Ekoute e aprann
1. Akoz i demann zefor pour ekoute e aprann dan lasanble distrik?
1 Byento nou pou ganny nou lasanble distrik pour lannen 2013. En kantite travay in ganny fer pour kapab prepar en progranm ki adres bezwen bann frer ek ser dan lemonn antye. Eski ou’n fer laranzman pour asiste tou le trwa zour lasanble? Dan bann gran lasanble, i kapab annan bokou distraksyon, alors nou bezwen fer en kantite zefor pour byen konsantre lo progranm. Vi ki bann sesyon i pli long ki renyon kongregasyon, sa i fer ki i demann plis konsantrasyon. An plis ki sa, bann vwayaz ek lezot fakter i kapab fer nou pli fatige. Kwa ki kapab ed nou pour reste alert pour ki nou kapab ekoute e aprann?—Det. 31:12.
2. Ki mannyer nou kapab prepar nou leker pour progranm lasanble?
2 Avan lasanble i konmanse: Progranm lasanble enkli tit tou bann diskour e enn oubyen de verse kle pour sak diskour pou ganny mete lo nou sit ofisyel www.jw.org. Si nou annan akse avek Internet, nou kapab get sa lenformasyon davans. Sa i kapab ed nou pour prepar nou leker pour sa ki pe al ganny prezante. (Ezra 7:10) Pandan ou Ladorasyon Fanmir, eski ou kapab fer letan pour diskit lo sa progranm pour ki ou fanmir i byen prepare pour sa lasanble?
3. Kwa ki kapab ed nou byen ekoute?
3 Pandan progranm: Si i posib, al dan twalet avan progranm i konmanse. Tenny ou telefonn pangar dimoun i telefonn ou, oubyen teks ou oubyen menm ou ganny lanvi reponn pandan progranm. Si ou bezwen kit ou telefonn alimen, regle li dan en fason ki i pa pou distrer lezot an ka i sonnen. Si ou pe servi en tablet elektronik pandan progranm, servi li dan en fason ki pa pou distrer lezot. Evite manze oubyen bwar pandan progranm. (Ekle. 3:1) Kit ou lizye fikse lo sa orater. Kan en verse i ganny lir, swiv ansanm dan ou Labib. Pran bann not bref.
4. Ki mannyer paran i kapab ed zot zanfan pour ekoute e aprann?
4 Nou anvi ki bann zanfan osi i ekoute e aprann. Proverb 29:15 i dir: “En garson ki ganny lese san en kontrol pou fer son manman onte.” Alors, i byen pour sak fanmir asiz ansanm pour ki paran i fer sir ki zot zanfan i konsantre lo sa progranm dan plas koze, anvoy mesaz, oubyen mars marse. Menm si zot tro ptipti pour konpran tou sa ki pe ganny diskite, bann zanfan i kapab aprann pour pa dormi e asiz trankil.
5. Akoz i byen pour revwar progranm e konman nou kapab fer sa?
5 Apre ki progranm i fini sak zour: Pa antre tro tar kot ou pe reste. Al dormi ase boner pour ki ou ganny en bon repo. Si ou revwar sa ki ou’n aprann, sa pou ed ou pour mazin li pli lontan. Alors, ou pou pli byen benefisye si ou pran detrwa minit pour diskit sa progranm konman en fanmir tou le swar. Si ou pe al dan en restoran avek detrwa zanmi, akoz ou pa anmenn ou bann not avek ou e partaz enn oubyen de pwen enteresan ki ou’n apresye? Ler lasanble in fini, akoz ou pa pas en pe letan pandan ou Ladorasyon Fanmir pour diskit lo ki mannyer ou kapab aplik sa bann lenformasyon an fanmir. Ou kapab osi met letan dekote sak semenn pour revwar en porsyon sa bann nouvo piblikasyon ki nou gannyen dan lasanble.
6. Eski i ase zis pour asiste lasanble? Eksplike.
6 En bon repa napa en gran valer si ou pa pe manz li e dizer li. Nou kapab dir menm zafer konsernan sa festen spirityel ki nou pou gannyen pandan lasanble distrik. Nou pou pli byen benefisye si nou prezan tou dilon sa festen, ekout atantivman e aplik sa ki nou aprann.