Lanmizik ki soulaz nou
1 Sante ek lanmizik i en laspe enportan vre ladorasyon. Dan ansyen Izrael, Azaf ek son bann frer ti sante: “Remersi Zeova, zot lepep. . . . Sant pour li, fer melodi pour li, enteres ou avek tou son bann travay merveye.” (1 Kron. 16:8, 9) Ozordi nou sant kantik pour Zeova dan nou bann renyon sak semenn. (Efe. 5:19) Pa sa i en bon loportinite pour loue son non!—Ps. 69:30.
2 Ler nou ekout Mélodies du Royaume, ki lo kaset oubyen CD, sa i kapab ranpli nou lespri avek bann panse spirityel. En ser ti eksplike: “Anmezir ki bann melodi pe zwe, mon rapel bann parol sa kantik. Sa i en bon fason pour gard Zeova dan mon lespri pandan ki mon pe apresye bann zoli lanmizik.”—Fili. 4:8.
3 Bann Moman pour apresye zot: Ler nou zwe Mélodies du Royaume dan lakour i kapab kree en bon latmosfer spirityel ki kontribye pour annan lape dan fanmiy. En fanmiy ti ekrir: “Nou zwe li en kantite dan lakour e dan loto. Nou pa zanmen fatige ekout sa zoli laranzman lanmizik. Souvannfwa Mélodies du Royaume i donn nou sa bon leta lespri ler nou pe prepare pour al renyon ouswa ler nou pe al lasanble.” En ser ti dir: “Mon santi mwan zwaye ler mon ekout sa lanmizik pandan ki mon pe fer mon louvraz. Lekel ki ti pou mazinen ki mon zwaye ler mon pe ploy mon lenz? Mon deside zwe sa lanmizik ler mon moral i ba. Sa lanmizik i fer ou vreman zwaye! . . . Sak kantik i fer ou mazin lakontantman.” Ki bann moman kot sa bann lanmizik ankourazan ti pou benefisye ou?
4 Laplipar lanmizik ozordi i reflekte leta lespri lemonn. Paran i kapab ed zot zanfan devlop en gou pour bann bon kalite lanmizik par byen servi bann lanrezistreman Mélodies du Royaume. Bokou etidyan Labib ek bann dimoun enterese ti pou kontan pour konn konsernan sa bann zoli kantik, ki glorifye Zeova e ki soulaz nou.—Ps. 47:1, 2, 6, 7.