“Rasanble lepep”

1. Ki similarite i annan ant lasanble distrik e enternasyonal ek sa moman kot bann Izraelit ti rasanble ansanm en pti pe letan apre ki zot ti’n kit Lezip?

¹ En pti pe letan apre ki zot ti’n kit Lezip, Zeova ti donn lord Moiz pour “rasanble lepep” kot Montanny Sinai pour tann son bann parol pour ki zot ava annan lakrent pour li e enstri zot bann garson son bann lalwa. (Det. 4:10-13) Sirman sa ti en moman inoubliyab e i ti fortifye zot lafwa! Pandan sa bann prosen mwan, pep Zeova pou rasanble ansanm dan bann lasanble distrik e enternasyonal kot zot pou ganny enstri par Zeova. Ki nou devret fer pour ki nou benefisye plennman?

2. Ki nou devret fer pour ki nou “met nou pare” pour sa lasanble?

² “Met zot pare”: Zeova ti donn lord bann Izraelit pour “met zot pare” pour sa rasanbleman kot Montanny Sinai. (Egz. 19:10, 11) Pareyman, tou bann ki pe vin asiste sa lasanble distrik i bezwen byen prepare, pa zis bann ki pe partisip dan sa progranm. Par egzanp, bokou pou bezwen fer laranzman kot zot travay pour pran konze. Petet ou sityasyon i parey avek Neemya. I ti anvi kit son travay konman serviter Lerwa Artakzerses pour ki i kapab al Zerizalenm pour ede rekonstri miray, me i ti konnen ki lerwa ti kapab pa aksepte. Neemya ti fer en lapriyer e avek kouraz i ti prezant son demann avek lapresyasyon. Sa lerwa ti permet li pour ale e menm donn li sa sipor ki i ti bezwen pour sa proze konstriksyon. (Nee. 2:1-9) An plis ki demann zour konze avek ou anplwayer, eski ou’n fer laranzman vwayaz ek landrwa kot ou pou reste? Bann ansyen pou kontan pour ed tou bann ki bezwen led. Fer laranzman pour ariv boner sak zour e pare pour “port en pli gran latansyon” lo sa ki ou pou tande.​—Ebr. 2:1.

3. Kwa ki pou ed nou pour prepar nou leker pour sa progranm?

³ En lot keksoz enportan dan nou preparasyon se ki nou bezwen prepar nou leker pour ki nou ekoute e aprann. (Ezra 7:10) Progranm lasanble pou ganny mete davans lo sit jw.org avek lalis tou bann tit diskour ansanm avek enn ou de teks Labib pour sak diskour. Sa i donn bann bon lenformasyon pour egzaminen dan Ladorasyon Fanmir pandan bann semenn ki pros avek lasanble. Serten proklanmater i enprim en kopi sa progranm pour zot pran not pandan lasanble.

4. Ki mannyer bann paran i kapab servi sa lasanble pour ansenny zot zanfan?

⁴ ‘Ansenny ou bann garson’: Enn parmi bann rezon pour sa rasanbleman kot Montanny Sinai i ti pour bann paran Izraelit “ansenny zot bann garson.” (Det. 4:10) Lasanble distrik i donn paran sa loportinite pour fer parey. Bann paran i devret fer zot zanfan asiz o bor zot pandan progranm e ed zot pour ekoute. A lafen sak zour e pli tar dan Ladorasyon Fanmir, bann fanmir i kapab diskit sa progranm ansanm.

5. Ki mannyer nou pou benefisye par asiste sa prosen lasanble distrik?

⁵ Sa rasanbleman enportan kot Montanny Sinai ti ed bann Izraelit pour apresye zot privilez inik pour form parti pep Bondye. (Det. 4:7, 8) Nou lasanble distrik ki pe vini byento i ganny fer dan en fason ki pou benefisye nou parey. Pour trwa zour nou pou kapab sorti dan sa move lemonn Satan e rezwir sa rafresisman spirityel ek sa lasosyasyon ankourazan dan nou paradi spirityel. (Iza. 35:7-9) Vi ki zour Zeova i pros, annou pa abandonn sa loportinite pour zwenn ansanm avek lezot pour partaz lankourazman.​—Ebr. 10:24, 25.