“Annou loue son Non ansanm”
1. Ki loportinite nou pou annan pour loue non Bondye ansanm, e ki nou kapab fer konmela pour prepare?
1 En psalmis ti sante: “Glorifye Zeova avek mwan, . . . e annou loue son non ansanm.” (Ps. 34:3) Nou Lasanble Distrik “Mars avek Bondye” ki pe vini, pou donn nou loportinite pour loue non Zeova ansanm avek nou bann frer ek ser sorti dan lezot kongregasyon. Eski ou’n fer laranzman pour landrwa reste, transpor, ek konze dan travay? I bon si nou fer sa bann keksoz byen davans.—Prov. 21:5.
2. Akoz i byen pour fer plan pour ariv kot landrwa lasanble boner?
2 Ler nou ariv kot Landrwa Lasanble: I annan en kantite keksoz nou bezwen fer ler nou asiste en lasanble. Sorti boner kot lakour pour al lasanble pou ed nou fer fas avek bann retar san ekspekte ki kapab arive. I pou osi permet nou trouv en plas byen boner pour nou partisip dan kantik louvertir ek lapriyer avek tou nou leker. (Ps. 69:30) Ennde minit avan sesyon i konmanse, tyermenn pou asiz lo lestrad pandan ki melodi Rwayonm i ganny zwe. Nou tou nou devret pran nou plas pandan sa letan pour ki progranm i kapab konmans dan en fason ki demontre dinite.—1 Kor. 14:33, 40.
3. Ki mannyer nou kapab montre konsiderasyon pour lezot ler nou pe rod plas?
3 Parol Bondye i konsey nou pour ‘fer tou nou keksoz avek lanmour.’ (1 Kor. 16:14) Ler laport i ouver 8 er bomaten, konsiderasyon pour lezot pour anpes nou taye e pouse pour rod bann plas ki nou prefere avan lezot. Nou kapab anmas plas pour zis bann dimoun ki’n vin dan menm transpor avek nou ouswa bann ki pe viv ansanm avek nou dan menm lakour.—1 Kor. 13:5; Fili. 2:4.
4. Ki laranzman nou kapab fer pour poz midi, e konman sa i itil?
4 Silvouple anmenn nou dezennen olye kit landrwa lasanble pour al rod manze pandan poz midi. Sa pou permet tou dimoun rezwir sa bon lasosyasyon e pour prezan ler sesyon apremidi i konmanse. Si i neseser, ou kapab anmenn en pti bwat (icebox) pour pa pran tro bokou plas. Bann gro bwat (icebox) ki kapab pran en kantite manze, sopin ek labwason alkolik pa devret ganny anmennen dan landrwa lasanble.
5. Ki mannyer nou kapab prepar nou leker pour sa lenstriksyon ki nou pou gannyen?
5 En Festen spirityel pe esper nou: Lerwa Yeosafat ti “prepar [son] leker pour rod sa vre Bondye.” (2 Kron. 19:3) Ki mannyer nou kapab prepar nou leker avan lasanble? Bann lartik lo dernyen paz Réveillez-vous! le 22 Me ek le 8 Zen i fourni en apersi sa festen spirityel ki pou ganny servi. Akoz ou pa pran letan pour reflesir lo sa bann lartik, e devlop antisipasyon pour sa ki Zeova in anmas pour nou? Prepar nou leker i osi enplik demann Zeova pour ed nou byen konpran sa lenstriksyon ki nou pou gannyen e pour met li an pratik.—Ps. 25:4, 5.
6. Ki nou anvi, e akoz?
6 Nou tou nou anvi aprann plis lo Parol Bondye, akoz nou realize ki par mwayen son Parol nou kapab ganny sove. (1 Pyer 2:2) Alor, annou prezan dan nou Lasanble Distrik “Mars avek Bondye” e ‘loue non Zeova ansanm.’—Ps. 34:3.
[Bwat lo paz 3]
Fason pour loue Non Bondye
◼ Prepare davans
◼ Demontre lanmour pour lezot
◼ Prepar ou leker