Felisitasyon i ankouraz nou
1 Lo son lili, avan ki i al dormi, en pti fiy ti dir an pleran: “Pa mon’n fer en bon pti fiy ozordi?” Sa kestyon ti sirprann son manman. Kantmenm i ti’n remarke ki kantite zefor son pti fiy ti’n fer pour esey byen konport li sa zour, sa manman pa ti ni menm eksprim en mo lapresyasyon. Larm sa pti fiy i devret servi konman en rapel ki nou tou—zenn konman vye—nou bezwen ganny felisite. Eski nou ankouraz lezot otour nou par eksprim nou lapresyasyon pour sa ki zot in byen fer?—Prov. 25:11.
2 Bann konpanyon Kretyen i donn nou en kantite bon rezon pour felisit zot. Bann ansyen, asistan ministeryel, ek bann pionye i travay dir pour akonpli zot bann responsabilite. (1 Tim. 4:10; 5:17) Bann paran ki annan lakrent pour Bondye i fer tou sa ki zot kapab pour elve zot zanfan dan semen Zeova. (Efe. 6:4) Bann zenn Kretyen pe lalit en kantite pour reziste ‘lespri lemonn.’ (1 Kor. 2:12; Efe. 2:1-3) Lezot i servi Zeova fidelman kantmenm zot laz pe avanse, problenm lasante, ouswa lezot leprev. (2 Kor. 12:7) Tou sa bann dimoun koumsa i merit ganny felisite. Eski nou rekonnet zot bann bon zefor?
3 Personnel e spesifik: Nou tou nou vreman apresye ler en frer lo lestrad i felisit kongregasyon an antye. Me felisitasyon i pli ankourazan ler i ganny dir avek nou personnelman. Par egzanp, dan sapit 16 dan son let pour bann Romen, zapot Pol ti spesifikman felisit Febe, Prisil ek Akilas, Trifenn ek Trifoz, ek Persid. (Rom. 16:1-4, 12) Pour sa bann dimoun fidel, parol Pol ti’n bezwen vreman ankouraz zot! Bann tel felisitasyon i reasir nou bann frer ek ser ki zot itil e i fer nou vin pli pre avek kanmarad. Eski ou’n felisit en dimoun resaman?—Efe. 4:29.
4 Avek Senserite: Pour ki nou felisitasyon i vin vreman ankourazan, i devret senser. Dimoun i kapab konnen si sa ki nou pe dir i sorti dan nou leker ouswa si zis nou “pe flate.” (Prov. 28:23) Anmezir ki nou fer zefor pour remark bann bon kalite dan lezot, nou leker pou pous nou pour felisit lezot. Fotespere ki nou touzour pare pour donn bann felisitasyon senser, vi ki nou konnen ki “en parol dan son bon moman, i vreman bon!”—Prov. 15:23.