Rasanble ansanm pour loue Zeova
1. Ki tenm lasanble, e akoz nou merit loue Zeova?
1 Zeova i tou pwisan, i annan en gran lasazes, son lazistis i parfe, e i model siprenm lanmour. Etan Kreater, sa Enn ki donn lavi, e sa Enn ki pli o dan liniver, se li tousel ki merit nou ladorasyon. (Ps. 36:9; Rev. 4:11; 15:3, 4) Lasanble Distrik pour sa lannen “Donn Bondye Laglwar” pou fer nou pli determinen pour loue li konman sa sel vre Bondye.—Ps. 86:8-10.
2, 3. Konman ki bon preparasyon i ed nou pour benefisye plennman?
2 Bon preparasyon i neseser: Pour nou benefisye plennman avek sa festen spirityel ki Zeova in rezerve pour nou, nou bezwen byen prepare. (Efe. 5:15, 16) Eski ou’n fini fer bann laranzman pour landrwa reste, transpor, ek zour òf kot ou travay oubyen kot lekol? Pa les ariv dernyen minit pour fer sa bann keksoz enportan. Si ou tarde pour demann zour òf, ou kapab mank en parti sa lokazyon spesyal. Nou tou nou devret prezan pour tou sesyon.
3 Fer li ou lobzektif pour ariv boner kot landrwa lasanble sak zour. Sa pou ed ou pour asiz dan ou plas avan kantik louvertir e annan en bon leta lespri pour resevwar lenstriksyon ki pou ganny prezante. Laport pou ouver 8 er bomaten sak zour. Silvouple pa rezerv plas asize eksepte pour manm ou fanmiy oubyen pour bann ki’n vwayaz avek ou.
4. Akoz tou dimoun i ganny demande pour anmenn zot dezennen kot lasanble?
4 Tou dimoun i ganny demande pour anmenn zot dezennen olye kit landrwa lasanble pour al rod manze pandan poz midi. Ou korperasyon anver sa laranzman i kontribye pour kree en bon latmosfer e permet ou annan plis letan pour asosye avek bann konpanyon Kretyen. (Ps. 133:1-3) Silvouple kit antet ki bann sopin e osi labwason alkolik pa devret ganny anmennen dan landrwa lasanble.
5. Konman nou kapab konmans prepar nou leker pour lasanble?
5 Ekoute e aprann: Ezra ti priy en kantite pour prepar son leker pour resevwar parol Bondye. (Ezra 7:10) I ti ouver son leker anver lansennyman Zeova. (Prov. 2:2) Nou kapab konmans prepar nou leker pour lasanble menm avan nou kit nou lakour par medit lo tenm lasanble e diskit li avek nou fanmiy.
6. Kwa ki kapab ed nou gard nou latansyon lo progranm? (Vwar bwat.)
6 Dan en gran lasal, i annan en kantite keksoz ki nou kapab vwar e antann ki atir nou latansyon. Bann tel distraksyon i kapab fasilman anpes nou konsantre lo sa ki sa orater pe dir. Ler sa i arive, nou pa arive resevwar lenformasyon ki itil. Bann sizesyon ki trouve dan sa bwat i kapab ed nou pour amelyor nou konsantrasyon.
7, 8. Ki mannyer nou kapab montre konsiderasyon pour lezot?
7 Montre Konsiderasyon pour Lezot: Bann kanmera i kapab ganny servi pandan progranm, me pour evite deranz lezot, servi li dan ou plas asize. Bann telefonn mobil i devret ganny regle pour pa deranz lezot. Okenn lekipman personnel pa devret ganny konnekte avek sistenm son ek elektrik dan landrwa lasanble.
8 Nou sertennman pe esper avek enpasyans pour rasanble ansanm pour loue Zeova! Annou determinen pour glorifye li par asiste tou sesyon, par ekout atantivman, e par aplik sa ki nou aprann.—Det. 31:12.
[Bwat lo paz 3]
Ekoute dan bann Lasanble
▪ Reflesir lo tit bann diskour
▪ Get bann verse
▪ Pran bann not
▪ Swazir bann pwen ki ou deside aplik dan ou lavi
▪ Reviz sa ki ou’n aprann