasanble ansanm pour etidye Labib e asosye avek kanmarad kot en Lasal Rwayonm, ki ganny servi konman en sant pour ladorasyon pir.
2. Akoz i enportan pour kit Lasal Rwayonm prop e prezantab?
2 En Progranm Netwayaz regilye: Travay pour netway e mentenir Lasal Rwayonm i en par esansyel dan nou servis sakre. Liv Notre ministère lo paz 61-2 i dir: “Bann frer ek ser i devret konsider li en privilez pour pa zis siport Lasal Rwayonm finansyerman me osi pour pare pour ede gard li prop, prezantab e dan en bon kondisyon. Lasal Rwayonm i devret byen reprezant lorganizasyon Zeova, ki swa anndan ouswa an deor.” Vi ki Lasal Rwayonm i ganny servi plizyer fwa par semenn, i annan sa nesesite pour ki i ganny netwaye e mentenir regilyerman. Normalman sa i ganny fer par bann volonter dan bann kongregasyon ki rasanble dan sa Lasal Rwayonm. Parey dan letan biblik, bann serviter Zeova ozordi i devret travay dir pour “aranz e repar” nou landrwa ladorasyon.—2 Kron. 34:10.
3. Ki mannyer netwayaz Lasal Rwayonm i ganny organize, e lekel ki kapab partisip dan sa privilez?
3 En progranm netwayaz Lasal Rwayonm pour sak semenn i devret ganny mete lo bord. Tou group letid liv i devret fer sakenn son tour sak semenn pour netway lasal, par swiv en lalis bann keksoz ki bezwen ganny fer. Tou sa ki kapab i devret partisip dan sa privilez sak semenn pour gard Lasal Rwayonm prop e prezantab. Avek sirveyans paran, bann zanfan i kapab partisip dan netwayaz lasal. Sa pou ansenny zot pour montre lapresyasyon pour sa privilez. Sirtou ler plizyer kongregasyon pe servi en Lasal Rwayonm, bon korperasyon i neseser pour ki netwayaz lasal regilye pa tonm lo zis ennde.
4. Kwa ki devret ganny fer pour ki kongregasyon i konnen ki pou fer ler pe netway Lasal Rwayonm?
4 En lalis bann keksoz ki bezwen ganny fer i kapab ganny mete kot bann lekipman netwayaz i ete. Sa lalis i devret eksplik bann travay ki bezwen ganny fer sak semenn, tel parey pas balye, netway louverz, tir lapousyer lo kontwar, zet bin, pas mop ater, e netway laglas. I annan serten travay ki pa neseser fer regilyerman, tel parey netway byen miray, netway afon bann sez, rido, ek lalimyer oubyen fàn. Tou bann kemikal ki ganny servi pour netwaye i devret ganny garde dan en landrwa kot zanfan pa ganny akse avek e devret ganny byen idantifye. En leksplikasyon bref lo konman sak kemikal i ganny servi i devret ganny donnen.
5. Ki kantite enportan sekirite i ete, e kwa ki merit ganny tyeke detanzaot? (Vwar bwat lo paz 4.)
5 Sekirite kot Lasal Rwayonm i tre enportan. (Det. 22:8) Konsernan sa, sa bwat lo paz 4 i mansyonn serten keksoz ki devret ganny tyeke detanzaot pour evit aksidan.
6. Konman ki travay antretyen Lasal Rwayonm i ganny kordinen?
6 Antretyen Lasal Rwayonm: Konsey bann ansyen i responsab pour sirvey antretyen Lasal Rwayonm. Normalman, en ansyen ouswa en asistan ministeryel i ganny apwente pour diriz travay. I organiz fonksyonnman Lasal Rwayonm, par fer sir ki i ganny garde prop e dan bon kondisyon e ki i annan ase materyo netwayaz disponib. I enportan ki napa okenn keksoz ki kapab kree en danze pour dimoun ki swa dan lasal ouswa an deor. Ler de oubyen plizyer kongregasyon i servi menm lasal, bann konsey ansyen i apwent en komite pour fer bann laranzman pour pran swen avek sa batiman ek propriyete. Sa komite i travay anba direksyon bann konsey ansyen.
7. (a) Kwa ki ganny fer sak lannen pour fer sir ki Lasal Rwayonm i ganny garde dan en bon kondisyon? (b) Kwa ki demann en latansyon regilye? (Vwar bwat lo paz 5.)
7 En lenspeksyon detaye lo Lasal Rwayonm i ganny fer sak lannen. Bann ansyen i responsab pour fer bann laranzman pour pran byen swen avek okenn keksoz ki merit latansyon. Bann proklanmater i kapab ganny envite pour donn lanmen avek reparasyon ek antretyen ki bezwen ganny fer. Tou dimoun i devret fer en zefor pour aranz menm bann pti keksoz e devret pare pour pran swen avek bann keksoz ki merit latansyon.
8. Kan ki bann ansyen i kapab kontakte Komite Konstriksyon Rezyonal lo bann zafer antretyen?
8 Si bann ansyen i santi ki zot bezwen konsey ek lasistans pour pran ka avek antretyen Lasal Rwayonm, zot kapab kontakte biro Sesel ki an retour pou kontakte Komite Konstriksyon Rezyonal. Sa i kapab enkli bann keksoz tel parey reparasyon lo twa, sistenm erkonn, e rezourd problenm limidite dan batiman.
