Batir kanmarad ler nou pe prese
1 Nou tou nou apresye kan nou ganny ankouraze par “en parol ki ganny dir dan son moman apropriye.” (Prov. 25:11) Kan nou travay avek lezot dan predikasyon, ki mannyer nou kapab fer sir ki nou konversasyon i ankouraz lezot?
2 Konversasyon ki batir lezot: I vreman ankourazan pour enkli bann keksoz spirityel dan nou konversasyon pandan ki nou pe prese. (Ps. 37:30) Nou kapab koz lo nou prezantasyon oubyen rakont en leksperyans ankourazan ki nou’n apresye tou resaman dan predikasyon. (Akt 15:3) Eski nou’n aprann en pwen enteresan dan nou lektir Labib endividyel, bann nouvo magazin oubyen dan renyon? Nou kapab diskit bann pwen ki’n ganny diskite dan en diskour piblik ki nou’n tande resaman dan renyon.
3 Nou kapab santi nou dekouraze ler en met lakour i soulev en lobzeksyon ki nou pa kapab sirmonte. Nou pou benefisye si nou pran detrwa minit apre ki nou’n kit en lakaz pour konsider avek sa proklanmater ki nou pe pres avek lo ki mannyer sa lobzeksyon i kapab ganny sirmonte dan lavenir, petet par konsilte liv Reasoning. E si nou’n apresye en keksoz dan prezantasyon ki sa proklanmater ki nou ti pe pres avek in fer, en felisitasyon senser pou vin en sours lankourazman pour li.
4 Pran linisyativ: Eski i annan serten dan nou group letid liv ki nou pa ankor travay avek dan predikasyon tou resaman? Kan nou envit en dimoun pour akonpanny nou dan predikasyon, sa i permet ki nou ‘benefisye lankourazman’ kanmarad. (Rom. 1:12) Bann pionye ordiner ek asistan i apresye kan lezot i travay avek zot dan predikasyon, espesyalman dan granmaten oubyen tar dan apre midi, ler i annan mwens proklanmater ki pe prese. Nou kapab siport bann pionye par fer nou disponib pour akonpanny zot dan predikasyon. Eski i annan en proklanmater ki malad e son problenm lasante pa permet li fer bokou dan predikasyon? Kan nou fer laranzman pour zot akonpanny nou, petet lo en letid Labib, sa pou benefisye tou le de proklanmater.—Prov. 27:17.
5 Kan nou donn felisitasyon e demontre lapresyasyon menm dan bann pti keksoz i touzour en sours lankourazman. Nou bezwen gard sa antet ler nou pe travay avek lezot dan predikasyon, parski nou anvi kontinyen batir oubyen “fortifye kanmarad.”—1 Tesa. 5:11.