Port Latansyon lo Bann Deklarasyon Sakre
1 Pa tou keksoz ki zonm i dir ki nou merit port en latansyon spesyal. Me ler Bondye i koze, i annan rezon endispansab pour ekoute. (Det. 28:1, 2) Granmersi, bann zonm enspire in rikord “sa bann deklarasyon sakre Bondye” pour nou benefis. (Rom. 3:2) Nou lasanble trwa zour sa lannen pour ofer loportinite presye pour nou antann sa bann deklarasyon sakre ler zot pou ganny lir e diskite. Koman ki ou kapab port latansyon spesyal?
2 Ariv Boner Sak Zour: Imazin leksitasyon bann Israelit ler zot ti ganny enformen ki zot pou rankontre Zeova lo Montanny Sinai pour antann son Lalwa! (Egz. 19:10, 11, 16-19) Si ou annan menm latitid pour resevwar lenstriksyon Zeova pandan lasanble distrik, ou pou fer laranzman pour ariv boner sak zour. Nou pa pou kapab antann progranm an antye si nou antre tar e enteronp lezot ler nou pe rod plas pour asize. Laport pou ouver 8 er bomaten, e progranm i konmans 9 er edmi sak zour.
3 Menm bann ki’n ariv boner pa touzour dan zot plas ler sesyon i konmanse. Akoz sa? Zot esper ziska ki tyermenn i entrodwir kantik louvertir pour zot aret konverse avek zot zanmi e la konmans al dan zot plas. Nou devret remarke ki detrwa minit avan kantik louvertir pour sak sesyon, tyermenn pour asize lo platform pandan ki lentrodiksyon lanmizik Rwayonm i ganny zwe. Sa i sinyal nou ki’n ler pour asize! Alor ler kantik louvertir i ganny anonse, nou pou pare pour ansanm sant bann louanz pour Zeova.
4 Ekout Ansanm an Fanmiy: Ler bann deklarasyon sakre ti ganny lir devan kongregasyon bann Israelit, bann fanmiy, enkli “bann zanfan” ti bezwen ekoute e aprann. (Det. 31:12) Dan nou bann lasanble, bann zanfan pa devret ganny ‘lese lo zot menm.’ (Prov. 29:15) Paran, aranze pour ki ou fanmiy antye i asiz ansanm—enkli bann adolesan. Serten paran i esper zis ler konmansman kantik louvertir pour anmenn zot zanfan dan twalet. Sepandan, sa pa pou montre bann zanfan gran lenportans ki kantik ek lapriyer i annan dan nou ladorasyon. Eski pa i pou pli meyer pour pran prekosyon pour al dan twalet avan konmansman sak sesyon si i posib?
5 I pou ed nou pour ekoute si nou dormi boner aswar e evite pour pran bann repa lour pandan lazournen. Konsantre lo sa ki orater pe dir. Pa les ou lespri al pronmnen. Swiv dan Labib ler bann teks pe ganny lir. Pran bann not bref. Ler sak diskour pe ganny prezante, revwar dan ou lespri kwa ki sa orater in dir e konsider koman ou kapab met an aplikasyon sa lenformasyon. Alafen lazournen, diskit lo sa progranm an fanmiy. Ki pwen ki sakenn in apresye? Dan ki fason ki ou fanmiy i kapab servi sa lenformasyon?
6 Montre Respe pour Parol Bondye: Bann lasanble i donn nou en bon loportinite pour koz avek zanmi e rezwir bann bon lasosyasyon. An arivan boner, nou pou annan letan pour konverse avan ki progranm i konmanse. Toudmenm, serten i angaz dan konversasyon pandan progranm, an pansan ki sa pa fer en gran distraksyon dan en gran lasal. Menm kan bann renyon i ganny fer dan en landrwa pli gran ki labitid i osi en letan pour ekoute zis parey dan bann renyon dan Lasal Rwayonm. Nou pa devret les bann telefonn mobil, bann resepter lapel, bann kanmera koz distraksyon pandan progranm.
7 Pandan ki Zeova ti pe donn Moiz Lalwa, “Moiz pa ti manz dipen e pa ti bwar delo.” (Egz. 34:28) Pareyman, i pa pou apropriye pour manze oubyen bwar pandan ki sesyon lasanble i an progre. Amwen bann problenm lasante grav, esper ziska “letan fikse” pour sa.—Ekle. 3:1.
8 Dan serten lasanble, i kontinyen annan en problenm kot bokou frer ek ser e menm bann zanfan i ale vini an deor lasal dan larantre, pandan sesyon. Bann manm servis lakey pou ganny enstri pour demann sa bann pour retourn dan zot plas. Bann volonter ki pe travay dan lezot servis i devret pe asize dan lodyans osito ki zot travay in konplete. Amwen ki bann volonter in ganny dezinyen pour fer en travay esansyel pandan sesyon, zot devret dan zot plas, pe ekout progranm. Zot pa devret reste dan bann departman, vizit kanmarad pandan sesyon.
9 Nou pa pou anvi fer lasour-d-orey kan nou pe ekout Parol Bondye. (Ebre 5:11) Annou alor rezoli pour montre respe ki merite, an ekoutan atantivman ler bann deklarasyon sakre Bondye pou ganny diskite dan prosen lasanble trwa zour.