9. Ki prosedir ki devret ganny swiv si i neseser pour rod en kontrakter?
9 Servi byen Fon Kongregasyon: Laplipar travay lo Lasal Rwayonm e an deor i ganny fer par bann volonter. Zot zefor volonter i en bon fason demontre lanmour e i ed en kantite pour redwir depans ki kongregasyon i fer. Si i neseser pour rod en kontrakter pour fer serten travay, tel parey pour kontrol bann pes, bann ansyen i rod en kontrakter ki pe ofer en pli bon pri pour fer sa travay. Zot fer sa par premyerman prepar en dokiman an ekrir byen detaye konsernan travay ki bezwen ganny fer ek materyo neseser. En kopi sa lalis i ganny donnen avek diferan kontrakter pour ki zot tou zot propoz en pri avek menm konprenezon sa ki pe ganny demande. Apre ki bann ansyen in resevwar bann kotasyon, zot kapab swazir pli bon lof. Sa prosedir i devret ganny swiv menm si en frer in ofer pour fer sa travay ouswa pour fourni bann materyo neseser a en pri spesifik.
10. Kwa ki ganny fer pour fer sir ki fon kongregasyon i ganny byen servi?
10 Ler plis ki en kongregasyon i servi Lasal Rwayonm, sa komite i kapab gard en kont labank separe e donn bann rapor kont an ekrir avek sak konsey ansyen, pour fer bann ansyen konnen ki mannyer larzan pe ganny servi. Bann ansyen i responsab pour byen depans fon kongregasyon.
11. Ki fodre fer si en gro travay antretyen ouswa renovasyon i bezwen ganny fer?
11 Gro Travay antretyen ek Renovasyon: Ler sa komite i santi ki i neseser pour fer en gro travay an rapor avek fonksyonnman ouswa antretyen Lasal Rwayonm, zot refer sa ka avek bann konsey ansyen pour gidans. Si zot deside ki sa travay antretyen oubyen renovasyon pou neseser ouswa ki zot pou bezwen led avek bann dimoun ki pa servi sa Lasal Rwayonm, bann ansyen i kontakte Komite Konstriksyon Rezyonal atraver lofis Sesel. Sa bann frer kalifye e eksperyanse pou fourni bann sizesyon itil e ede siperviz sa travay. Si en gro depans i enplike, i pou neseser pour ganny pri egzakt e prepar en rezolisyon pour kongregasyon aprouve.—Vwar Kwen Kestyon dan Nou Minister Rwayonm Fevriye 1994 (Angle/Franse)
12. Konman nou kapab demontre nou lapresyasyon pour sa privilez pour asiste bann renyon dan Lasal Rwayonm?
12 Pa nou apresye en kantite nou privilez pour rasanble ansanm dan Lasal Rwayonm! Nou pa zanmen anvi negliz nou bann renyon ouswa pran zot alalezer. Pour fer sa provizyon kot nou ganny ankouraze deroul byen, nou tou nou kapab kontribye par partisip plennman pour pran swen avek nou Lasal Rwayonm. Sa i glorifye vre ladorasyon e i anmenn loner pour non Zeova. Annou determinen pour gard nou landrwa ladorasyon dan en bon kondisyon.
[Bwat lo paz 4]
Lalis Mezir Sekirite
◻ Silenn ki tenny dife (fire extinguisher ) i devret ganny mete dan en landrwa ki fasil pour ganny akse avek e ganny byen mentenir sak lannen.
◻ Lezot sistenm ki tenny dife ki konnekte avek delo i devret ganny enspekte e dapre lalwa.
◻ Landrwa sorti ek peron i devret ganny byen marke, annan ase lalimyer e fasil pour ganny akse avek. Balistrad i devret byen for.
◻ Stor, twalet, ek landrwa ki met palto i devret prop, annord, e napa bann keksoz ki kapab okazyonn dife. I pa devret annan bann keksoz personnel ek salte.
◻ Twa ek dalo i devret ganny enspekte e netwaye regilyerman.
◻ Trotwar ek parking i devret annan laklerte e devret napa okenn keksoz ki kapab fer dimoun glise ouswa tonbe.
◻ Sistenm elektrik, erkonn, ek fàn i devret ganny tyeke e byen ganny mentenir.
◻ Tou bann trou i devret ganny bouse pour anpes limidite.
◻ Batiman i devret ganny take ler napa personn ladan.
[Bwat lo paz 5]
Swen avek Batiman
◻ Deor: Eski twa, miray, lapentir, lafnet, ek lansenny Lasal Rwayonm i dan en bon kondisyon?
◻ Teren: Eski teren i ganny byen mentenir? Eski trotwar, baraz, ek parking i dan en bon kondisyon?
◻ Anndan: Eski karpet, rido, sez, sistenm elektrik ek plonbri, lapentir lo miray, kabinet piblikasyon, ek landrwa kot i met palto i prezantab?
◻ Lekipman: Eski lalimyer, son, fàn, ek erkonn pe byen fonksyonnen?
◻ Fasilite twalet: Eski zot prop e fonksyonn byen?