Fer plis ki zis reste trankil
1. Ki mannyer nou kapab imit legzanp zapot Pol kan nou pe pres avek lezot dan predikasyon?
1 Zapot Pol ti vwar sa letan ki i ti pase avek bann krwayan konman bann loportinite pour ‘benefisye avek lankourazman’ kanmarad. (Rom. 1:12) Kan ou pe pres avek en lot proklanmater dan predikasyon, eski ou profit sa letan pour ankouraz e ed li? Dan plas reste trankil, akoz ou pa eksplik li kwa ki’n ed ou pour vin en proklanmater efikas?
2. Ki nou kapab fer pour ankouraz nou konpanyon servis pour annan plis konfidans e akoz ki i enportan?
2 Ankouraz lezot pour annan plis konfidans: Nou kapab remark lekspresyon lo figir ek ton lavwa serten proklanmater ki mank konfidans dan zot lekor. Nou kapab donn zot plis konfidans par felisit zot senserman. Ki lezot fason pour donn zot plis konfidans? En sirveyan rezyonal pa ti ezite pour rakont son konpanyon servis sa lafreyer ki i ti annan e ki mannyer i ti bezwen kontinyelman priye pour sirmont sa santiman. En lot frer ti dir sa konsernan sa ki ti ed li pour annan plis konfidans: “I konmans avek en sourir. Parfwa mon bezwen priye pour ganny led pour fer sa pti sourir.” Eski i annan en keksoz ki’n ed ou pour annan plis konfidans dan predikasyon? Partaz li avek ou konpanyon servis.
3. Kwa ki nou kapab partaz avek nou konpanyon ki pou ed li vin pli efikas dan son minister?
3 Partaz ou leksperyans: Eski ou’n trouv en fraz, en kestyon oubyen en keksoz ki arive tou le zour pour konmans en konversasyon ki efikas? Eski ou’n ganny bann bon rezilta avek en prezantasyon ki ou’n aranz dan ou prop mo? Dir ou konpanyon. (Prov. 27:17) Letan ki ou pe al en retourn vizit, ou kapab rakont li ou bi pour sa vizit e ki mannyer ou’n plàn pour reisi. Apre ki letid in fini, ou kapab eksplik sa proklanmater akoz ki ou’n swazir pour koz lo serten pwen, verse oubyen fason ansennyen pour adres bezwen sa etidyan.
4. Akoz nou devret enterese pour ed lezot proklanmater?
4 Bann proklanmater premye syek pa ti zis enterese pour ed lezot. Zot ti osi vwar lenportans pour ankouraz e ranforsi kanmarad. (Akt 11:23; 15:32) Zapot Pol ti form Timote e ankouraz li pour partaz sa ki i’n aprann avek lezot. (2 Tim. 2:2) Kan nou pa oubliye pour fer dibyen lezot dan predikasyon, nou pa zis ogmant zot lazwa ek lefikasite me nou pe fer plezir nou Papa dan lesyel.—Ebr. 13:15, 16.