Amelyor nou abilite pour prese—Vin en konpanyon itil
Akoz i enportan: Zezi ti rekonnet sa lenportans pour pres avek en konpanyon. Alor kan i ti anvoy 70 disip pour pres par devan li, i ti anvoy zot de par de. (Lik 10:1) En konpanyon i kapab donn led neseser si sa lot proklanmater i rankontre en sityasyon difisil oubyen i pa asire konman pour reponn sa met lakour. (Ekle. 4:9, 10) I kapab partaz son leksperyans e ofer sizesyon ki kapab ed sa enn ki i pe travay avek pour vin en predikater pli efikas. (Prov. 27:17) I kapab osi ranforsi nou lafwa par son konversasyon ankourazan ler nou pe sorti kot en lakaz pour al kot en lot.—Fili. 4:8.
Ki mannyer pour fer li:
• Port latansyon ler ou konpanyon pe rann en temwannyaz. (Zak 1:19) Kan en verse pe ganny lir, swiv dan ou Labib. Sa pou ed ou kapab donn ou led si i neseser.
• Servi bon zizman pour konnen kan e si ou devret antre dan sa konversasyon. (Prov. 25:11) Si ou pe akonpanny en lot proklanmater dan en letid Labib, ou komanter detanzaot pou ganny apresye. Par kont, kan pe pres portanport, ou konpanyon servis pou plifere ki ou les li koze ler i’n ariv son tour. Byensir, si i en nouvo proklanmater oubyen i pa asire konman pour reponn en kestyon oubyen lobzeksyon, i pou kontan pour ganny ou led. Me ki swa ou pe akonpanny en proklanmater dan predikasyon portanport, retourn vizit oubyen letid Labib, pa bezwen enteronpe, antre dan konversasyon oubyen koz lo en diferan topik.
• Partaz ou leksperyans. Pa bezwen ezite, si detanzaot, ou kapab donn en sizesyon ki pou ed sa proklanmater ki ou pe travay avek pour vin pli efikas dan predikasyon. (Prov. 3:27) Dan en letan apropriye, ou kapab konmanse par dir: “Ki mannyer ou panse sa in pase?” oubyen “Eski mon kapab fer en sizesyon?” oubyen “La sa ki mon esey fer.” Gard antet menm si parfwa lezot i aksepte sizesyon, zot pou dekouraze si toultan ou pe atir latansyon lo zot fot.
Esey sa pandan sa mwan:
• Apre ki ou’n travay avek ou konpanyon servis dan predikasyon, dir li sa ki i’n dir ouswa fer ki’n fer li en konpanyon itil.