Nouvo Laranzman pour reviz Progranm Lasanble
Anmezir ki lemonn Satan i kontinyen deteryore, Zeova i fortifye nou pour abandonn bann move dezir lemonn ek son move fason, pour viv en lavi rezonnab, zis, e fidel avek Bondye lo sa later. (Tit 2:12) Parmi bann provizyon ki Zeova i fourni atraver ‘lesklav fidel e pridan’ i progranm lasanble rezyonal ek zournen lasanble spesyal tou le lannen. (Mat. 24:45) Pa sa bann rasanbleman i vreman donn nou lafors!
En nouvo laranzman pour reviz progranm sa bann lasanble pou ganny fer pandan lannen servis 2005 avek bi pour ed nou pa oubliy e osi met an pratik lenstriksyon ki nou gannyen. Lo paz 5-6 dan sa sipleman i annan bann lartik ki donn nou en avangou lo sa ki pou ganny prezante e osi bann kestyon revizyon pour sak progranm lasanble. Bann kongregasyon pou egzamin sa lenformasyon dan Renyon Servis en pe letan avan lasanble e en pe letan apre ki zot in asiste zot lasanble. Ki mannyer i pou ganny organize?
Enn oubyen de semenn avan ki kongregasyon i asiste lasanble rezyonal, en diskour 10 minit baze lo lartik “Nouvo Progranm Lasanble rezyonal” pou ganny prezante dan Renyon Servis pour kree antisipasyon pour sa progranm. Sa orater pou osi atir latansyon lo bann kestyon revizyon e ankouraz tou dimoun pour pran not an preparasyon pour revizyon ki pou swiv detrwa semenn apre lasanble.
Dan lespas detrwa semenn apre lasanble, en revizyon 15 minit pour premye zour progranm lasanble pou enkli dan Renyon Servis. Son semenn apre, 15 minit pou ganny dedye pour reviz dezyenm zour progranm lasanble. Bann kestyon revizyon ki’n ganny fourni dan sa sipleman pou servi konman baz pour sa bann diskisyon. Sa revizyon i devret konsantre lo valer pratik sa bann lenformasyon. Bann ansyen i kapab aranze pour fer serten parti dan Renyon Servis pli kourt, elimin, oubyen sanz serten pour fer plas pour sa bann revizyon.
Sa menm laranzman pou ganny swiv pour progranm zournen lasanble spesyal, eksepte ki i pou annan zis en parti 15 minit pour reviz progranm antye. Nou tou nou devret anmas sa sipleman e servi li pour benefisye plennman avek sa bon lenstriksyon ki Zeova i donn nou.—Izai 48:17, 18.