Nouritir spirityel kan i ler
1. Konman Ezekyel 36:29 pe ganny akonpli ozordi?
1 “Mon pou . . . apel sereal e fer li vin an gran kantite. Mon pa pou enpoz lafanmin lo zot.” Sa i parol Souvren Senyer Zeova. (Ezek. 36:29) Sa parol profetik i aplik pour pep Bondye ozordi. Dan en sans senbolik, Zeova in fer sereal ki prezerv lavi, pous an gran kantite pour son pep. Sa nouritir spirityel ki vin atan ki ganny fourni dan nou bann lasanble distrik i demontre sa.
2. Ki mannyer Zeova in servi bann lasanble distrik pour distribye nouritir spirityel kan i ler?
2 Dan sa lasanble ki ti ganny fer Columbus, Ohio, an 1931, Zeova ti diriz son bann adorater pour adopte en nouvo non—Temwen Zeova. (Iza. 43:10-12) An 1935, sa gran lafoul dan Revelasyon 7:9-17 ti korekteman ganny idantifye. An 1942, Frer Knorr ti donn en diskour ki annan pour tit “Lape—eski i kapab dire?” Sa diskour ti donn sa travay predikasyon, ki pe ganny fer partou lo later, plis lelan e i ti osi anmenn formasyon Watchtower Bible School of Gilead. Menm si serten lasanble i inoubliyab, sak lasanble in ofer nou en gran kantite nouritir spirityel nourisan ki ganny servi kan i ler.—Ps. 23:5; Mat. 24:45.
3. Ki nou devret fer pour nou benefisye avek sa festen spirityel dan nou lasanble distrik?
3 Eski ou pe byen manze? I posib ki nou antoure avek manze me pourtan nou kapab pa byen nouri si nou pa fer zefor pour manze. (Prov. 26:15) I menm zafer lo kote spirityel. Dan ennde lasanble, nou’n remarke ki bokou dimoun i mars marse an bonnavini ouswa koz avek lezot pandan progranm. Menm si bon lasosyasyon i en laspe enportan nou lasanble, me letan pour fer sa i avan e apre sak sesyon. (Ekle. 3:1, 7) Si nou pa dan nou plas pe ekout atantivman, nou kapab mank en pwen enportan. I kapab arive ki bann frer ki annan responsabilite dan lasanble ek bann frer ki fer bann diskour i trouv li neseser pour diskit serten keksoz konsernan lasanble pandan ki sesyon pe deroule. Me ler zot napa responsabilite, zot devret kit en legzanp par gard zot latansyon lo progranm. Personn pa devret mank okenn nouritir spirityel ki ganny fourni.—1 Kor. 10:12; Fili. 2:12.
4. Ki mannyer nou kapab montre nou rekonesans pour sa kantite nouritir spirityel ki Zeova i fourni?
4 Pa nou rezwir avek sa kantite laverite ki Zeova i fourni, kontrerman avek bann fo doktrin ki pa nourisan sorti kot Kretyente! (Iza. 65:13, 14) En fason ki nou montre nou rekonesans se par vwar lasanble konman en loportinite pour ganny ansennyen par Zeova. (Kol. 3:15) Konsantre lo sa mesaz ki pe ganny donnen, pa lo sa orater. Vwar sa mesaz konmsi i sorti kot nou “Gran Enstrikter.” (Iza. 30:20, 21; 54:13) Port bokou latansyon. Pran bann not an bref bann pwen enportan. Revwar bann pwen enportan lo progranm alafen sak zour lasanble. Aplik sa ki ou aprann.
5. Akoz nou rezwir nou bann lasanble distrik?
5 Tou lasanble ki ganny fer avan Armagedon, ki swa i ganny fer dan en kan refizye, dan en pei ki’n ganny desire par lager, ouswa dan en landrwa pli anpe, i en laviktwar lo Satan! Konman en lasosyasyon frer ini, nou apresye nou bann loportinite pour rasanble ansanm dan bann lasanble distrik. (Ezek. 36:38) Nou annan konfyans ki pour ankor enn fwa Zeova pou donn nou nou “rasyon manze kan i ler” avek lanmour.—Lik 12:42.
[Bwat lo paz 4]
Montre Lapresyasyon pour Latab Zeova
◼ Port bokou latansyon
◼ Not bann pwen enportan
◼ Revwar bann pwen enportan lo progranm alafen sak zour lasanble
◼ Aplik sa ki ou aprann