“Ekoute e pran plis Lenstriksyon”
1 Liv Proverb i dekrir lasazes konmsi i pe lans sa lapel: “Ekoute, se lo bann keksoz enportan ki mon pe koze, e mon lalev in ouver pour ladrwatir. Mon annan konsey ek lasazes pratik. . . . Ekout mwan; wi, ere sa bann ki gard mon semen. Sa enn ki trouv mwan pou sertennman trouv lavi, e ganny bonn volonte sorti kot Zeova.” (Prov. 8:6, 14, 32, 35) Sa bann parol i dekrir byen sa lansennyman ki pe esper nou dan sa Lasanble Distrik “Bann Ansennyan Parol Bondye.”
2 Bezwen tou bann frer ek ser dan lemonn antye in ganny analize, e progranm sa lasanble in ganny prepare pour adres sa bann bezwen. Si i ganny aplike, sa lansennyman spirityel ek bann sizesyon pratik ki pou ganny ofer i kapab ed nou pour trouv boner, pour mentenir en bon relasyon avek Zeova, e pour reste lo semen ki anmenn ver lavi eternel. Sertennman, nou annan bon rezon pour “ekoute e pran plis lenstriksyon.”—Prov. 1:5.
3 Avan Progranm: Pour benefisye plennman avek sa ki pe ganny prezante, nou bezwen deza pe asize e pare pou byen ekoute letan progranm i konmanse. Fodre personnelman nou’n byen organize. En pwen fondamantal se ki ou konmans prepare byen boner. Al dormi boner sa swar. Lev ase boner pour donn sak dimoun dan ou group letan pour prepare e ganny en keksoz pour manze. Ariv boner kot landrwa lasanble pour ou kapab rod ou plas e pour fer lezot keksoz avan ki progranm i konmanse. Laport pou ouver 8 er bomaten, e progranm pou konmans 9 er edmi sak zour.
4 Vi ki premye bi pour rasanbleman i pour loue Zeova “parmi lafoul ki’n rasanble,” sak sesyon pour konmans dan en mannyer ki glorifye nou Bondye. (Ps. 26:12) Alor, tou i ganny ankouraze pour asize avan ki premye kantik i ganny anonse. Sa i an armoni avek sa lavertisman Biblik: “Fer tou keksoz byen e avek lord.” (1 Kor. 14:40) Ki sa i vedir pour sakenn ant nou? Ler ou vwar tyermenn asize lo platform pandan lentrodiksyon mizikal, pran ou plas toudswit. Sa pou permet ou partisip dan sak premye kantik avek tou ou leker, pour fer monte louanz anver Zeova.—Ps 149:1.
5 Pandan Progranm: Ezra “ti prepar son leker pour konsilte lalwa Zeova e pour fer li.” (Ezra 7:10) Konman nou kapab prepar nou leker pour resevwar lansennyman ki Zeova i donnen? Anmezir ki ou egzamin tit bann diskour ki lo progranm, demann ou lekor, ‘Ki Zeova pe dir mwan par sa progranm? Konman mon kapab servi sa bann lenformasyon pour benefisye mwan menm ek mon fanmiy?’ (Iza. 30:21; Efe. 5:17) Kontinyen demann sa bann kestyon toudilon lasanble. Pran not bann pwen ki ou’n deside servi. Pran letan pour diskit zot alafen sak sesyon. Sa pou ed ou gard e aplik sa bann lenformasyon.
6 I kapab en defi pour konsantre detrwa er-d-tan. Me, ki sa ki kapab ed nou pour reziste tandans pour mazin lezot keksoz pandan progranm? Pa bliye ki lizye i kapab kontrol nou. Sa ki nou fikse nou lizye lo la i domin nou latansyon. (Mat. 6:22) Donk, reziste sa tandans pour diriz ou latet ver tou tapaz oubyen mouvman. Konsantre lo sa orater. Swiv dan ou Labib letan en teks i ganny lir, e gard ou Labib ouver letan sa teks pe ganny diskite.
7 Lanmour Kretyen pou pous nou pour evite deranz lezot letan progranm i an progre. (1 Kor. 13:5) I “en letan pour reste trankil” e ekoute. (Ekle. 3:7) Alors, evit bann konversasyon ki pa neseser ek bann marsaye. Fer plan davans kot ou pou kapab redwir al dan twalet. Pa manze oubyen bwar ziska moman apropriye, amwen problenm lasante grav i enplike. Sa bann ki anmenn telefonn mobil, bann resepter lapel, bann kanmera pa devret servi zot dan en fason ki pour distrer lezot. Paran i devret aranze ki lafanmiy antye—enkli bann adolesan—i asiz ansanm avek zot, pour zot kapab siperviz zot zanfan.—Prov.29:15.
8 Lannen pase en ansyen ki ti’n asiste bann lasanble pour bokou lannen ti obzerve: “Mon ti santi ki sa lasanble ti remarkab pour en lot rezon. Preski tou dimoun dan lodyans ti pe pran bann not, enkli bann pti zanfan. Ti en plezir pour vwar. Labib ti byen ganny servi letan bann orater ti demande pour ouver pour rod serten pasaz.” Sa kalite latansyon i vreman admirab. I pa anmenn benefis zis pour nou e pour lezot delege sa lasanble me pli enportan se ki i glorifye nou Gran Ansennyan, Zeova Bondye.—Iza. 30:20.