Vin en bon konpanyon travay kan ou pe pres portanport
1. Ki byenfe nou gannyen ler nou travay avek en lot proklanmater dan predikasyon?
1 En fwa, Zezi ti anvoy 70 disip prese “de par de.” (Lik 10:1) San dout sa laranzman ti permet bann disip pour ed e ankouraz kanmarad anmezir ki zot ti prese. Ler nou akonpanny en lot proklanmater dan predikasyon, ki mannyer nou kapab aport li nou led?
2. Ler nou konpanyon i fer son prezantasyon, ki mannyer nou devret ekoute e akoz?
2 Ler ou ekoute: Ekout atantivman ler ou konpanyon pe fer son prezantasyon. (Zak 1:19) Si i pe lir en verse Labib, swiv dan ou prop Labib. Get sa enn ki pe koze, i kapab swa ou konpanyon oubyen sa met lakour. Si ou byen atantif pandan sa konversasyon, sa i kapab ankouraz sa met lakour pour fer parey.
3. Kan ki nou konpanyon i kapab apresye ki nou partisip dan sa konversasyon?
3 Rekonnet kan i apropriye pour ou koze: Ler sa dimoun ki nou pe pres avek pe fer son prezantasyon, nou pou montre ki nou respekte li si nou les li diriz sa konversasyon. (Rom. 12:10) Nou devret evite enteronp li ler i pe koze. Si i oubliy sa ki i ti pe al dir oubyen sa met lakour i soulev en lobzeksyon ouswa kestyon e nou konpanyon i demann nou pour ed li, nou devret esey kontinyen koz lo sa menm size olye entrodwir en lot topik. (Prov. 16:23; Ekle. 3:1, 7) Si nou koze, sa ki nou dir i devret siport sa temwannyaz ki ti pe ganny donnen.—1 Kor. 14:8.
4. Ki mannyer ou pou trouv lazwa e ganny bon rezilta dan predikasyon?
4 Ler sa 70 disip ki ti pe pres par de ti’n fini prese, zot “ti retournen dan lazwa.” (Lik 10:17) Nou osi nou pou kapab trouv lazwa e ganny bon rezilta dan predikasyon si nou ekoute e rekonnet kan i apropriye pour nou koze pour ed sa enn ki nou pe pres avek portanport.